كادرلىق رەزەرۆ – قابىلەتتى رەسۋرس

جوبا جۇزەگە اسا باستاعاننان بەرى ماڭىزدى قىزمەتتەردەگى جاستاردىڭ ۇلەسى ارتتى. بۇل ءۇردىس الداعى ۋاقىتتا مەملە­كەتتىك باسقارۋ جۇيەسىنە جاڭا تاسىل­دەردىڭ ەنگىزىلۋىنە, جاڭاشا كوزقاراستاردىڭ پايدا بولۋىنا, ينوۆاتسيالىق وزگەرىستەردىڭ ورىن الۋىنا اسەرىن تيگىزۋى كەرەك.

قازىرگى ۋاقىتتا كادرلىق رەزەرۆ قاتارىندا بولىپ, ءوز جوبالارىن جۇزەگە اسىرىپ, ناتيجەلى ەڭبەگىمەن كوزگە ءتۇسىپ جۇرگەندەر بار. ولاردىڭ ىشىنەن ەرەكشە ينۆەستورلاردىڭ تارگەتتەلگەن الگوريتمىن جاساعان لەيلا گيمرانوۆا, پايدالى قازبا­لار قورى جونىندەگى مەم­لەكەت­تىك كوميسسيانى رەفورمالاۋ ما­سەلەسىن كوتەرىپ جۇرگەن «ۇلتتىق گەولوگيالىق قىزمەت» اق باسقارما توراعاسى ەرلان عاليەۆ, «2024 جىلى ساياحاتتاۋعا ارنالعان 52 ەل» رەيتينگىندە قازاقستاندى 25-ورىنعا قويعان, ەڭ ءىرى حالىقارالىق باق – «New York Times»-تىڭ ايتۋلى تۋريستىك رەيتينگىنە ەنۋگە قول جەتكىزگەن شىرىن مۋسينا, ەلىمىزدە سمارتبوردتار جەلىسىنىڭ پايدا بولۋىنا ۇلەسىن تيگىزگەن راۋل ليند, عىلىمي-ساراپتامالىق زەرتتەۋلەر جۇرگىزىپ جۇرگەن «قازاقستاندىق قوعامدىق دامۋ ينستيتۋتى» كەاق باسقارما توراعاسىنىڭ ورىنباسارى ولجاس بەيسەنباەۆتى اتاپ وتۋگە بولادى.

رەزەرۆتەگى جاس مامانداردىڭ 70 پايىزى جاۋاپتى لاۋازىم­دارعا تاعايىن­دال­عا­نىن, باسقا رەزەرۆيستەردىڭ كۆازيمەم­لەكەتتىك جانە كاسىپكەرلىك سالادا ەكەنىن ەسكەرسەك, ەلدەگى كادر تاپشىلىعى ماسەلەسىن شەشۋگە اسەرىن تيگىزەتىنى ءcوزسىز.

پرەزيدەنتتىك جاستار كادرلىق رەزەرۆكە ىرىكتەۋ بىرنەشە كەزەڭنەن تۇرادى. اتاپ ايتقاندا, كانديدات مەملەكەتتىك ءتىلدى B1-دەن تومەن ەمەس دەڭگەيدە مەڭگەرۋى, سونىمەن بىرگە جۇمىس ءوتىلى 5 جىلدان كەم بولماۋى شارت. سونىمەن بىرگە ىرىكتەۋ كەزەڭدەرىندە ۇمىتكەردىڭ ماتىندىك جانە تسيفرلىق اقپاراتپەن جۇمىس ىستەۋ, سيتۋاتسيالىق تاپسىرمالاردى شەشۋ قابىلەتى جانە قۇزىرەتتىلىگى باعالانادى. وسىعان وراي كادر رەزەرۆىنىڭ مۇشەلەرى مەريتوكراتيا قاعيداتىن تولىق ىسكە اسىرۋ ءۇشىن قاتاڭ ىرىكتەۋدەن وتەدى. ياعني باسشىلىق لاۋازىمداردى ولاردىڭ الەۋمەتتىك تەگى مەن ماتەريالدىق جاعدايىنا قاراماستان, بارىنشا قابىلەتتى ادامدار يەلەنۋگە ءتيىس.

دۋلات وتەعالي,

پرەزيدەنت جانىنداعى قسزي باس ساراپشىسى