اقتاۋداعى №13 گيمنازيانىڭ 11-سىنىپ وقۋشىسى ديليارا ساپار شانحايداعى نيۋ-يورك ۋنيۆەرسيتەتىنىڭ گرانتىن ۇتىپ الدى. وقۋ اقىسى – 208 000 دوللار.
«Times Higher Education University Rankings» زەرتتەۋىنشە نيۋ-يورك ۋنيۆەرسيتەتى الەمنىڭ ۇزدىك جوعارى وقۋ ورىندارى رەيتينگىندە 30-ورىندا تۇر. ۋنيۆەرسيتەت 19 ماماندىق بويىنشا ءبىلىم بەرەدى. تاپقىرلىعىمەن دارالانعان ديليارا بيزنەس جانە ەكونوميكا سالاسىن تاڭداپ وتىر. بۇل ۋنيۆەرسيتەتكە بيىل 50 مىڭعا جۋىق ۇمىتكەر قۇجات تاپسىرعان. ال باكالاۆر بويىنشا تەك 1 400 ستۋدەنت وقۋعا قابىلدانادى. ولاردىڭ جارتىسى قىتاي ەلىنەن بولسا, قالعان بولىگى اقش-تان. ال 70-كە جۋىعى وزگە ەلدەردەن كەلىپ وقيدى.
ۇزدىك اتتەستاتقا ۇمىتكەر قىزىمىز شەتەلدىك وقۋ وردالارىنىڭ ءبىلىم گرانتىنا ۇمىتكەر رەتىندە ءوز مۇمكىندىگىن سىناپ كورگىسى كەلگەن. ونىڭ كوكەيىندە 10-سىنىپقا دەيىن شەتەلگە ءتۇسۋ تۋرالى وي مۇلدەم بولماعان. بىراق جاس تالاپتاردى شەكارا سىرتىنا وقۋعا جىبەرەتىن كومپانيا اقش, گونكونگ, يتالياعا وقۋعا كەتىپ جاتقان قانشاما قازاق بالاسى تۋرالى ايتقاندا, ويى تۇبەگەيلى وزگەرگەن. سول ساتتەن باستاپ شەتەلگە بارىپ ءبىلىم الامىن دەگەن شەشىم قابىلدانىپ, ماقسات قويىلعان. ءسويتىپ, كومپانيانىڭ دايىندىق بارىسى تىم قىمبات بولعاننان كەيىن, ءوز بەتىنشە دايىندالۋدى ءجون كورگەن.
– ورتا مەكتەپ, قاراپايىم وتباسى الەمدىك وقۋ ورنىنا تۇسۋگە كەدەرگى ەمەس. ماقساتتى ايقىنداپ, ءوز ومىرىمىزگە ءوزىمىز جاۋاپتى ەكەنىمىزدى نەعۇرلىم ەرتە تۇسىنسەك, سوعۇرلىم وزىمىزگە جاقسى. ءبىزدىڭ بولاشاعىمىز – تەك ءبىزدىڭ تاڭداۋىمىز. نەگە ەكەنىن بىلمەيمىن, بىراق تەك امەريكالىق ۋنيۆەرسيتەتكە تۇسكىم كەلدى. باسقا ەلدەردى ءتىپتى قاراستىرعىم دا كەلمەدى. ماقساتقا قاراي جۇرەتىن دايىن جولدىڭ بولماۋىنان, وقۋعا ءتۇسۋ بارىسى ءبىراز قيىنعا ءتۇستى. سوندا دا مويىماي, بارلىعىن ءوزىم زەرتتەپ, مۇلدە بىلمەيتىن ۇدەرىسكە باسىمدى سۇقتىم. الەمدىك باقتالاستىق جوعارى بولعاندىقتان ءوزىمنىڭ وقۋعا تۋسۋ پايىزىم از ەكەندىگىن ىشتەي ءبىلىپ ءجۇردىم. سوندا دا ءۇمىتىم سونبەدى. اقپاننىڭ 16-سى تۇنگى ەكى جارىمدا جاۋابى پوشتاما كەلگەن ەكەن. مەن تاڭەرتەڭ 7.30-دا كوردىم. مەكتەپكە دايىندالىپ جاتقاندا نوۋتبۋگىمدى اشىپ پورتالعا كىرىپ قالىپ ەدىم, «سongratulations» دەگەن قۇتتىقتاۋ ءسوزىن كوردىم. سول كەزدەگى قۋانىشىمدى سوزبەن ايتىپ جەتكىزە المايمىن, – دەيدى تالاپتى قىزىمىز.
ديليارا كوپبالالى وتباسىدان شىققان. قاراپايىم ورتا مەكتەپتە وقيدى. ونىڭ اتا-اناسى ارقاشان بىلىمگە جەتەلەپ, قابىلەتتەرىن اشىپ وتىرعان. ءوزىنىڭ ايتۋىنشا, قىزدارىنىڭ ارماندارىنا ەشقاشان قارسى شىققان ەمەس. ءتىپتى شەتەلگە وقۋ ورنىنا تۇسەمىن دەگەنىندە دە بارىنشا قولداعان.
– ديلياراعا 8-سىنىپتان بەرى جەتەكشى بولىپ كەلەمىن. مەكتەپتىڭ قوعامدىق ومىرىنە بەلسەنە ارالاساتىن ونەرلى, تابيعاتىنان دارىندى وقۋشى. وزىنە بەرگەن تاپسىرمانى بۇلجىتپاي ءوز ۋاقىتىندا ورىنداپ, وتكىزىپ وتىرادى. سىنىپتى قوعامدىق جۇمىسقا قاتىسۋ جاعىنان ۇنەمى الدىعا تارتىپ, بارلىعىن ۇيىمداستىرادى. ازاماتتىق كوزقاراسى قالىپتاسقان, ءوڭىر جۇمىستارىنا بەلسەنە ارالاسادى. ديليارا – بارلىق پاننەن دە بىردەي قابىلەتتى, جان-جاقتى وقۋشى. بولاشاقتان كوپ ءۇمىت كۇتتىرەتىن جاستارىمىزدىڭ بىرەگەيى,– دەيدى سىنىپ جەتەكشىسى گۇلناز ورىنعاليقىزى.
بەلگىلى ءبىر باعىت-باعدار بولماسا بۇل – قيىن ءىس. قانشاما اۋىل بالاسى شەتەلدە وقۋدى بىلاي قويعاندا, ءوزىمىزدىڭ ۋنيۆەرسيتەتتەرگە وقۋعا ءتۇسۋدى «تار جول, تايعاق كەشۋ» كورەدى. ال ديليارانى اپپاق ارمانى العا جەتەلەي تۇسكەن. ول امەريكالىق ۋنيۆەرسيتەتتەرگە تۇسكەن قازاقتاردىڭ سۇحباتتارىن كورىپ, يۋتۋب كانالدارعا جازىلىپ, ولارمەن الەۋمەتتىك جەلى ارقىلى تانىسقان. قالاي دايىندالعاندارى تۋرالى ءجۇز شاقتى بەينەجازبا كورىپ, اقىل-كەڭەس العان. ەڭ الدىمەن ەمتيحاندارعا دايىندالىپ, قوعامدىق ومىردە بەلسەندى بولىپ, ءوزىن تۇلعا رەتىندە جاقسارتا باستاعان.
ءبىر قىزىعى, ول تەك وسى وقۋ ورنىنا ەمەس, تۇركيانىڭ ءۇش بەدەلدى ۋنيۆەرسيتەتتەرىنە دە قۇجات تاپسىرعان. الدىمىزداعى ناۋرىز ايىندا نازارباەۆ ۋنيۆەرسيتەتىنە دە تاپسىراتىن ويى بار. ءتىپتى «شەتەلگە وقۋعا ءتۇسۋ» سالاسىنداعى كومپانيالارعا جۇمىسقا تۇرىپ, جاس تالاپتارعا جول كورسەتپەكشى.