ءال-فارابي اتىنداعى قازۇۋ-دا جۇمىس ورىندارىنىڭ جارمەڭكەسى ءوتتى. جارمەڭكەگە «Halyk bank», «Beam.kz», بانك تسەنتر كرەديت, «Kaspi Bank»-پەن قاتار 30-دان استام كومپانيا قاتىسىپ, جۇمىس بەرۋشىلەر ستۋدەنتتەرگە ءارتۇرلى سالاداعى بوس جۇمىس ورىندارىن ۇسىندى.
«ۋنيۆەرسيتەتىمىزدە ءداستۇرلى ءىس-شاراعا اينالعان جۇمىس ورىندارى جارمەڭكەسى ستۋدەنتتەرگە كەڭ مۇمكىندىكتەر بەرەدى. ويتكەنى ءاربىر كومپانيا جايىندا تولىق اقپارات الىپ, بوس جۇمىس ورنى تۋرالى مالىمەتتەرمەن تانىسۋ مۇمكىندىگى قاراستىرىلعان. بۇل ءوز كەزەگىندە ستۋدەنت جاستاردى ىنتالاندىرىپ, ولاردى ەڭبەك نارىعىنا باعدارلاۋعا كومەكتەسەدى. جارمەڭكە جاستارعا تاعىلىمدامادان وتۋگە ءارى جۇمىسقا ورنالاسۋىنا قولايلى جاعداي تۋعىزادى» دەيدى مەحانيكا-ماتەماتيكا فاكۋلتەتىنىڭ مامانى سمايىل ەركەبۇلان.
اتالعان فاكۋلتتىڭ ماگيسترانتى ىرىسداۋلەت قارسىباي ۇلىنىڭ جارمەڭكەگە بيىل ءبىرىنشى رەت قاتىسۋى. قازىرگى ۋاقىتتا جۇمىس ىستەپ جۇرگەنىمەن, باسقا سالادا باعىن سىناپ كورگىسى كەلەتىن جاس ماماننىڭ ايتۋىنشا, جارمەڭكە ستۋدەنتتەر ءۇشىن كاسىبي جولىن باستاۋداعى ماڭىزدى قادام بولاتىنى انىق ءارى بۇل الاڭدا ەلىمىزدەگى كومپانيالار تۋرالى كوپ ماعلۇمات الۋعا بولادى.
وقۋ ورىندارىمەن تۇراقتى جۇمىس ىستەپ كەلە جاتقان «Beam.kz» كومپانياسى ساتۋ ءبولىمىنىڭ جەتەكشىسى داريا نۇرعاجىقىزى ستۋدەنتتەر مەن تۇلەكتەردى جۇمىسپەن قامتاماسىز ەتۋگە باعىتتالعان پلاتفورما جۇمىسىمەن تانىستىرىپ, ستۋدەنت جاستاردىڭ تاجىريبەسى بار-جوعىنا قاراماستان, ءبىرىنشى كەزەكتە ارنايى كۋرستار ۇيىمداستىرىلاتىنىن اتاپ ءوتتى. مۇنىمەن قوسا ءبىلىم الا ءجۇرىپ, جۇمىس ىستەۋىنە دە تەڭ مۇمكىندىكتەر قاراستىرىلعان. بۇگىندە ەڭبەك نارىعىندا مۇعالىم, دارىگەر, زاڭگەر ماماندىعىمەن قاتار ەكونوميكا, قارجى, IT سالاسىنا دا سۇرانىس جوعارى.
الماتى