كەشە ءماجىلىستىڭ پلەنارلىق وتىرىسىندا ايەلدەردىڭ قۇقىقتارىن جانە بالالاردىڭ قاۋىپسىزدىگىن قامتاماسىز ەتۋگە قاتىستى زاڭ جوباسى ءبىرىنشى وقىلىمدا قابىلداندى. قۇجاتتا تۇرمىستىق زورلىق-زومبىلىق ماسەلەلەرىن شەشۋدىڭ جان-جاقتى تاسىلدەرى قاراستىرىلعان.
زاڭ جوباسى پرەزيدەنتتىڭ بىلتىر كۇزدە جاريالاعان جولداۋىن جۇزەگە اسىرۋ اياسىندا ازىرلەندى. جالپى, وسى جوباعا سايكەس ءتۇرلى زاڭ اكتىلەرىنە 70 تۇزەتۋ ەنگىزۋ كوزدەلىپ وتىر. سونىڭ ىشىندە, وتباسىلارعا كومەك كورسەتۋ ينفراقۇرىلىمىن قالىپتاستىرۋعا باعىتتالعان وزگەرىستەردى, سونداي-اق تۇرمىس سالاسىنداعى قىلمىستار جانە بالالارعا قارسى جاسالعان زورلىق-زومبىلىقتىڭ بارلىق ءتۇرى ءۇشىن جازانى كۇشەيتۋدى اتاپ وتۋگە بولادى. ماسەلەن, ادامدى ۇرىپ-سوققانى, دەنساۋلىققا جەڭىل, اۋىرلىعى ورتاشا جانە اۋىر زيان كەلتىرگەنى, ازاپتاپ-قيناعانى ءۇشىن قىلمىستىق جاۋاپكەرشىلىك ەنگىزىلدى جانە كۇشەيتىلدى. بۇدان بولەك, تۇرمىستىق زورلىق-زومبىلىق فاكتىلەرىن انىقتاۋعا جانە الدىن الۋعا باعىتتالعان بىرقاتار شارا كوزدەلگەن. زاڭ جوباسىن دەپۋتاتتار مەملەكەتتىك ورگاندارى, ساراپشىلار قاۋىمداستىعى جانە قوعامدىق ۇيىمدارمەن بىرلەسىپ ازىرلەدى. بۇل قۇجاتتى دايىنداۋعا بالا قۇقىقتارى جونىندەگى ۋاكىل دينارا زاكيەۆا بەلسەنە اتسالىستى.
ەرلان قارين,
مەملەكەتتىك كەڭەسشى