ءار بالانىڭ تاربيەلى, يناباتتى ءارى مەيىرىمدى بولىپ بوي تۇزەۋىنە وتباسىنداعى تاتۋلىقتىڭ ىقپالى زور. الايدا بالاسىنا ونەگە كورسەتۋدىڭ ورنىنا جىلى ۇياسىن ويرانداپ, ايەلىنە اڭگىر تاياعىن الا جۇگىرەتىندەر ازايماي وتىر.
اتىراۋ قالالىق پوليتسيا باسقارماسى ايەلدەردى زورلىق-زومبىلىقتان قورعاۋ توبىنىڭ ينسپەكتورى ايگەرىم وراقباەۆانىڭ بەرگەن مالىمەتىنە سۇيەنسەك, كەيىنگى ەكى جىلدا وتباسىندا زورلىق-زومبىلىققا قاتىستى 5 مىڭعا جۋىق قۇقىق بۇزۋشىلىق جاسالعانى انىقتالعان. ال ايەلدەرگە قارسى 15 قىلمىستىق ءىس تىركەلگەن.
«وتباسىنداعى زورلىق-زومبىلىق ازايماي وتىر. ماسەلەن, كەيىنگى ەكى جىلدا وبلىس ورتالىعىندا وسىنداي 5 مىڭعا جۋىق قۇقىق بۇزۋشىلىق انىقتالدى. وسىعان بايلانىستى 4 770 ادام اكىمشىلىك قۇقىق بۇزۋشىلىق تۋرالى كودەكسىنىڭ 73, 73-1 جانە 73-2-بابىمەن اكىمشىلىك جاۋاپكەرشىلىككە تارتىلدى. ونىڭ ىشىندە 3 145 ادامعا قورعاۋ نۇسقاماسى شىعارىلدى. ايەلدەرگە ءزابىر كورسەتۋگە قاتىستى 15 قىلمىستىق ءىس قوزعالدى. قورعاۋ نۇسقاماسىن ءبىر اي ىشىندە بۇزىپ, اگرەسسيالىق مىنەز-قۇلىق كورسەتكەن 196 ادام وسى زاڭنىڭ 461-بابىنا سايكەس جازالاندى», دەدى ءا.وراقباەۆا.
جەرگىلىكتى پوليتسيا قىزمەتى باسقارماسى ايەلدەردى زورلىق-زومبىلىقتان قورعاۋ توبىنىڭ ەرەكشە تاپسىرمالار جونىندەگى اعا ينسپەكتورى, پوليتسيا مايورى رايسا ايتجانوۆانىڭ ايتۋىنشا, تۇرمىستىق زورلىق-زومبىلىق كورسەتۋدىڭ بىرنەشە سەبەبى انىقتالىپ وتىر. بىرىنشىدەن, بۇعان ماسكۇنەمدىك اسەر ەتەدى. ەكىنشىدەن, قىزعانىشتىڭ سوڭى كيكىلجىڭگە, ءتىپتى زورلىق-زومبىلىققا ۇلاسادى. ۇشىنشىدەن, جۇمىسسىزدىقتىڭ سالدارىنان ەرلى- زايىپتىلار اراسىندا ارازدىق تۋىندايدى.
«بيىل قاڭتار ايىندا پوليتسياعا تۇرمىستىق زورلىق-زومبىلىققا ۇشىراۋعا بايلانىستى 399 شاعىم ءتۇستى. وسپادار وتاعاسىنىڭ زاڭعا قايشى ارەكەتىنىڭ كەسىرىنەن 15 ادام داعدارىس ورتالىعىنا ورنالاستىرىلدى. ونىڭ ىشىندە 4 ايەل, 11 بالا بار. ال 272 ادام اكىمشىلىك قۇقىق بۇزۋشىلىق تۋرالى كودەكسىنىڭ 73-بابىمەن (وتباسى-تۇرمىستىق قاتىناستار اياسىنداعى قۇقىققا قارسى ارەكەتتەر) جاۋاپكەرشىلىككە تارتىلدى. بۇلاردان وزگە 290 ادامعا قاتىستى ءبىر اي مەرزىمگە قورعاۋ نۇسقاماسى شىعارىلعان ەدى. بىراق سول كەزەڭدە ەرسى مىنەز-قۇلقىن كورسەتىپ, قورعاۋ نۇسقاماسىن بۇزعان 19 ادام جازالاندى. ماجبۇرلەپ ەمدەۋ مەكەمەسىنە 3 ادام جىبەرىلدى», دەيدى ر.ايتجانوۆا.
ونىڭ ايتۋىنا قاراعاندا, اتىراۋ قالاسىندا داعدارىس ورتالىعى, جىلىوي مەن قۇرمانعازى اۋدانىندا ارنايى كابينەت اشىلعان. ماقسات – وتباسىندا زورلىق-زومبىلىققا ۇشىراعان ايەلدەرگە قولداۋ كورسەتۋ.
«جۋان جۇدىرىعىن الا جۇگىرەتىن كۇيەۋىنەن ءزابىر كورگەن ايەلدەر نەمەسە وسىنداي وقيعاعا كۋا بولعاندار ىشكى ىستەر ورگانىنا ارىزبەن جۇگىنۋى قاجەت. پوليتسيا قىزمەتكەرلەرى جابىرلەنۋشىلەرگە قۇقىقتىق كەڭەس, پسيحولوگيالىق كومەك كورسەتەدى. جابىرلەنۋشىلەردى اپەرباقان كۇيەۋدەن قورعاۋ ءۇشىن جەكە پروفيلاكتيكالىق شارالاردى قولعا الىپ, داعدارىس ورتالىعىنا باعىتتايدى», دەپ ءتۇسىندىردى ر.ايتجانوۆا.
اتىراۋ وبلىسى