سەناتتىڭ جالپى وتىرىسىنان كەيىن قارجى ۆيتسە-ءمينيسترى ەرجان ءبىرجانوۆ ەلىمىزدە كولىك سالىعىنىڭ مولشەرىن قايتا قاراۋ, 20-30 جىلدان بەرى قولدانىستا بولعان كولىكتەرگە قاتىستى سالىقتى وزگەرتۋ ماسەلەسى قارالىپ جاتقانىن مالىمدەدى, دەپ جازادى Egemen.kz.
قارجى ۆيتسە-ءمينيسترى ەسكى كولىكتەرگە قاتىستى ماسەلە كوتەرىلىپ جاتقانىن, حالىققا تۇسەتىن جۇكتەمەنى ازايتۋعا باعىتتالعان باسقا دا ۇسىنىستار تالقىلانىپ جاتقانىن ايتتى.
«كولىككە قاتىستى جۇمىس توبى ءتيىستى تالقىلاۋ وتكىزدى. ءبىز بۇل ماسەلەنى «اتامەكەن» ۇلتتىق كاسىپكەرلەر پالاتاسىمەن ۇكىمەت دەڭگەيىندە قاراستىرىپ جاتىرمىز. رەسمي مالىمدەمە جاساۋعا ءالى ەرتە, ويتكەنى ناقتى شەشىم ءالى قابىلدانعان جوق. ءبىز 20-30 جىل پايدالانىپ كەلە جاتقان ەسكى كولىككە قاتىستى ماسەلە كوتەرىپ جاتىرمىز. ماسەلەن, تۇزەتۋ كوەففيتسيەنتىن قولدانۋدى ۇسىندىق, ياعني ولارعا جاڭا اۆتوموبيلگە ارنالعان ستاۆكا بويىنشا سالىق سالىنبايدى. سونىمەن قاتار حالىققا جۇكتەمەنى ازايتۋعا باعىتتالعان باسقا دا ۇسىنىستارىمىز بار. تىم قىمبات كولىكتەرگە ءسان-سالتانات سالىعى سالىنباق. وسى ارقىلى سالىق جۇكتەمەسىن قايتا ءبولۋ مۇمكىندىگى پىسىقتالىپ جاتىر», دەپ ءتۇسىندىردى ە. ءبىرجانوۆ.