ءماجىلىس نەسيە بەرۋ كەزىندە تاۋەكەلدەردى بارىنشا ازايتۋ جانە قارىز الۋشىلاردىڭ قۇقىقتارىن قورعاۋ ماسەلەلەرى بويىنشا زاڭ جوباسىن ءبىرىنشى وقىلىمدا ماقۇلدادى, دەپ حابارلايدى Egemen.kz.
زاڭ جوباسى مەملەكەت باسشىسىنىڭ «ادىلەتتى قازاقستاننىڭ ەكونوميكالىق باعدارى» اتتى جولداۋىن ىسكە اسىرۋ اياسىندا ازىرلەندى.
قازىرگى ۋاقىتتا ەل ازاماتتارىنىڭ 8,5 ملن-عا جۋىعى قارىز تولەپ وتىر. ونىڭ ىشىندە 1,6 ملن-عا جۋىق ازامات قارىزعا بەلشەدەن باتىپ, نەسيەسىن ۋاقىتىندا وتەي الماي ءجۇر. نەسيەنى تولەۋ مەرزىمى 90 كۇننەن كەشىككەن قارىزدىڭ جالپى سوماسى شامامەن 1,7 ترلن تەڭگەگە جەتتى.
اتالعان زاڭ جوباسىندا بانكتەر مەن ميكروقارجى ۇيىمدارى تاراپىنان ءالى وتەلمەگەن تۇتىنۋشىلىق نەسيەلەر بويىنشا 90 كۇننەن اسقان بەرەشەگى بار تۇلعالارعا سىياقى ەسەپتەۋگە تىيىم سالۋ كوزدەلىپ وتىر. سونداي-اق نەسيە وتەمەگەن مەرزىمى 90 كۇننەن اساتىن ازاماتتارعا كەپىلسىز تۇتىنۋشىلىق نەسيەلەر بەرۋگە تىيىم سالىنۋى مۇمكىن. دەسە دە بۇل نورما جەكە تۇلعانىڭ قارىزىن وتەۋ ءۇشىن بانكتەن بەرىلەتىن قارىزعا قولدانىلمايدى.
سونىمەن قاتار, قۇجاتقا قارىز الۋشىنىڭ نەسيە بويىنشا اي سايىنعى تولەمىنىڭ رەسمي تابىسىنىڭ جارتىسىنان اسپاۋى تۋرالى تالاپ ەنگىزىلگەن. بۇل تالاپتى بانكتەر مەن ميكروقارجى ۇيىمدارى ساقتاۋعا مىندەتتەلەدى. زاڭ قابىلدانعان جاعدايدا تۇتىنۋشىلىق كرەديت ۇعىمى ەنگىزىلىپ, نورماتيۆتىك دەڭگەيدە ونىڭ ەڭ جوعارى ءمانى شەكتەلەدى (بانكتەر ءۇشىن – 5 ملن تەڭگە, ميكروقارجى ۇيىمدارى ءۇشىن – 2 ملن تەڭگە).