ەندى ازاماتتار ءوز بالالارىنىڭ بولاشاعى ءۇشىن ءبىلىم بەرۋ جيناقتاۋ سالىمىن اشا الادى. مۇنداي مۇمكىندىكتى «وتباسى بانك» ۇسىنىپ وتىر. «AQYL» دەپ اتالاتىن دەپوزيتتىڭ ماقساتى – ازاماتتارىمىزدىڭ ءوز بىلىمىنە نەمەسە بالالارىنىڭ بىلىمىنە قاراجات جيناۋىنا مۇمكىندىك جاساۋ. ونىڭ كومەگىمەن قازاقستاندىق نەمەسە شەتەلدىك ءبىلىم بەرۋ مەكەمەسىندە وقۋ اقىسىن تولەۋگە بولادى.
«AQYL» ءبىلىم بەرۋ جيناقتاۋ سالىمىن كەمىندە 3 جىل نەمەسە 5 جىل مەرزىمگە اشۋعا بولادى. ەگەر دەپوزيت كەمىندە ءۇش جىل مەرزىمگە اشىلسا, وندا دەپوزيت بويىنشا مولشەرلەمە جىلدىق 12%-عا (جىلدىق ءتيىمدى سىياقى مولشەرلەمەسى – جتسم 13,1%-عا دەيىن) تەڭ بولادى. ەگەر دەپوزيت كەمىندە 5 جىل مەرزىمگە اشىلسا, وندا دەپوزيت بويىنشا مولشەرلەمە 9,5%-عا (جتسم 10,1%-عا دەيىن) تەڭ بولادى. بانكتىڭ ەسەپتەلگەن سىياقىسى اي سايىن كاپيتالداندىرىلىپ وتىرادى. دەپوزيت مەرزىمى اياقتالعاننان كەيىن ول اۆتوماتتى تۇردە جاڭارتىلادى.
«بانك جۇمىسىنىڭ العاشقى ساعاتتارىنان-اق 50-دەن استام قازاقستاندىق دەپوزيت اشىپ ۇلگەردى. «AQYL» – اتا-انالارعا بالالارىنىڭ وقۋىنا قاراجات جيناۋعا كومەكتەسەتىن ەرەكشە قۇرال. شىنىمەن دە, بالا دۇنيەگە كەلىسىمەن ءار وتباسى ۇرپاعىنىڭ قانداي ءبىلىم الاتىنىن, ۇلىن نەمەسە قىزىن شەتەلدىك جوعارى وقۋ ورنىندا نەمەسە قازاقستاندىق ينستيتۋتتا وقىتاتىنىن ويلايدى. ەگەر بالا گرانتقا تۇسسە, وندا «AQYL» دەپوزيتىندەگى قارجىنى الىپ, ولاردى كەز كەلگەن وزگە ماقساتقا, سونىڭ ىشىندە تۇرعىن ءۇي ساتىپ الۋعا جۇمساۋعا بولادى», دەيدى «وتباسى بانك» باسقارما توراعاسى ءلاززات يبراگيموۆا.
دەپوزيتكە جىل سايىن ەسەپتەلەتىن سىيلىقاقى سالىمشىلاردىڭ بارلىق ساناتى ءۇشىن 5%-دى قۇرايدى. جەتىم بالالارعا, اتا-اناسىنىڭ قامقورلىعىنسىز قالعان بالالارعا, مۇمكىندىگى شەكتەۋلى بالالارعا, كوپبالالى وتباسىلاردان شىققان جانە جان باسىنا شاققانداعى تابىسى از, ياعني ازىق-ت ۇلىك سەبەتىنەن تومەن وتباسىلارعا اشىلعان دەپوزيتتەرگە مەملەكەتتىك سىيلىقاقى 7% مولشەرىندە ەسەپتەلەدى. جىل سايىن دەپوزيتكە ەسەپتەلەتىن سىيلىقاقىنىڭ ەڭ جوعارى مولشەرى 100 ايلىق ەسەپتىك كورسەتكىشتەن (2024 جىلعا – 369 200 تەڭگە) اسپاۋعا ءتيىس.
مەملەكەتتىك سىيلىقاقىنى ەسەپتەۋ ءۇشىن سالىم ءبىر جىلعا تولۋعا ءتيىس. دەپوزيت اشىلعان كەزدە مىندەتتى تۇردە جاسالاتىن باستاپقى جارنانىڭ مولشەرى ءۇش ايلىق ەسەپتىك كورسەتكىشكە نەمەسە 11 076 تەڭگەگە (2024 جىلى) تەڭ بولۋى كەرەك. بولاشاقتا دەپوزيتتىڭ اي سايىنعى اۋدارىمدار مولشەرىن سالىمشى ءوز مۇمكىندىگىنە قاراي انىقتايدى.
ايتا كەتەيىك, دەپوزيت مەملەكەت پەن ءۇشىنشى تۇلعالاردىڭ ءوندىرىپ الۋىنان قورعالعان, سونداي-اق ول قازاقستاندىق دەپوزيتتەرگە كەپىلدىك بەرۋ قورىندا ساقتاندىرىلعان. گرانت العان كەزدە جيناقتاۋشى دەپوزيتتى جابۋعا جانە مەملەكەتتىك سىيلىقاقىنى قوسا العاندا, جيناقتاۋدىڭ بارلىق سوماسىن الۋعا بولادى. سونىمەن قاتار بۇل دەپوزيتتى ۇلتتىق قوردان الىنعان جيناقتارمەن دە تولىقتىرۋ مۇمكىندىگى بار. بۇل تولەمدەردى بيىل 18 جاسقا تولعان قازاقستاندىقتار قولدانا الادى. ونى «ۇلتتىق قور – بالالارعا» جوباسى اياسىندا enpf-otbasy.kz پلاتفورماسى ارقىلى جۇزەگە اسىرۋعا بولادى.