پرەزيدەنت قاسىم-جومارت توقاەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كەزەكتى وتىرىسى ءوتتى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
جيىن بارىسىندا ۇلتتىق قاۋىپسىزدىك ستراتەگياسىن جۇزەگە اسىرۋعا باعىتتالعان نەگىزگى ءادىس-تاسىلدەردى جانداندىرۋ ماسەلەلەرى قاراستىرىلدى. مەملەكەت باسشىسى الەمدە قالىپتاسقان كۇردەلى گەوساياسي احۋال جاعدايىندا تالقىلانىپ وتىرعان پروبلەماتيكا قازاقستاننىڭ ەكونوميكالىق جانە اسكەري الەۋەتىن نىعايتۋ تۇرعىسىنان زور مانگە يە ەكەنىن اتاپ ءوتتى.
بۇدان بولەك, پرەمەر-ءمينيستردىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ بايانداما جاسادى. سونىمەن قاتار بىرقاتار سالالىق مەملەكەتتىك ورگاننىڭ باسشىلارى مالىمەت بەردى.
قاسىم-جومارت توقاەۆ ۇلتتىق قاۋىپسىزدىككە قاۋىپ توندىرەتىن نەگىزگى سىن-قاتەرلەرگە وبەكتيۆتى تالداۋ جاساپ, ولاردىڭ الدىن الۋ شارالارىن ازىرلەۋ قاجەتتىگىن ايتتى.
پرەزيدەنت ازاماتتاردىڭ جانە تۇتاس مەملەكەتتىڭ قاۋىپسىزدىگى ۇكىمەت پەن بارلىق ۆەدومستۆو قىزمەتىنىڭ باسىم باعىتى رەتىندە ءاردايىم ەرەكشە نازاردا بولۋعا ءتيىس ەكەنىن اتاپ ءوتتى.
قاۋىپسىزدىك كەڭەسى وتىرىسىنىڭ قورىتىندىسى بويىنشا ۇلتتىق مۇددەنى قورعاۋ جانە ۇلتتىق قاۋىپسىزدىككە تونەتىن قاتەرلەردى باسقارۋ جۇيەسىنىڭ تيىمدىلىگىن ارتتىرۋعا باعىتتالعان بىرقاتار شەشىم قابىلداندى.