بارشا قازاق جانكۇيەرى 10 ناۋرىزدا اقش-تىڭ مايامي قالاسىندا جالاۋى جەلبىرەيتىن UFC-299 ءتۋرنيرىن تاعاتسىزدانا كۇتىپ وتىر. سول كەشتە قازاقتىڭ تانىمال ارالاس جەكپە-جەك شەبەرى اسۋ «زۇلپىقار» الماباەۆ جەرگىلىكتى فايتەر سي دجەي ۆەرگارامەن كۇش سىناسادى.
سي دجەي 1991 جىلدىڭ 18 ماۋسىمىندا سان-انتونيودا دۇنيەگە كەلگەن. ءاۋ باستا سپورتتىڭ سان الۋان تۇرىمەن اينالىسقان بوزبالا ەسەيە كەلە مۋاي-تايعا قىزىعۋشىلىق تانىتتى. 2012 جىلدان بەرى ول ارالاس جەكپە-جەككە مىقتاپ دەن قويدى. سول ارالىقتا ۆەرگارا 17 مارتە جەكپە-جەككە شىعىپ, 12 رەت جەڭىسكە جەتتى. بۇل ايقاستاردىڭ جەتەۋىندە ايقىن جەڭىسكە قول جەتكىزدى. ءتورت رەت ۇتىلىپ, تاعى ءبىر باسەكەدە تەڭ ەسەپ تىركەلدى.
30 جاستاعى اسۋ – جامبىل وبلىسى, سارىسۋ اۋدانىنىڭ تۋماسى. باستاپقىدا ول وتاندىق الاش پرايد, رەسەيلىك Tech-Krep FC, Fight Nights Global, اسا, م-1 جانە باحرەيندىك Brave ليگالارىندا ونەر كورسەتتى. بىلتىر 5 تامىزدا قازاقتىڭ قايسار ۇلى UFC-دەگى تۇساۋكەسەر كەزدەسۋىن ودي وسبورنعا قارسى وتكىزىپ, ونى ەكىنشى راۋندتا قىلقىندىرىپ تاستادى. جالپى 10 جىلدا الماباەۆ 20 مارتە وكتاگونعا شىعىپ, سونىڭ 18-ىندە جەڭىسكە جەتتى. سول جەكپە-جەكتەردىڭ تەڭ جارتىسىندا ايقىن باسىمدىق تانىتتى. 2017 جىل اسۋ ءۇشىن ءساتسىز بولدى. قانداسىمىز ماحاچكالادا داعىستاندىق تاگير ۋلانبەكوۆ پەن الماتىدا ازەربايجاندىق مەحمان مامەدوۆكە ەسە جىبەردى. ال سودان كەيىنگى التى جىل ارالىعىندا ول 14 كەزدەسۋ وتكىزىپ, بارلىق قارسىلاسىن قاپى قالدىردى. وعان قوسا, «زۇلپىقاردىڭ» دجيۋ-دجيتسۋدان الەم جانە كومبات دجيۋ-دجيتسۋدان ازيا چەمپيونى دەگەن اتاقتارى بار.
ماياميدە ءبىز اسۋ الماباەۆ پەن سي دجەي ۆەرگارانىڭ جەكپە-جەگىنەن بولەك, تاعى 14 كەزدەسۋدى تاماشالايمىز. بۇل كەشتىڭ باستى باسەكەسىندە شون و’مەللي (17-1) مەن مارلون ۆەرا (21-8-1) جانە داستين پورە (29-8) مەن بەنۋا سەن-دەني (13-1) اراسىندا وتەدى. سونداي-اق مايكل پەيدج (21-2) بەن كەۆين حوللاند (26-9), گيلبەرت بيورنس (22-6) پەن دجەك دەللا ماددالەنا (15-3), پيوتر يان (16-5) مەن يادۋن سۋن (21-7-1), جايلتون المەيدا (20-2) مەن كيورتيس بلەيدس (17-4) جانە ماتەۋش گامروت (23-2) پەن رافاەل دوس انوس سىندى ساڭلاقتاردىڭ دا (32-15) ايقاسى دا كورەرمەندەر كوڭىلىنەن شىعاتىنىنا كۇمانىمىز جوق.