ءماجىلىس دەپۋتاتى ەدىل جاڭبىرشين عىلىم جانە جوعارى ءبىلىم مينيسترلىگىنىڭ عىلىمدى بيۋدجەتتەن قارجىلاندىرۋ جۇمىستارىنداعى كەمشىلىكتەرىن اتاپ, «عىلىم جانە تەحنولوگيالىق ساياسات تۋرالى» زاڭ جوباسىن سىنعا الدى, دەپ حابارلايدى Egemen.kz.
دەپۋتاتتىڭ ايتۋىنشا, عىلىمدى بيۋدجەتتەن قارجىلاندىرۋ ىسىندە اشىقتىق جوق, بيۋروكراتيا, قيىندىقتار, عىلىمي كەڭەس جۇمىستارىنىڭ كەمشىلىكتەرى تاعى بار.
«مەن كەشە تۇنىمەن وتىرىپ, قانداي ەسەپ بەرىپ جاتىر ەكەن دەپ وسى عىلىمي كەڭەس جۇمىستارىن قارادىم. ۇلتتىق عىلىمي كەڭەس دەپ اتالادى, ونشاقتىسى بار. قاراپ وتىرساڭىزدار, ءبارىنىڭ ەسەبى – 4 بەت. تەك ستاتيستيكا مەن وزدەرىنىڭ مۇشەلەرىن جازىپ قويعان, ەشقانداي تالداۋ جوق. قانداي عىلىمي جەتىستىكتەر بولدى, قايدا ەنگىزىلدى, قانداي تاۋارلار ەكسپورتقا شىعارىلادى, قانداي تاۋارلار جەتىلدىرىلدى, قانشا سالىق ءتۇستى, قانشا جۇمىس ورنى اشىلدى... ەشقانداي مالىمەت جوق. ەسەپتەرى 3 بەتتەن تۇرادى, ءبارى ورىس تىلىندە جازىلعان. نە مەملەكەتتىك, نە اعىلشىن تىلىندە ماتەريال جوق», دەدى دەپۋتات.
ەدىل جاڭبىرشين عىلىمدى دامىتۋ ءۇشىن عالىمداردىڭ وزدەرى داميتىن ورتالار قۇرۋ كەرەك ەكەنىن العا تارتىپ, شەتەلدىك تاجىريبەدەگى مىسالداردى كەلتىردى.
ونىڭ ايتۋىنشا, «عىلىم جانە تەحنولوگيالىق ساياسات تۋرالى» زاڭ جوباسىندا جاي عانا كوممەرتسياليزاتسيا مەن عىلىم تۋرالى ەكى زاڭ بىرىكتىرىلگەن.
«وسىنداي زاڭ بولا ما؟! سوندىقتان, مينيستر مىرزا, ەكىنشى وقىلىمعا دەيىن مىنانىڭ ىشىنە قاجەتتى نارسەلەردى كىرگىزۋىمىز كەرەك, جۇمىس ىستەيتىن زاڭ بولۋ قاجەت. ايتپەسە, بۇل «حولوستوي پاترون» بولادى», دەدى ەدىل جاڭبىرشين.