سەمەيدە پوليتسيا قىزمەتكەرلەرى جاس جەتكىنشەكتى اڭدىعان ەر ادامدى قولعا ءتۇسىردى. ونى ۇستاۋ كەزىندە كۇدىكتى ءتارتىپ ساقشىسىنا پىشاق جاراقاتىن سالعان.
29 اقپان كۇنى پوليتسياعا قوڭىراۋ شالعان 13 جاستاعى قىز ءوزىن بەلگىسىز ەر ادام ارتىنان اڭدىپ جۇرگەنى تۋرالى حابارلايدى. ول ءبىر دۇكەنگە كىرگەنىن, سىرتقا شىعۋعا قورقاتىنىن, پوليتسيا كەلگەنشە سوندا كۇتەتىنىن ايتادى.
وقيعا ورنىنا دەرەۋ جەتكەن ۋچاسكەلىك پوليتسيا ينسپەكتورلارى سۋپەرماركەتتىڭ جانىنان كۇدىكتى ادامدى بايقاپ, ءمان-جايدى انىقتاۋعا تىرىسقان. بىراق جىگىت قولىنداعى پىشاعىمەن ءتارتىپ ساقشىلارىنا قاراي جۇگىرگەن. ۋچاسكەلىك پوليتسەيلەر دۇكەن ماڭىندا ادامدار كوپ ەكەنىن, ولارعا دا زيانى ءتيىپ كەتۋىنەن كۇدىكتەنىپ, ونى باسقا جاققا اكەتۋ كەرەك ەكەنىن تۇسىنەدى. سول ارادا راتسيامەن كومەك شاقىرىپ, پاترۋلدىك پوليتسيا ەكيپاجى دەرەۋ وقيعا ورنىنا كەلدى.
زاڭسىز ارەكەتتىڭ جولىن كەسۋ ءۇشىن قىزمەتتىك كولىكتەن شىققان كەزدە پاترۋلدىك پوليتسەي اسحات احاتوۆقا كۇدىكتى پىشاق جاراقاتىن سالعان. بىراق سوعان قاراماستان, جارالانعان قىزمەتكەر ارىپتەستەرىمەن بىرگە جەكپە-جەك ادىستەرىن قولدانىپ, قىلمىسكەردى ۇستادى. باسىنان ءۇش رەت جاراقات العان پوليتسيا قىزمەتكەرى اۋرۋحاناعا جەتكىزىلىپ, وعان مەديتسينالىق كومەك كورسەتىلدى.
قازىرگى ۋاقىتتا كۇدىكتى ۋاقىتشا ۇستاۋ يزولياتورىنا قامالىپ, وعان قاتىستى پوليتسيا قىزمەتكەرىنىڭ ومىرىنە قول سۇعۋ فاكتىسى بويىنشا قىلمىستىق ءىس قوزعالدى.