تۇرعىن ءۇي باعاسى قىمباتتاعان وڭىرلەر اتالدى

جاريالانعان ەسەپ بويىنشا, ءبىر جىل ىشىندە (2023 جىلدىڭ اقپانىنان 2024 جىلدىڭ اقپانىنا دەيىن) ساتىلاتىن جاڭا تۇرعىن ءۇي باعاسى 3%-عا ءوستى, ال قايتالاما تۇرعىن ءۇي باعاسى 3,3%-عا تومەندەدى. 2024 جىلدىڭ اقپانىندا تۇرعىن ءۇيدى جالعا الۋ وتكەن جىلدىڭ سايكەس ايىمەن سالىستىرعاندا 2,9%-عا ءوستى.

وڭىرلەر بويىنشا جاڭا تۇرعىن ءۇي باعاسى اقتوبەدە – 8,9%-عا, قىزىلوردادا – 7,1%-عا ءوستى. قايتالاما نارىقتا باعانىڭ ءوسۋى تالدىقورعان (9%) جانە اتىراۋ (8,2%) قالالارىندا بايقالدى. جالعا بەرىلەتىن تۇرعىن ءۇي نارىعىندا باعا جەزقازعان (23,3%), قاراعاندى ​​(23%) جانە اتىراۋ (21%) قالالارىندا ءوستى.

ءبىر ايدا (2024 جىلعى اقپان – 2024 جىلعى قاڭتار) جاڭا تۇرعىن ءۇي باعاسى 0,4%-عا, قايتالاما تۇرعىن ءۇي – 1,7%-عا ءوستى. اقپان ايىندا جايلى تۇرعىن ءۇيدى جالعا الۋ وتكەن ايمەن سالىستىرعاندا 1,2%-عا تومەندەدى.

«2024 جىلدىڭ اقپان ايىندا تىركەلگەن تۇرعىن ءۇيدى ساتىپ الۋ-ساتۋ مامىلەلەرىنىڭ سانى 30 534-ءتى قۇرادى, ونىڭ ىشىندە 6 017-ءسى جەكە تۇرعىن ۇيلەر, 24 517-ءى كوپقاباتتى ۇيلەردەگى پاتەرلەر. 2024 جىلعى قاڭتارمەن سالىستىرعاندا (31 713) ساتىپ الۋ-ساتۋ مامىلەلەرىنىڭ سانى 3,7%-عا تومەندەدى. مامىلەلەر سانى بويىنشا بۇرىنعىداي الماتى (6 434 – 21,1%) جانە استانا (5 882 – 19,3%) قالالارى, سونداي-اق قاراعاندى ​​وبلىسى (2 297 – 7,5%) كوش باستاپ تۇر», دەپ حابارلادى ۇلتتىق ستاتيستيكا بيۋروسى.

2024 جىلدىڭ قاڭتارىمەن سالىستىرعاندا اقپاندا ترانزاكتسيالاردىڭ ەڭ كوپ ءوسىمى پاۆلوداردا (+17,1%), شىعىس قازاقستان وبلىستارىندا (+15,2%) جانە شىمكەنتتە (+10,1%) تىركەلدى. 

2024 جىلعى اقپاندا تۇرعىن ءۇيدى ساتىپ الۋ-ساتۋ مامىلەلەرىنىڭ سانى وتكەن جىلدىڭ سايكەس ايىمەن سالىستىرعاندا 26,6%-عا ءوستى, وندا 24 118 مامىلە تىركەلگەن. وڭ كورسەتكىش ماڭعىستاۋ جانە ۇلىتاۋ وبلىستارىن قوسپاعاندا, رەسپۋبليكانىڭ بارلىق وڭىرلەرىندە تىركەلدى, تومەندەۋ سايكەسىنشە 18,3% جانە 8,7% قۇرادى. ەڭ كوپ ءوسىم پاۆلودار وبلىسىندا (75,4%-عا) تىركەلدى.