قارۋلى كۇشتەر جاساعىنىڭ بالالارى «بالداۋرەن» رەسپۋبليكالىق وقۋ-ساۋىقتىرۋ ورتالىعىنىڭ فيليالدارىنا باردى. ولار ارنايى بولىمشەلەردە ءۇش اپتا بويى مادەني جانە ساۋىقتىرۋ ءىس-شارالارىنان بولەك مەكتەپ باعدارلاماسى بويىنشا ءبىلىم الادى. مۇنداعى ماقسات – كەلەشەك بۋىننىڭ بويىنا اسكەري-پاتريوتتىق تاربيەنى ءسىڭىرۋ.
كەيىنگى جىلدارى اسكەري سالادا بوي كورسەتكەن ماسەلەنىڭ ءبىرى – پاتريوتتىق تاربيەدە جۇيەلى ءتاسىلدىڭ بولماۋى. تۇيتكىلدىڭ ءتيىمدى شەشىمى رەتىندە بىلتىر مەملەكەت باسشىسى قاسىم-جومارت توقاەۆتىڭ تاپسىرماسىمەن قورعانىس مينيسترلىگى 2030 جىلعا دەيىنگى ارنايى تۇجىرىمداماسىن ازىرلەگەن-ءدى. قۇجاتتا ءتورت نەگىزگى مازمۇندىق ۇعىم بار. ولار: تاربيە, ءبىلىم, پاتريوتيزم جانە وتاندى قورعاۋ.
«جاستارعا اسكەري-پاتريوتتىق تاربيە بەرۋ بىرلىك پەن تۇراقتىلىقتىڭ, ادىلدىك پەن ىنتىماقتاستىقتىڭ, زاڭ مەن ءتارتىپتىڭ, سەنىم مەن جاۋاپكەرشىلىكتىڭ ۇلتتىق قۇندىلىقتارىنا نەگىزدەلۋگە ءتيىس. بۇل – جاڭا قازاقستاننىڭ قۇرىلۋىنىڭ كورىنىسى. ەڭ الدىمەن, جەكە تۇلعانىڭ ەڭ ماڭىزدى قاسيەتتەرىنىڭ ءبىرى – ونىڭ جەرى مەن ەلىنە دەگەن قۇرمەت سەزىمى باعالانۋى كەرەك. اسكەري-پاتريوتتىق تاربيە ۇدەرىسىنىڭ نەگىزگى لوكوموتيۆى ەلدىڭ قارۋلى كۇشتەرىنىڭ ۇلتتىق اسكەري-پاتريوتتىق ورتالىعى مەن ءبىلىم بەرۋ مەكەمەلەرى», دەلىنگەن قۇجاتتا.
ەلىمىزدە بۇگىندە اسكەري-پاتريوتتىق كلۋبتاردىڭ سانى 9 مىڭعا جۋىقتايدى. قوزعالىس تاربيەلەنۋشىلەرىنىڭ سانى 260 مىڭنان اسىپ جىعىلادى. جىل سايىن «ايبىن» اسكەري-پاتريوتتىق جاستار جيىنى دا وتكىزىلەدى. وعان ءار كەزەڭدە ەكى مىڭنان استام اسكەري-پاتريوتتىق كلۋب, سونداي-اق 55 مىڭنان استام بالا قاتىسادى.
سونداي-اق قورعانىس جانە وقۋ-اعارتۋ مينيسترلىگىنىڭ بىرلەسكەن «بالداۋرەن» ورتالىعىندا بيىل مىڭنان استام بالا اسكەري-پاتريوتتىق تاربيەدەن وتەدى. تاياۋدا عانا جاسوسپىرىمدەردىڭ ءبىرازى تۇركىستان, ششۋچينسك جانە بالقاش, قوناەۆ قالالارىنا باردى. بۇل – قورعانىس ءمينيسترى, گەنەرال-پولكوۆنيك رۋسلان جاقسىلىقوۆ پەن وقۋ-اعارتۋ ءمينيسترى عاني بەيسەمباەۆتىڭ بيىل قاڭتار ايىندا وتكەن كەزدەسۋى كەزىندە قول جەتكىزىلگەن ۋاعدالاستىقتىڭ ناتيجەسى.
– كەلىسىم اياسىندا جاستارعا اسكەري-پاتريوتتىق تاربيە بەرۋدى جەتىلدىرۋدىڭ بىرلەسكەن جوسپارى جاسالدى جانە كەيىننەن بەكىتىلدى. «بالداۋرەن» رەسپۋبليكالىق وقۋ-ساۋىقتىرۋ ورتالىعىنىڭ فيليالدارىندا اسكەري قىزمەتشىلەر مەن قارۋلى كۇشتەر قىزمەتشىلەرىنىڭ بالالارىنا كۆوتا ءبولۋ تۋرالى ۋاعدالاستىققا قول جەتكىزىلدى. بالانىڭ تاربيەسى بەسىكتەن باستالادى دەيدى. سوندىقتان ىنتىماقتاستىق اسكەرگە شاقىرىلعانعا دەيىنگى جاستارمەن جۇمىس ىستەۋگە باعىتتالعان. جالپى, قوعامنىڭ اسكەرگە دەگەن جاڭاشا كوزقاراسىن قالىپتاستىرۋ, اسكەري ءىستىڭ نەگىزدەرىن زەردەلەۋ بويىنشا تاجىريبەلىك ساباقتاردى قامتيتىن ءتيىستى وقۋ باعدارلاماسى ەنگىزىلىپ وتىر. «جاس سارباز», «Smart sarbaz» سىنىپتارى اشىلادى, باسقا دا ءىس-شارالار جوسپارلانادى. اسكەري-پاتريوتتىق كلۋبتاردىڭ تاربيەلەنۋشىلەرى ءۇشىن بىرىڭعاي نىساندى ەنگىزۋ ماسەلەسى شەشىلىپ كەلەدى. وسى ءىس-شارالاردىڭ بارلىعى 2030 جىلعا دەيىنگى جاستاردى اسكەري-پاتريوتتىق تاربيەلەۋ تۇجىرىمداماسىن ىسكە اسىرۋعا قىزمەت ەتەدى, – دەدى بالقاش قالاسىنداعى «بالداۋرەن» رببو فيليالى ديرەكتورىنىڭ وقۋ-تاربيە جۇمىسى جونىندەگى ورىنباسارى تىلەۋحور بيتىلەۋوۆا.
مۇنداي دەمالىسقا ءبىرىنشى كەزەكتە شالعايداعى گارنيزونداردا اسكەري قىزمەت وتكەرەتىن, تولىق ەمەس جانە كوپبالالى وتباسىلاردا تاربيەلەنەتىن اسكەري قىزمەتشىلەر مەن ازاماتتىق پەرسونالدىڭ بالالارى جىبەرىلدى. ولاردىڭ دەنساۋلىعى باستى نازاردا.
ايتا كەتەيىك, مينيسترلىكتەردىڭ بىرلەسكەن جوسپارىندا «بالداۋرەن» رقق ۆەدومستۆولىق تيەسىلىلىگىنە, شتات كەستەسىنە, «التىن ەمەل» كەشەنىنىڭ ينفراقۇرىلىمىن جەتىلدىرۋگە, جوندەۋ جۇمىستارىن جۇرگىزۋگە, سپورت قالاشىعىن جانە اۋديتوريا جابدىقتارىن تۇرعىزۋعا قاتىستى بىرقاتار ۇيىمداستىرۋ ءىس-شاراسىن وتكىزۋ كوزدەلگەن.