تابيعاتتى قورعاۋ پروكۋراتۋراسىنىڭ شارا قولدانۋىمەن جەتىسۋ وبلىسىنىڭ پانفيلوۆ, قاراتال, اقسۋ, سارقان اۋداندارى جانە تەكەلى قالاسىندا كوممۋنالدىق قالدىقتاردى شىعارۋدىڭ تاريفتەرى تومەندەتىلدى, دەپ جازادى Egemen.kz وبلىستىق پروكۋراتۋرانىڭ ءباسپاسوز قىزمەتىنە سىلتەمە جاساپ.
«پروكۋرورلار ۋاكىلەتتى ورگانداردىڭ ۇش جىلدان استام ۋاقىت بويى ماسليحاتقا ولاردى بەكىتۋ ءۇشىن تاريفتەر ۇسىنباعانىن انىقتادى. قىزمەت كورسەتەتىن كومپانيالار تاريفتى ءوز بەتىنشە بەلگىلەپ, ونىڭ سوماسىن 1 م3 1500 تەڭگەدەن 5000 تەڭگەگە دەيىن وسىرگەن.
قاداعالاۋ اكتىسى بويىنشا اتالعان اۋدانداردىڭ تۇرعىندارى ءۇشىن جاڭا تاريفتەر بەكىتىلدى, بۇل قىزمەت اقىسىن 2 ەسەگە, ال كەيبىر جاعدايلاردا 10 ەسەگە تومەندەتۋگە مۇمكىندىك بەردى. وسىلايشا 100 مىڭنان استام تۇتىنۋشىنىڭ, ونىڭ ىشىندە 6 مىڭ زاڭدى تۇلعانىڭ مۇددەسى قورعالدى», دەلىنگەن اقپاراتتا.
بۇل باعىتتاعى جۇمىستار الداعى ۋاقىتتا وبلىستىڭ الاكول, كەربۇلاق اۋداندارىندا دا جۇزەگە اسىرىلادى.