وسى اپتادا قازاقستان تەننيسشىلەرى ورەلى ونەرىمەن جانكۇيەرلەرىن قۋانتتى. بۇعان دەيىن ءبىز ميحايل كۋكۋشكيننىڭ يسپانياداعى جانە جىبەك قۇلامباەۆانىڭ ۇندىستانداعى تۋرنيرلەردە توپ جارعانى تۋرالى جازعان ەدىك. ەندى سوڭعى جاڭالىقتار جايىندا اڭگىمەلەيىك.
كەشە ارگەنتينانىڭ تۋكۋمان قالاسىندا «چەلەندجەر» ءتۋرنيرى اياقتالدى. اينالدىرعان ەكى اي ارالىعىندا اقش-تىڭ سانرايز, پالم-كوۋست جانە نەيپلسىندەگى جارىستاردا قارسىلاس شاق كەلتىرمەگەن دميتري پوپكو وڭتۇستىك امەريكادا دا ءوزىن جاقسى قىرىنان كورسەتتى. باستاپقى باسەكەلەردە كورت قوجايىنى گونسالو زەيتۋنە, پەرۋلىق پەدرو ياماچكين, بوليۆيالىق حۋان كارلوس پرادو انحەلودان باسىم تۇسكەن ول جارتىلاي فينالدا تاعى ءبىر جەرگىلىكتى تەننيسشى فەدەريكو اگۋستين گومەستى جولىنان ىعىستىردى. اقتىق سىندا وتانداسىمىز برازيليالىق پەدرو ساكاموتومەن سايىسقا ءتۇستى.
تاعى ءبىر قۋانىشتى جاڭالىق, ەلىمىزدىڭ ءبىرىنشى راكەتكاسى الەكساندر بۋبليك وسى اپتادا جاڭارتىلعان الەمدىك رەيتينگتە ءۇش ساتىعا جوعارىلاپ, 20-ورىندى يەلەندى. قازاقستاننىڭ ەرلەر قۇراماسىنىڭ بىردە-ءبىر مۇشەسى ءدال وسىنداي دارەجەگە جەتپەگەن. كەزىندە حالىقارالىق ارەنادا جاپ-جاقسى ونەر كورسەتكەن اندرەي گولۋبەۆ 2010 جىلدىڭ قوڭىر كۇزىندە 33 جانە الەكساندر كۋكۋشكين 2019 جىلدىڭ اقپانىندا 39-ورىندى ەنشىلەدى. جەتكەن جەرىمىز وسى عانا ەدى. اقىرى ولاردىڭ بارلىعىنان الەكساندر بۋبليك وزدى. كۇنى كەشە عانا ول ءوزىنىڭ سپورتتىق مانسابىندا تۇڭعىش رەت توپ-20 ويىنشىنىڭ قاتارىنا قوسىلدى.
ەلىمىزدىڭ ەڭ ۇزدىك تەننيسشىسى جايىندا قىسقاشا اقپارات بەرسەك, الەكساندر 1997 جىلدىڭ 17 شىلدەسىندە رەسەيدىڭ لەنينگراد وبلىسىنا قاراستى گاتچينا قالاسىندا دۇنيەگە كەلدى. العاشىندا سانكت-پەتەربۋرگ پەن ماسكەۋدە شەبەرلىگىن شىڭداپ, جاستار بۋىنى اراسىندا ەلەۋلى تابىستارعا قول جەتكىزدى. بىراق جەرگىلىكتى تەننيس فەدەراتسياسى تاراپىنان ءتيىستى قولداۋ كورسەتىلمەگەندىكتەن, 2016 جىلى قازاقستان ازاماتتىعىن الدى. سول كەزدەن بەرى ول مونپەلەدەگى اتر تۋرنيرىندە ەكى مارتە (2022, 2024 جىلدارى) گاللە (2023) مەن انتۆەرپەندەگى (2003) تۋرنيرلەردە توپ جاردى. نيۋپورت (2019, 2022), چەندۋ (2019), انتاليا (2021), سينگاپۋر (2021) جانە مەتستە (2022) ۇيىمداستىرىلعان ءدۇبىرلى دودالاردىڭ فينالىندا وينادى. بىلتىر ۋيمبلدوننىڭ ءتورتىنشى كەزەڭىنە دەيىن جەتتى. بۇل – بۋبليكتىڭ «ۇلكەن دۋىلعا» ساناتىنداعى جارىستارداعى ەڭ ۇزدىك كورسەتكىشى.