جۋىردا نيۋ-يوركتەگى بۇۇ شتاب-پاتەرىندە گولان جوتالارىنداعى بولىنگەن جەرلەردى «بۇۇ-نىڭ باقىلاۋ كۇشتەرى» (SONNR) ميسسياسىنا بىتىمگەرلىك كونتينگەنتتى جىبەرۋ ءۇشىن قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمى اراسىندا ءوزارا تۇسىنىستىك تۋرالى مەموراندۋمعا قول قويىلدى.
وسىلايشا, بىرىككەن ۇلتتار ۇيىمى ەلىمىزگە بىتىمگەرلىك ميسسيانى ءوز بەتىنشە جىبەرۋگە جانە ورىنداۋعا العاش رەت ماندات بەرىپ وتىر. قازاقستان كونتينگەنتىنىڭ قۇرامىندا 139 اسكەري قىزمەتشى بار. ءبىزدىڭ بىتىمگەرلەر بۇۇ ميسسياسىنىڭ مانداتىنا سايكەس قارسىلاس تاراپتار اراسىندا اتىستى توقتاتۋ رەجىمىن ساقتاۋ مىندەتتەرىن ورىندايتىن بولادى.
ميسسيانى ورىنداۋ ءۇشىن اسكەري قىزمەتشىلەرىمىز بۇۇ تالاپتارى مەن ستاندارتتارىنا سايكەس مۇقيات ىرىكتەۋدەن جانە دايارلىقتان ءوتتى. كەشەندى التى ايلىق دايىندىق قورعانىس مينيسترلىگىنىڭ بىتىمگەرلىك وپەراتسيالار ورتالىعىندا ۇيىمداستىرىلدى. ولاردى وقىتۋعا بىتىمگەرلىك وپەراتسيالار, مينادان تازارتۋ جانە اسكەري مەديتسينا ورتالىقتارىنىڭ نۇسقاۋشىلار قۇرامى قاتىستى.
اسكەري قىزمەتشىلەر اعىلشىن ءتىلىن, كۇش قولدانۋ ەرەجەلەرىن, حالىقارالىق جانە گۋمانيتارلىق قۇقىق نورمالارىن وقىدى. بىتىمگەرلىك بازانى قورعاۋ, توسقاۋىل بەكەتتەرىن ۇيىمداستىرۋ, پاترۋلدەۋ, جارىلعىش قۇرىلعىلاردى زالالسىزداندىرۋ, كومەك كورسەتۋ جانە ەۆاكۋاتسيالاۋ بويىنشا مىندەتتەردى ءىس جۇزىندە پىسىقتادى.
تاجىريبەلىك داعدىلاردى جانە كونتينگەنت شتابىنىڭ وفيتسەرلەرىمەن جەدەل ۇيلەسىمدىلىكتى ارتتىرۋ ءۇشىن جەدەل-تاكتيكالىق دەڭگەيدە اسكەري شەشىمدەر قابىلداۋ ساباقتارى ءوتتى. ساراپشىلاردىڭ باعالاۋىنشا, كونتينگەنت جەكە قۇرامى جوعارى دايىندىق دەڭگەيىن كورسەتىپ وتىر.
قورعانىس مينيسترلىگى ميسسيانى بۇۇ-نىڭ ستاندارتتارىنا سايكەس قارۋ-جاراق پەن اسكەري تەحنيكانىڭ زاماناۋي ۇلگىلەرىمەن جان-جاقتى قامتاماسىز ەتۋ جونىندە اۋقىمدى ءىس-شارالار كەشەنىن جۇزەگە اسىردى. كونتينگەنتتە جاۋىنگەرلىك مودۋلدەرمەن جابدىقتالعان بروندالعان دوڭگەلەكتى ماشينالار, سونداي-اق كۇندەلىكتى تىرشىلىككە قاجەتتى جابدىقتار بار. ولاردى قامتاماسىز ەتۋگە جۇك كولىكتەرى, جول تالعامايتىن اۆتوكولىكتەر جانە ينجەنەرلىك قۇرال-جابدىق جەتكىلىكتى. جارالىلاردى ەۆاكۋاتسيالاۋعا بەرىلگەن ماشينالاردىڭ ءبىرى وتتەگى اپپاراتىمەن, دەفيبريللياتورمەن, ءدارى-دارمەكتەرمەن جانە باسقا دا مەديتسينالىق جابدىقتارمەن قامتاماسىز ەتىلگەن.
ميسسيانى اتقارۋ كەزىندە بىتىمگەرلىك كونتينگەنتىنىڭ اسكەري قىزمەتشىلەرىنە اي سايىنعى جالاقىسى ءۇش ەسە تولەنەدى. بۇعان قوسا, بۇۇ بيۋدجەتىنەن ولار اي سايىن 1448 دوللاردان اسا قاراجات الادى. قىزمەت اياقتالعاننان كەيىن اسكەري قىزمەتشىلەر شيپاجايلاردا ەمدەلە الادى, نەگىزگى دەمالىسقا جىل سايىن قوسىمشا 14 تاۋلىك قوسىلادى.
تۇتاستاي العاندا, ەلىمىزدىڭ قارۋلى كۇشتەرى بىتىمگەرلىك ميسسيالارعا اسكەري باقىلاۋشىلار مەن شتاب وفيتسەرلەرى رەتىندە جەكەلەگەن اسكەري قىزمەتشىلەردى دە, سونداي-اق جاياۋ اسكەر, مەديتسينالىق, بارلاۋ سياقتى نەعۇرلىم قاجەتتى مامانداندىرىلعان بولىمشەلەردى دە جىبەرۋگە دايىن.
ايتا كەتسەك, كەيىنگى ون التى جىل ىشىندە 600-دەن استام اسكەري قىزمەتشىمىز بۇۇ-نىڭ ازيا, تاياۋ شىعىس جانە افريكا ەلدەرىندەگى جەتى بىتىمگەرلىك ميسسياسىنا قاتىسقان. قازىرگى تاڭدا 19 جاۋىنگەرىمىز بۇۇ-نىڭ ليۆان رەسپۋبليكاسىنداعى, باتىس ساحاراداعى, كونگو دەموكراتيالىق رەسپۋبليكاسىنداعى جانە ورتالىق افريكا رەسپۋبليكاسىنداعى بىتىمگەرلىك ميسسيالارىنىڭ قۇرامىندا قىزمەت ەتىپ ءجۇر.