ءماجىلىستىڭ جالپى وتىرىسىندا دەپۋتاتتار ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا زاڭ جوباسى مەن اكىمشىلىك قۇقىق بۇزۋشىلىق تۋرالى كودەكسكە ەنگىزىلەتىن ىلەسپە تۇزەتۋلەردى قارادى. دەپۋتات ەلنۇر بەيسەنباەۆ بۇدان بىلاي تۇرمىستىق زورلىق-زومبىلىق جاساۋ فاكتىسى بويىنشا اكىمشىلىك جاۋاپكەرشىلىككە تارتۋ ەمەس, قىلمىستىق كودەكس بويىنشا جازا قولدانىلاتىنىن ەسكەرتتى, دەپ جازادى Egemen.kz.
«بۇل ماسەلەنىڭ قوعامدىق ءمانى زور. مەملەكەت باسشىسى قاسىم-جومارت توقاەۆتىڭ ەرەكشە باقىلاۋىندا. وسىعان وراي ايەلدەر مەن بالالاردىڭ قۇقىعىن قورعاۋ ماسەلەسىن پرەزيدەنت 2019 جىلدان بەرى ءار جولداۋىندا تۇراقتى كوتەرىپ كەلەدى. پرەزيدەنتتىڭ نەگىزگى ۇستانىمى – قوعامدا زاڭ ۇستەمدىگىن ورناتۋ, زاڭعا مۇلتىكسىز باعىناتىن ادىلەتتى قوعام قۇرۋ.
وسى رەتتە قوعامدا بالالارعا قارسى اۋىر قىلمىستار مەن زورلاۋ ماسەلەسى ەرەكشە الاڭداتىپ وتىر. سوندىقتان مەملەكەت باسشىسى مۇنداي قىلمىستار ءۇشىن جازانى قاتاڭداتىپ, قىلمىسقا باراتىنداردى بارىنشا وقشاۋ ۇستاۋدى تاپسىردى. ەندى جاڭا زاڭ بويىنشا پەدوفيلدەر تۇرمەدەن ەشقاشان شىعا المايدى. سونىمەن قاتار وتەلمەگەن جاڭا مەرزىمى دە قىسقارتىلمايدى, راقىمشىلىققا ىلىكپەيدى.
بالالارعا قارسى جاسالعان اياۋسىز, اۋىر قىلمىستار بويىنشا بىتىمگەرشىلىك قاراستىرىلمايدى. تۇرمىستىق زورلىق-زومبىلىق تا وزەكتى بولىپ وتىر. ستاتيستيكاعا سۇيەنسەك, ايەلدەر مەن بالالار زورلىق-زومبىلىققا ءجيى ۇشىرايدى. جىل سايىن تۇرمىستىق زورلىق-زومبىلىقتان 100-دەن استام ادام كوز جۇمادى. بۇل ماسەلە دە پرەزيدەنتتىڭ باقىلاۋىندا. وتكەن جىلى ۇرىپ-سوعۋدان كوز جۇمعان س.نۇكەنوۆانىڭ قازاسى قوعامدا رەزونانس تۋعىزدى. وسىنداي قىلمىسقا جازانى قاتاڭداتۋدى قولداپ وتكىزگەن ونلاين پەتيتسياعا 150 مىڭ ادام قول قويعان.
قاسىم-جومارت كەمەل ۇلى قاڭتار ايىندا «Egemen Qazaqstan» گازەتىنە بەرگەن سۇحباتىندا وسى پەتيتسيانى قولداپ, ەل ازاماتتارىنىڭ پىكىرى ەسكەرىلەتىنىن ايتتى. سونىڭ نەگىزىندە زاڭ قاتاڭداتىلدى. ەندى ۇرىپ-سوعۋ مەن دەنساۋلىققا جەڭىل زيان كەلتىرۋ قىلمىس ءتۇرى اكىمشىلىك كودەكستەن قىلمىستىق كودەكسكە اۋىستىرىلادى. بۇدان بىلاي ۇرىپ-سوعۋدىڭ جەڭىل ءتۇرى بولسا دا قىلمىسكەر قىلمىستىق كودەكس بويىنشا جازالانادى. سونداي-اق ازاپتاۋ بويىنشا جاڭا باپ قولدانىسقا ەنىپ, 3 جىلعا دەيىن باس بوستاندىعىنان ايىرۋ جازاسى قاراستىرىلعان.
بۇل ماسەلەنى بالالار قۇقىعى جونىندەگى ۋاكىل دينارا زاكيەۆامەن جۇيەلى پىسىقتاپ, ۇكىمەتتىك ەمەس ۇيىمدار وكىلدەرىنىڭ قاتىسۋىمەن ءماجىلىس فراكتسياسىنىڭ وتىرىسىندا جان-جاقتى قاراستىردى», دەدى دەپۋتات.
ە.بەيسەنباەۆ بۇل زاڭ حالىقارالىق تاجىريبەدە, تمد ەلدەرىمەن سالىستىرعاندا ەڭ قاتاڭ نورما بولىپ سانالاتىنىن ايتتى. زاڭ جوباسى مەملەكەت باسشىسى مەن قوعامنىڭ ورتاق كەلىسىمى بويىنشا قابىلدانعانىن دا ەسكەرتتى.