ونەردە جۇرگەن ەكى ادامنىڭ ءبىرىن-ءبىرى قاپىسىز تاۋىپ, وتاۋ قۇرىپ, جان دۇنيەسىن دە, ماحابباتىن دا شىعارماشىلىق دانەكەرلەپ تاستاعانداي, شاڭىراعى بولىنبەي, ءبۇتىن كۇيىندە ەل قىزىعاتىن تانىمال وتباسىنا اينالۋى سيرەك بۇيىراتىن تاعدىر سىيى. تاستى قاشاپ, ءتىل ءبىتىرىپ, تاريحي مارعاسقالاردى تۇعىرىنا قوندىرعان ءمۇسىنشى مەن تەاترعا كەلگەن كورەرمەنگە كۇيبەڭ تىرلىكتى ۇمىتتىرىپ, ىزگىلىك الەمىنە جەتەلەيتىن اكتريسانىڭ ءبىر شاڭىراق استىندا باس قۇراۋى ونەر ولكەسىنىڭ جارىسىپ قاتار اققان قوس بۇرىم وزەنىندەي تىم جاراسىمدى قابىلدانادى. شىعارماشىلىقتىڭ جالعىزدىعى مەن ازابىنا شىداپ, شىبىق كەزىنەن وسى ورتادا شىنىعىپ وسكەن ەكەۋىنىڭ ماحابباتى مەن وتباسىلىق ءومىرى ونەردىڭ قارا قازانىندا قىرىق جىل بويى شىمىرلاپ بىرگە قاينادى. «ەكى قوشقاردىڭ باسى...» دەگەن قازاقى ءتامسىل تالانتتى ەكى جاسقا كەلگەندە ءجۇزى كەتىلىپ جۇرمەدى, كەرىسىنشە, شىڭىلتىر ايازدا جۇرەگىنىڭ شوعىمەن جىلىتىپ, شىلىڭگىر ىستىقتا شىنار تالدىڭ ساياسى بولىپ, ءبىرىن-ءبىرى ايالاپ, بيىككە بىرگە سامعادى.
قازاقستاننىڭ ەڭبەك سىڭىرگەن قايراتكەرى, مەملەكەتتىك سىيلىقتىڭ لاۋرەاتى, ءمۇسىنشى باقىتجان ابىشەۆ پەن م.اۋەزوۆ اتىنداعى ۇلتتىق تەاتردىڭ بەلدى اكتريساسى, قازاقستاننىڭ ەڭبەك سىڭىرگەن ءارتىسى شامشاگۇل مەڭدياروۆانىڭ وتباسىلىق وداعى ەرتەگىدەگىدەي باقىت اڭساعان جالاڭ ماحابباتقا عانا سۇيەنگەن جوق. ونەردىڭ ءوز وكىلدەرى بولعاندىقتان بار ۋاقىتىن شىعارماشىلىقتىڭ شىرايىن اشاتىن كوركەم ىزدەنىستەرگە جۇمسادى, تاپسا قۋاندى, ۋىستان شىعارىپ السا, ۋىتىن بويعا دارىتپاي, جىگەرىن جانىپ, ءبىر-بىرىنە دەم بەردى. تار جەردە تايانىش, جىڭىشكە تۇستا سۇيەۋ بولىپ, ءتىلسىز تۇسىنىسكەن ادالدىقتان التىن ۇيا بەرىك ءارى ۇزاق ساقتالدى. ءوزارا قۇرمەتى جىلدارمەن بىرگە ورىستەگەن ونەرلى جۇپتىڭ اعايىن-تۋىسپەن باۋىرمالدىعى, دوس-جارانمەن كەڭقولتىق سىيلاستىعى ەرەكشە بولىپ قالىپتاستى. ءسويتىپ ءجۇرىپ, ونەردەن ءبىر كۇن قول ۇزبەي ۇزدىكسىز قىزمەت ەتتى, جۇمىسقا كەلگەندە تىرشىلىكتىڭ ۇساق-تۇيەك سەبەبىن كولدەنەڭ تارتپادى, الايدا وتباسى باقىتىن بارىنەن جوعارى قويدى. ەرلى-زايىپتىنىڭ اراسىنداعى جىبەكتەي تازا جاراسىم باقىتجان باسيەسى اقىرەتتىك ساپارعا اتتانعانعا دەيىن وسىلاي جالعاسىپ جاتتى...
سودان بەرى «باكە» دەپ باستالاتىن شامشاگۇل اپانىڭ اڭگىمەسى ەرىنە تابىنعان ايەلدىڭ ەلجىرەگەن كوڭىلىنەن بىردە مۇڭ بولىپ توگىلىپ, بىردە سىر بولىپ شەرتىلىپ, قاي كەزدە دە مازمۇندى ورىلەدى. ونەردىڭ ءيسى مۇرنىنا بارمايتىن شەنەۋنىكتەردىڭ مۇسىنشىلەر مەن سۋرەتشىلەردىڭ جوباسىن ساراپتاپ, باعالاۋعا كەلگەندە ادىلەتسىزدىك تانىتاتىنىنا كۇيىنەدى, ولاردىڭ ماسەلەسىن شەشپەگەن كۇيى جىلى جاۋىپ, جوعارىعا ورلەپ كەتەتىن ورەسى تومەندەردىڭ جانى اشىماس جاۋ تىرلىگىنە قامىعادى. مۇندايدا ول جارقىراعان ساحنا ءۇشىن جارالعان اكتريسا ەمەس, ءومىر بويى سۋرەت سالىپ, ەكى الاقانى بالشىق يلەۋدەن بوساماعان كانىگى ءمۇسىنشى سياقتى, ءمۇسىن ونەرىنىڭ كونە زاماننان بەرگى تاريح-تامىرىنا بويلاپ, قيا-جىقپىلىن ارالاپ, بۇگىنگى جاعدايىن بەس ساۋساعىنداي ءبىلىپ, احۋالىنا الاڭدايتىن ساراپشىعا اينالادى. ەرىنىڭ جانىندا ءجۇرىپ, ەڭبەگىن قادىرلەپ, ول جاقسى كورگەندى جاقىن تۇتىپ, وعان جاعىمسىز بولعاننان باس تارتىپ, ءبىر باعىتقا قاراپ, ءبىر ادامعا اينالىپ كەتۋ دەگەن بالكىم, وسى بولار.
ءمۇسىن – «ادام جاسادى, ادامنىڭ قيالىنان تۋدى» دەگەنگە سەندىرە قويمايتىن اسقاق ونەر. ادام مۇمكىندىگىنەن الدەقايدا اسىپ تۇسەتىن ەڭ شىرقاۋ كوركەم بيىكتى جىرلايدى. انتيكالىق ەللين ەلىنەن, قايتا ورلەۋ داۋىرىندەگى ريمنەن, كونە مىسىردان جەتكەن جادىگەرلەر, باروككو ءستيلى مەن كلاسسيتسيزم جانرىندا تۋعان ءىنجىل كەيىپكەرلەرى – سانسىز قۇدايلاردىڭ, پەرىشتەلەردىڭ داۋسى جاڭعىرىپ, اڭ مەن قۇستىڭ قاناتىنىڭ سۋسىلى ەستىلەتىن اشىق اسپان استىنداعى ءمۇسىن مۋزەيى بۇگىنگى ەۋروپا ەلدەرىنىڭ سالتاناتىن اسىرىپ, ەستەتيكالىق ايبىنىن ارتتىرىپ تۇر ەمەس پە؟ الماتى كوشەسىندە ابايدى اسقاقتاتقان حاكىمجان ناۋرىزباەۆتان كەيىنگى وكشە باسار تالانتتى بۋىنمەن بىرگە كەلگەن باقىتجان ابىشەۆ وسى ونەردىڭ وزەنىنە جەلكەنىن سالعاننان باستاپ تۇركى تاقىرىبىن تولعاۋدى اسىل مۇراتىنا اينالدىردى. قالاي ايتساق تا, قازاق توپىراعىندا بەرتىندە عانا دامىعان ءمۇسىن ونەرىندە تۇركىلىك سارىن باسىم. تۇركى تاقىرىبىنىڭ باستى تەمىرقازىعى – جىلقى. جىلقى – كيە. قازاق ءۇشىن قاسيەتتى جانۋار. ارعىماقتار ەسىن الىپ, كۇنى-ءتۇنى تولعانىسقا ءتۇسىپ, كىلتىن تابا الماي الاسۇرعاندا, سانا تۇكپىرىندە كوشپەلى ومىردەن ورنىعىپ قالعان جىلقىنىڭ وسقىرىنعان, كىسىنەگەن داۋىسى قۇلاعىنا كەلگەندەي, شىرت ۇيقىدا جاتقان جەرىنەن شوشىپ ويانعان كۇندەرى دە كوپ بولعان. قاراڭعى ءتۇندى ءتۇرىپ كەلگەن شابىت ۇستىندە قارىنداشىن قولىنا الا سالىپ, جالى توگىلگەن جىلقىنى قۇشتار كوڭىلمەن شيمايلاي باستايدى. تۇركىلەر تۋرالى ءسوز تولعاعاندا, كوشپەلىلەردىڭ جۇرناعىنداي باۋىرى جازىلىپ شاۋىپ كەلىپ, شابىتىن دا, ءوزىن دە قامشىلاپ كەتەتىنى سوندىقتان بولسا كەرەك.
شەبەردىڭ قولىنا تۇسسە قاراپايىم قولانىڭ ءوزى ناعىز ونەر تۋىندىسىنا اينالىپ شىعا كەلەدى. باقىتجان ابىشەۆ تالاي تاۋ تۇلعالاردى تۇعىرىنا قوندىردى. مۇسىنشىگە كەڭ كولەمدەگى تانىمالدىلىق اكەلگەن تۇڭعىش تىرناقالدى تۋىندىلارىنىڭ ءبىرى – توقاش بوكين ەسكەرتكىشى. الماتىداعى پانفيلوۆشىلار پاركىنىڭ شىعار اۋزىندا پەداگوگيكالىق وقۋ ورنىنا قاراپ تۇرعان رەۆوليۋتسيونەر بەينەسى ءۇشىن جاس دارىن كەزىندە قازاقستان لەنين كومسومولى سىيلىعىنىڭ لاۋرەاتى اتانعان.
اسقاق بەينەنى اسقان ماحابباتپەن سومداپ, تاسقا ءتىل ءبىتىرىپ, سويلەتۋ ناعىز مۇسىنشىگە لايىق قاسيەت. شەبەردىڭ قولىنان شىققان ءساتتى شىعارمالارىنىڭ قاتارىن دوستىق داڭعىلى بويىنداعى جامبىل ەسكەرتكىشى تولىقتىرا تۇسەدى.
ال اتىراۋ قالاسىنا كورىك بەرگەن ساۋلەتتى نىسانداردىڭ قاتارىندا ازاتتىق ءۇشىن الىسقان الداسپان باتىرلار يساتاي مەن ماحامبەتتىڭ قوس اتقا ءمىنىپ قاتارلاسا شاۋىپ كەلە جاتقان ايبىندى ەسكەرتكىشىنىڭ ورنى بولەك. باتىرلاردىڭ رۋحىن, قاھارماندىعىن, ەلى مەن جەرىن سۇيگەن وتانشىلدىعىن بولاشاق ۇرپاقتىڭ بويىنا دارىتۋ مۇراتىن ءساتتى ورىنداعان تاعى دا باقىتجان ابىشەۆ بولاتىن. «بۇل مونۋمەنتتە ءمۇسىنشى مىقتى انيماليست رولىندە كورىنەدى. ونىڭ بەينەلەۋىندەگى تۇلپارلاردا شىنايى تۇرپات بار, ءمۇسىنشى بەلگىلەگەن ماقساتقا تولىقتاي جاۋاپ بەرەدى. ول حالىقتىق قوزعالىستىڭ كۇشى مەن قۋاتىن, ماقساتىنىڭ تازالىعى مەن بەكزاتتىعىن سيمۆوليكالىق تۇردە بەينەلەيدى. ماحامبەت وتەمىس ۇلى مەن يساتاي تايمان ۇلىنا ارنالعان ەسكەرتكىشتىڭ شەبەرلىگى مەن اۋقىمدىلىعى, بىرتۇتاستىعى, زاڭعارلىعى, ونىڭ بارلىق ەلەمەنتىنىڭ تۇتاس ۇيلەسىمدىلىگى بۇل تۋىندىنى الەمدىك مونۋمەنتالدى ونەردىڭ كورنەكتى ەسكەرتكىشتەرىنىڭ قاتارىنا قويادى» دەپ باعا بەرەدى ءا.قاستەەۆ اتىنداعى مەملەكەتتىك ونەر مۋزەيى ديرەكتورىنىڭ عىلىمي جۇمىستار جونىندەگى ورىنباسارى ا.جادايباەۆ.
سونداي-اق مونۋمەنتالدى مۇسىندەردىڭ ىشىندە قازاق حالقىنىڭ باتىر قىزى ءاليا مولداعۇلوۆانىڭ مونۋمەنتى اقتوبە قالاسىندا بوي كوتەردى. شەشىمى دالمە-ءدال ەرەكشە تابىلعان مۇسىندە قازاق ايەلىنىڭ ۇلتتىق دۇنيەسىنەن بولەك, پاتريوتتىق باتىرلىعى شىنايى كورىنىس تابادى. وتانعا دەگەن سۇيىسپەنشىلىگى, جانكەشتىلىگى بولمىسىندا ءدال بەينەلەنگەن. سۋرەتكەر ورىمدەي جاس قىزدىڭ اسقاق ارمانى مەن سۇيكىمدى سۇلۋلىعىن, كۇندەلىكتى قيىنشىلىعىن, اسكەري پارىزىن, قاھارماندىق ەرلىگىن جان تولعاندىرا ەركىن بەينەلەيدى.
الماتىداعى ءادي ءشارىپوۆ, باياناۋىلداعى جاسىباي باتىر, بۇقار جىراۋ, ءماشھۇر ءجۇسىپ, جاڭاقورعانداعى « ۇلى وتان سوعىسىنىڭ قۇرباندارى», استاناداعى مۇستافا كەمال اتاتۇرىك, جاياۋ مۇسا, قاراعاندىداعى ساكەن سەيفۋللين – ب.ابىشەۆتىڭ ازاماتتىق كوزقاراسى, تۇلعاعا دەگەن قۇرمەتى مەن سيقىرلى ساۋساعىنىڭ قۇدىرەتتى جەمىسى. ونىڭ «وليمپياداشى» تۋىندىسى شۆەيتساريانىڭ لوزاننا قالاسىنداعى وليمپيادالىق كوميتەتتىڭ شتاب-پاتەرىندە, «كۇيشى» ءمۇسىنى گەرمانيادا, ء«توميريسى» ماسكەۋدە تۇر.
سۋرەتشى شىعارماشىلىعى تەك مونۋمەنتالدى مۇسىندەردەن عانا تۇرمايدى. شاعىن ستانوك مۇسىندەر, كامەرالىق كىشى پلاستيكالىق تۋىندىلارى ءوز ۇيىندە ساقتاۋلى تۇر. ءمۇسىنشىنىڭ شەبەرحاناسىنداعى شىعارمالارىمەن تانىسۋعا شاقىرعان شامشاگۇل اپا جارىنىڭ سوڭىندا قالعان مۇراسىن كوزىنىڭ قاراشىعىنداي ساقتاپ وتىر. شەبەرحانا ءىشى كەڭ, جارىق, جىلى. ماڭداي تەرىن مونشاقتاتىپ, دىمقىل توپىراقتىڭ بۋىمەن تىنىستاپ وتىرىپ سىمتەمىردەن قالىبىن ءوزى قۇرىپ, دانەكەرلەپ, سۇلباسىن كەلتىرىپ, ويىپ, قاشاپ, جونىپ, ءۇستىن گيپسپەن قاپتاپ, بوياپ, ارلەپ, سوڭىنان قولا قۇيىپ, ىستىق پەشكە سالىپ ءپىسىرىپ, تولىق دايىن بولعانعا دەيىن سانسىز ساتىدان وتەتىن جۇمىسقا كەرەك زاتتى دا ۇقىپتاپ جيناعان-اق ەكەن. شەتەلدىك زاۋىتتاردان شىققان اعاش جوناتىن, تەمىر يەتىن, بويايتىن, شاباتىن, كەسەتىن, تەسەتىن, ۇيتەتىن, ورنەك سالاتىن قۇرال مەن اسپاپتىڭ نەشە اتاسى سورەدە سامساپ تۇر. يەسىز جەتىمسىرەپ تۇرعان جەرتولەدەگى اتشاپتىرىم شەبەرحانا ىشىندە ءمۇسىننىڭ مۇنشالىق مول قورى بار دەپ ويلاماعان دا ەكەنبىز. ءمۇسىن ونەرىندە جاڭا ماتەريالدار مەن تەحنولوگيا وتە كوپ قولدانىلعانىمەن, قولادان قۇيۋ ناعىز كلاسسيكانىڭ ءوزى بولىپ قالا بەرەتىنىن وسىنداعى مۇسىندەردىڭ ءوزى ايتىپ تۇر. شەبەر مۇسىندەرىن, نەگىزىنەن, قولا تىلىمەن «جازىپ» شىققان. شامشاگۇل اپا تۋرا كينوداعىداي توبەسىنە ءبىر ءتۇيىر توزاڭ قوندىرماي, ءمۇسىننىڭ ءبارىن اق جامىلعىمەن بۇركەپ قويىپتى, اڭگىمەسىن ايتا ءجۇرىپ, شەتىنەن سىپىرىپ الىپ جاتىر. جامىلعىسىن العان سايىن جارق ەتەتىن ءار ءمۇسىن تۋرالى ايتارى كاسىبي ونەر زەرتتەۋشىسىنىڭ العىسوز-انىقتاماسىنداي. مۇسىندەردىڭ ءجۇزىن تومەن سالىپ, مۇڭايىپ تۇرعانى بۇگىن عوي, ايتپەسە شەبەردىڭ ءوزى بۇلاردى ەل-جەر ارالاتىپ, كورمەگە قاتىستىرىپ, سان رەت بىرگە ساپارلاپ قايتقان كەزى بولعان. تاپ وسى قالپىندا شاعىنداپ كورمە وتكىزىپ جىبەرسە دە, سانى دا, ساپاسى دا تولىعىمەن تالاپقا ساي دايار تۇر. جادىگەرلەردىڭ ىشىندە جەڭىل-جەلپى دۇنيە جوق, ءبارى دە ماڭىزى بار, ءمانى زور كومپوزيتسيالار. ونەرگە كەلگەندە اسقان كىرپيازدىق تانىتقان ەستەت اسقار سۇلەيمەنوۆتى تاڭداندىرعان «قۇلاگەر» ءتورت اياعىن باۋىرىنا الىپ شالقالاي قۇلاپ, مەرتىگىپ جاتقان جەرىنەن بار قايراتىن جيىپ الىپ, تاپ قازىر كوككە شانشىلىپ قارعىپ تۇراتىنداي جانىنا ءجىپسىز بايلاپ, ءبىراز ايالداتتى. جانىنداعى «ۇماي» دا كىرپىكتەرىن قاعىپ-قاعىپ جىبەرىپ, كونە تۇركى جۇرتىنىڭ عانا ەمەس, بۇگىنگى ۇرپاعىنىڭ دا اناسى ەكەنىن مەيىرىمىمەن بىلدىرگىسى كەلگەندەي. توپتامانىڭ شىرايىن اشىپ تۇرعان «كۇيشى» دە وسىندا, اياقتالماعان «قۇمان ۇستاعان قىز», «حانشايىم» دا تۇركى ارۋلارى سۇلۋلىعىنىڭ سيمۆولى ىسپەتتەس. قازاقتىڭ دۇنيەتانىمىندا اسا زور مانگە يە جەلمايا, وزگە دە جىلقىنىڭ ءتۇر-ءتۇرى سورە ۇستىندە «سويلەپ» تۇر. اعاشتان, تاستان, گيپستەن, ءمارماردان جاسالعان سۇلۋ مۇسىندەردەن اۆتوردىڭ ىشكى الەمىن, ومىرگە كوزقاراسىن, دۇنيەنى قالاي قابىلداعانىن بولجاعانداي بولىپ, ەرىكسىز ويعا شوماسىڭ. ءتورت ت ۇلىك مالدى مۇسىندەۋگە ەرەكشە قۇشتار بولۋىنىڭ ءبىر سەبەبى, باقىتجان اعانىڭ اكەسى اۋىل شارۋاشىلىعى مينيسترلىگىندە ۇزاق جىلدار قىزمەت باسقارعان. ال ونىڭ الدىنداعى ەكىنشى دۇنيەجۇزىلىك سوعىس كەزىندە كاۆالەرلىك ديۆيزيانىڭ باس ۆەتەرينار دارىگەرى بولىپ قىزمەت ەتىپ, پراگاعا دەيىن بارعان. سىرقاتتانىپ جاتقان كەزىندە: «مەنىڭ بالام باقىتجانىم, سۋرەتشى بولادى, سۋريكوۆ اتىنداعى كوركەمسۋرەت ينستيتۋتىندا وقيدى» دەگەن ەكەن. اكە ءسوزى ۇلىنىڭ بولاشاعىن بولجاعانداي راس بولدى.
ماسەلەنىڭ تۋىندايتىن جەرى دە وسىندا. جەكە ءۇيدىڭ جەرتولەسىندە تۇرعان جادىگەرلەردى جاسى سەكسەنگە تاياعان شامشاگۇل اپانىڭ ءوزى دە قايدا ورنالاستىراتىنىن بىلمەيدى. بۇل مۇسىندەردىڭ ەندىگى بولاشاعى نە بولماق؟
– وسى ءمۇسىننىڭ ءبارى – باكەڭنىڭ قىرۋار ەڭبەگىنىڭ جەمىسى. ءوزى باقيلىق بولسا دا, سوڭىنا لايىق مۇرا قالدىردى. ورناتىلعانى-ورناتىلماعانى بار, اياقتالعانى-اياقتالماعانى بار, بۇكىل تۋىندىسى وسى شەبەرحانادا ساقتاۋلى تۇر. بۇل تۋىندىلار ۇيدە تۇرعاننان گورى رۋحاني اينالىمعا ەنىپ, حالىقتىڭ سۇلۋلىققا ىڭكارلىگىن وياتىپ, كوركەم تالعامىنىڭ بيىكتەۋىنە قىزمەت ەتۋگە ءتيىس دەپ ويلايمىن. جان-جۇرەگىن اقتارىپ, ساناسىن, شەبەرلىگىن ءسىڭىرىپ جاساعان شىعارمالارى قور بولىپ كوزدەن تاسا, بوگدە ادام باس سۇعا بەرمەيتىن جەرتولەدە جەتىمسىرەپ تۇرماسا ەكەن دەيمىن. ونەردى باعالايتىن كاسىپكەر ازاماتتار تابىلىپ جاتسا, اسىرەسە باكەڭنىڭ تۋعان جەرى اقتوبە وبلىسىنىڭ تالانتتى ۇلدارىنىڭ تۋىندىلارىن شاشاۋ شىعارماي, مۋزەيدەن ياكي گالەرەيادان ورىن ۇسىناتىنداي مۇمكىندىگى بولسا, مۇسىندەردىڭ ءبىر-بىرىمەن ۇيلەسىمىن بۇزباي, توپتاما كۇيىندە حالىقپەن رۋحاني بايلانىسقا الىپ شىقسا, العىستان باسقا نە ايتامىن؟ – دەيدى شامشاگۇل مەڭدياروۆا.
مادەنيەتى دامىعان باتىس ەلدەرىندە بولسا, تانىمال شەبەردىڭ قولىنان شىققان, جالعىز دانامەن عانا جاسالعان مۇنداي بيىك دەڭگەيدەگى ونەر تۋىندىلارى جەرتولەدە جاتپاي, تابىنۋشىسىن تاۋىپ, قانداي قىمبات باعاعا بولسا دا ساتىلار ەدى. قىلقالامىن ارا-تۇرا قارا تاس قاشاۋعا الماستىرىپ, ءمۇسىن جاساۋمەن اينالىسقان اتاقتى سۋرەتشى امادەو موديلياني اننا احماتوۆاعا ەسى كەتە عاشىق بولىپ جۇرگەن كەزىندە حاس سۇلۋدان گورى ومىردەن باز كەشىپ, قۇلازۋدى سۇيگەن اقىن بەينەسىندەگى كەيبىر مۇڭ دەتالىن «باس» اتتى مۇسىنىنە قولدانىپ, ەرەكشە پىشىندە قولادان قۇيىپ شىققان ەكەن. ارادا ءجۇز جىل وتكەننەن كەيىن موديلياني ءمۇسىنىنىڭ اۋكتسيونداعى قۇنى 70,7 ملن دوللارعا شارىقتاپ شىعا كەلگەن. ماڭگىلىكتىڭ وزىنە اينالىپ, ومىرشەڭ بولۋىنىڭ ءبىر سەبەبى, موديلياني مەن احماتوۆانىڭ الەمدىك ونەر مەن ادەبيەتتەگى ورنىن ۋاقىت اسقاقتاتپاسا, الاسارتا العان جوق, ءمۇسىنشى جۇرەگىمەن قاشاعان اقىن مۇڭى سەيىلمەك تۇگىلى سۇلۋ تارتىپ بارادى, سوندىقتان ول بۇگىنگى ۋاقىت ءۇشىن دە وزەكتى. ءمۇسىن ونەرىنىڭ ءمانى دە وسىندا – ونىڭ قۇنى مەن باعاسىن بولاشاق بەلگىلەيدى. اۋكتسيونعا شىعارىپ ساتۋ مۇمكىندىگى جوق ەلدە ەڭ بولماعاندا, اۆتوردىڭ تۋعان جەرى اقتوبە وبلىسىنىڭ ونەر وشاقتارى نەمەسە جاناشىر ازاماتتارى ات باسىنداي التىنعا ايىرباستاماس رۋحاني قازىنانى حالىق يگىلىگىنە اينالدىرا السا, الەۋمەتتىك ورتانىڭ مادەني الەۋەتىن كوتەرۋگە مۇمكىندىك سىيلاعانى بولار ەدى دەگەن قاراپايىم تىلەگىمىز ايگىلى موديلياني مىسالىن كورىپ وتىرعان سوڭ ەرىكسىز تۋىندادى...
الماتى