اتىراۋ مۇناي وڭدەۋ زاۋىتىنىڭ بۋتەندەردى وليگومەريزاتسيالاۋ قوندىرعىسىنداعى بەنزين قۇبىرىنان اقاۋ شىقتى, دەپ حابارلايدى Egemen.kz.
زاۋىتتىڭ قوعاممەن بايلانىس بولىمىنەن ءمالىم ەتكەندەي, تەحنيكالىق اقاۋ 26 اقپاندا جەرگىلىكتى ۋاقىتپەن ساعات 18:30-دا انىقتالعان.
«اتالعان جەلى جىلىنا ءبىر رەت قوندىرعىنى ىسكە قوسۋ كەزىندە پايدالانىلادى. اقاۋعا بايلانىستى قۇبىردى بوساتىپ, جوندەۋ جۇمىستارىنا دايىنداۋ ماقساتىندا 10 مينۋتتا 15 كگك/تەكشە سم قىسىممەن تەحنيكالىق سۋ جىبەرىلدى. بۇل جاعداي ءوندىرىس ۇدەرىسىنە اسەر ەتپەيدى. قازىر تەحنولوگيالىق قوندىرعىلار شتاتتىق رەجيمدە جۇمىس ىستەپ تۇر. مۇناي ونىمدەرىن شىعارۋ مەن جونەلتۋ جۇمىستارى جوسپارعا ساي جۇرگىزىلىپ جاتىر», دەپ حابارلادى قوعاممەن بايلانىس ءبولىمى.