قازاق پوەزياسىنىڭ بەلدى وكىلى, اقىن, قازاقستاننىڭ ەڭبەك ەرى مۇحتار شاحانوۆتىڭ ولەڭدەرى كوپ وقىلادى. ۇلت رۋحانياتىنا ايتۋلى ۇلەس قوسقان اقىننىڭ وقىرماندارى قاتارىندا اتىراۋلىقتار دا بار.
جاقىندا اتىراۋداعى اباي ورتالىعىنداعى كەزدەسۋدە اقىن شىعارماشىلىعىنداعى قۇندىلىقتار ۇندەستىگى اتاپ ءوتىلدى. اقىن ولەڭدەرىنىڭ استارىنان ار الدىنداعى ادالدىقتىڭ مورالدىق-ەتيكالىق يدەالىن ۇعىنۋعا بولادى. ال ماحاببات پەن دوستىققا, مەيىرىمدىلىككە ۇندەيتىن ولەڭدەرى وقىرمانىن ادامگەرشىلىك بولمىستان اينىماۋعا, ادالدىققا جەتەلەيدى.
كەزدەسۋدە اقىن مۇحتار شاحانوۆ ۇلتتى ساقتاۋدىڭ باستى شارتى – ءتىل مەن داستۇرگە قاتىستى ويىمەن ءبولىستى. ونىڭ پىكىرىنشە, پوەزيانىڭ باستى ۇستانىمى – بۇرىن ەشكىم ايتپاعان ءسوزدى وقىرمانعا جەتكىزۋ.
«مەنىڭ شەشەم 13 بالانى دۇنيەگە اكەلدى. بىراق مەنەن باسقاسى ءسابي كەزىندە ءتۇرلى اۋرۋدان قايتىس بولدى. «مەنىڭ ءۇش ۇلىم بار. ۇلكەنى – ءشامشى, ەكىنشىسى – تولەگەن جانە كەنجەسى مۇحتار», دەپ وتىراتىن ەدى شەشەم. ءشامشى قالداياقوۆ پەن تولەگەن ايبەرگەنوۆ ۇلت رۋحانياتىنا ولشەۋسىز ۇلەس قوستى. شامشىمەن بىرگە ەل-جۇرتقا تانىمال بولعان 16 ءان جازدىق», دەدى م.شاحانوۆ.
اقىننىڭ دوسى از. ونىڭ ىشىندە وزگە ۇلتتىڭ وكىلدەرى دە بار. سونىڭ ءبىرى – قازاقتى ءوز ۇلتىنداي قۇرمەت تۇتقان قىرعىز جازۋشىسى شىڭعىس ايتماتوۆ. ال بەلگىلى دراماتۋرگ, جازۋشى راحىمجان وتارباەۆ اقىندى رۋحانياتتىڭ بەلدى وكىلى رەتىندە سىيلايتىن ەدى.
«قازاق جەرىنىڭ ءار ءوڭىرى ماعان قىمبات, ونىڭ ىشىندە اتىراۋدى دا جۇرەگىمدە ساقتاپ جۇرەمىن. بۇدان 30 جىل بۇرىن جۇمىسسىز قالعانىمدا, اتىراۋلىق دوسىم ورىنباسار ەركىنوۆتىڭ ۇيىندە التى اي تۇردىم. دوسىم شىعارماشىلىعىمدى توقتاتپاۋىما بار مۇمكىندىكتى جاسادى. ونىڭ ۇيىندە كوپتەگەن ولەڭ جازدىم», دەيدى اقىن.
ونىڭ شىعارمالارىن تەك اعا بۋىن عانا ەمەس, جاستار دا قىزىعۋشىلىقپەن وقيدى. ماسەلەن, ەرلى-زايىپتى دۋلات پەن نازەركە حامزيندەر اقىننىڭ ليريكالىق شىعارماسىنا ورايلاستىرىلعان «ماحابباتتى قورعاۋ» قويىلىمىن ۇسىندى.
«ەكەۋمىز دە – مۇحتار اعانىڭ وقىرمانىمىز. ءبىز اقىننىڭ پوەزيا كەشىندە تانىسقانبىز. سول سەبەپتەن مۇنداي كەزدەسۋدى قالت جىبەرمەيمىز. بۇگىنگى كەزدەسۋگە اقىن تۋىندىسىنان قويىلىم ازىرلەدىك», دەيدى دۋلات حامزين.
ال جانبولات ەسىمدى تاعى ءبىر وقىرمان – تەحنيكا سالاسىنداعى ماماندىقتىڭ يەسى. مۇحتار شاحانوۆتىڭ پوەزياسىن وقيدى. ول كەزدەسۋگە ۇلىن ەرتە كەلىپتى.
«پوەزياسىن جاقسى كورەتىن مۇحتار شاحانوۆتىڭ اتىراۋعا كەلگەنىن كەزدەيسوق ءبىلدىم. ۇلىمنىڭ مۇعالىمى WhatsApp جەلىسىندەگى ستاتۋسىندا وسىنداي جاڭالىقپەن بولىسكەن ەكەن. اقىننىڭ ولەڭدەرىن تىڭداۋ ءۇشىن كەلدىم. وتباسىلىق كىتاپحانامىزدا ساقتالعان جىر كىتابىنا قولتاڭباسىن الدىم», دەيدى ول.
جەرگىلىكتى وقىرماندار اقىننىڭ قولتاڭباسىن الدى. ەستەلىك سۋرەتكە ءتۇستى. ال اقىن ادالدىق پەن دوستىق, ماحاببات پەن مەيىرىمدىلىك حاقىندا پىكىر ءبىلدىردى. ء«ار ادامنىڭ ايناسى – ادالدىق. دوس-جاران مەن اعايىنعا, وتان مەن كاسىپكە ادالدىقتىڭ ءجونى بولەك. ەڭ باستىسى, ار الدىنداعى ادالدىقتان اينىماعان ءجون», دەدى اقىن.
اتىراۋ وبلىسى