اكادەميك ە.بوكەتوۆ اتىنداعى قاراعاندى ۋنيۆەرسيتەتى قالامىزداعى رۋحاني ورتالىققا اينالىپ كەلەدى. جاقىندا ۇلتتىق رۋحتىڭ لەبى ەسكەن تاعى ءبىر تاماشا ءىس-شارا وسىندا ءوتتى.
بۇل جولى الاشتىڭ ءۇش بايتەرەگى – ساكەن سەيفۋلليننىڭ, ءىلياس جانسۇگىروۆتىڭ, بەيىمبەت ءمايليننىڭ 130 جىلدىعىنا جانە حالىقارالىق كىتاپ سىيلاۋ كۇنىنە وراي ء«بىر كىتاپ – ءبىر الەم» اتتى كىتاپ سىيلاۋ جارمەڭكەسى جاراسىم تاپتى. بۇعان ستۋدەنتتەر مەن ۋنيۆەرسيتەت وقىتۋشىلارىنان بولەك, زيالى قاۋىم وكىلدەرى قاتىستى.
ۋنيۆەرسيتەت ستۋدەنتتەرىنىڭ اراسىندا «kitap – qazyna» اتتى كىتاپ وقۋ بايقاۋى ءوتىپتى. مەرەكەلىك ءىس-شارا باستالماس بۇرىن, بايقاۋدىڭ جەڭىمپازدارى سالتاناتتى تۇردە ماراپاتتالدى. جۇلدەگەرلەرگە اقشالاي سەرتيفيكات تاپسىرىلدى.
ۇيىمداستىرۋشىلار كىتاپ سىيلاۋ اكتسياسىن ەرەكشە فورماتتا وتكىزدى. ورتاعا قويىلعان ەكى ۇستەلدىڭ بىرەۋىنە – ستۋدەنتتەردىڭ, ەكىنشىسىنە – قالامگەرلەردىڭ, عالىمداردىڭ جانە باسقا دا ارنايى شاقىرىلعان قوناقتاردىڭ ەسىمى جازىلعان پاراقتاردى قاز قاتار قويعان. كوشتى ۋنيۆەرسيتەتتىڭ باسقارما توراعاسى نۇرلان دۋلاتبەكوۆ باستادى. ول ءوز كىتابىن ءبىر ستۋدەنتكە تارتۋ ەتىپ, جىلى لەبىزىن دە ءبىلدىردى.
– كىتاپ – دۇنيەدەگى عاجاپتاردىڭ قاتارىنا ەنىپ تۇرعانى ءسوزسىز. قاي ۋاقىتتا دا سولاي بولعان جانە بولا دا بەرمەك. ادامزات قوعامى ىزگىلىككە جەتۋى ءۇشىن كىتاپ وقۋعا ءتيىس. وقۋدان اجىراعان كۇنى ءبىز كەرى كەتەمىز. كىتاپ سىيلاۋ – بۇل جاس ۇرپاقتىڭ كەلەشەگى ءۇشىن جاسالاتىن ەڭ ۇلكەن جاقسىلىقتىڭ, قايىرىمدىلىقتىڭ ءبىرى. ۋنيۆەرسيتەتىمىزدە مۇنداي شارا وسىمەن ەكىنشى رەت ۇيىمداستىرىلىپ وتىر. ءارى قاراي دا جالعاسىن تابادى دەپ سەنىممەن ايتامىن. ماقساتى – ءبىلىم الەمىنىڭ تەرەڭىنە بويلاۋ. «كىتاپ – ءبىلىم بۇلاعى» دەيدى. ستۋدەنتتەرىمىز كىتاپ وقىسا, ءبىز ءۇشىن سول ۇلكەن قۋانىش, – دەدى ن.دۋلاتبەكوۆ.
ستۋدەنت ءوزىنىڭ كەزەگىندە كىتابىن قۇرمەتتى قوناقتاردىڭ بىرىنە بەردى. سولاي جالعاسىپ كەتتى. تىزىمدە «عاسىر ادامى» تەمىرعالي كوكەتاەۆ تا بار.
– مىڭجىلدىقتارعا سوزىلعان ادامزات كوشىنىڭ بىلگەن, تۇيگەنى – وسى كىتاپتا. «ادامزات بالاسىنىڭ نەگىزگى مۇراتى – وزىنەن كەيىن مۇرا قالدىرۋ» دەپ ەدى ءبىر ويشىل. ءبىلىمدى بولعىڭ كەلسە, پاراساتتى, پايىمدى بولعىڭ كەلسە – كىتاپ وقۋ كەرەك. قازىر ءبىزدىڭ مەملەكەتكە سانالى, اقىلدى جاستار اۋاداي قاجەت. ۋنيۆەرسيتەت باسشىلىعىنا وسىنداي تاعىلىمدى شارانى ۇيىمداستىرعانى ءۇشىن زور العىسىمدى بىلدىرەمىن, – دەپ العىسىن جاۋدىردى «عاسىر ادامى».
اباي اتىنداعى مەملەكەتتىك سىيلىقتىڭ لاۋرەاتى, اقىن سەرىك اقسۇڭقار ۇلى ولەڭ وقىدى.
جارمەڭكە سوڭىندا ۋنيۆەرسيتەت ستۋدەنتتەرى قۇرعان «شاتتىق» اۋەسقويلار تەاترى ء«بىر ءتۇپ الما اعاشى» قويىلىمىن ساحنالادى.
قاراعاندى وبلىسى