پرەمەر-ءمينيستردىڭ ءبىرىنشى ورىنباسارى رومان سكلياردىڭ توراعالىعىمەن ينۆەستيتسيالاردى تارتۋ جونىندەگى كەڭەستىڭ كەزەكتى وتىرىسى ءوتتى. وتىرىستا وڭىرلەردەگى ينۆەستورلارعا الەۋەتتى تارتىمدى سالالار تالقىلاندى.
سىرتقى ىستەر مينيسترلىگى مەن باس پروكۋراتۋرانىڭ ينۆەستوردىڭ اتقارۋشى بيلىك ورگاندارىمەن, قاداعالاۋ ورگاندارىمەن جانە ۇيىمدارمەن ءوزارا ءىس-قيمىلىنىڭ اشىقتىعىن ارتتىرۋ جانە وڭايلاتۋ جونىندەگى ۇسىنىستارى تىڭدالدى. مەملەكەت باسشىسىنىڭ تاپسىرمالارىن ورىنداۋ اياسىندا مۇددەلى مەملەكەتتىك ورگاندار مەن بيزنەس-قوعامداستىقتىڭ قاتىسۋىمەن «جاسىل ءدالىز» تەتىگى ازىرلەنىپ جاتىر.
سونىمەن قاتار باس پروكۋراتۋرا «استانا» حالىقارالىق قارجى ورتالىعى قاتىسۋشىلارىمەن ينۆەستيتسيالىق كەلىسىمشارت جاساسۋ بويىنشا بىرقاتار جۇيەلى ۇسىنىس ايتتى. اقمولا جانە اقتوبە وبلىسى اكىمدىكتەرى ينۆەستيتسيا تارتۋ جوسپارلارىن تانىستىردى.
جالپى, جوسپارلانعان جۇمىستاردىڭ تولىققاندى ىسكە اسىرىلۋىن قامتاماسىز ەتۋ تاپسىرىلدى. ينۆەستيتسيالاردى تارتۋ ءۇشىن وڭىرلەردىڭ, ونىڭ ىشىندە ونەركاسىپ, لوگيستيكا جانە اوك سالالارىنداعى ۇلكەن ينۆەستيتسيالىق الەۋەتى اتاپ ءوتىلدى.
سونداي-اق كەڭەستە جەر قويناۋىن پايدالانۋ جانە حيميا ونەركاسىبى سالاسىنداعى جەكەلەگەن ينۆەستيتسيالىق جوبالاردىڭ پروبلەمالىق ماسەلەلەرى قارالدى. تالقىلاۋ قورىتىندىسى بويىنشا جاۋاپتى مەملەكەتتىك ورگاندارعا تاپسىرمالار بەرىلدى.