الماتى اكىمدىگىنىڭ قىزمەتكەرى قىزدى ۇردى دەگەن كۇدىككە ءىلىندى. الەۋمەتتىك جەلىدە تاراپ كەتكەن بەينەروليك جۇرتتىڭ نارازىلىعىن تۋدىردى, دەپ جازادى Egemen.kz.
Tengrinews.kz حابارلاعانداي, بۇل ءىس بويىنشا اكىمدىكتىڭ جاستار ساياساتى باسقارماسىنىڭ قىزمەتكەرى كۇدىككە ءىلىنىپ, قاماۋعا الىندى.
بۇل تۋرالى جابىرلەنۋشىنىڭ ءوزى الەۋمەتتىك جەلىدە مالىمدەدى. ونىڭ ايتۋىنشا, وعان قاتىستى زورلىق-زومبىلىق ارەكەتتەرى ءۇش جىل بويى جالعاسىپ كەلگەن.
الماتى اكىمدىگى ۇسىنعان اقپاراتقا سايكەس, ءدىلمۇرات وماروۆ 2022 جىلدىڭ قاراشاسىنان بەرى الماتى جاستار ساياساتى باسقارماسىنىڭ باس مامانى قىزمەتىن اتقارادى.
«وسى وقيعادان كەيىن وماروۆ 2023 جىلدىڭ 19 اقپانىنان باستاپ ءوز ەركىمەن جۇمىستان بوساتۋ تۋرالى ءوتىنىش بەردى. كادر قىزمەتى ءوتىنىشتى قابىلداپ, «مەملەكەتتىك قىزمەت تۋرالى» قازاقستان رەسپۋبليكاسى زاڭىنىڭ 61-بابى 1-تارماعى 1-تارماقشاسىنا سايكەس ءدىلمۇرات وماروۆ قىزمەتىنەن بوساتىلدى. قازىرگى ۋاقىتتا بۇل جانجالدىڭ ءمان-جايىن قۇقىق قورعاۋ ورگاندارى تەكسەرىپ, وعان قاتىسۋشىلارعا قاتىستى قۇقىقتىق باعا بەرۋ جانە ءتيىستى دەن قويۋ شارالارىن قابىلداپ جاتىر», دەپ سەندىردى اكىمدىك وكىلدەرى.
ال قالالىق پوليتسيا دەپارتامەنتى مەدەۋ اۋداندىق پوليتسيا ءبولىمى جاراقات الۋ دەرەگى بويىنشا سوت-مەديتسينالىق ساراپتاما تاعايىنداعانىن حابارلادى.
«قىزعا كۇش كورسەتكەن ەر ادام قاماۋعا الىندى. ونىڭ ارەكەتىنە قۇقىقتىق باعا بەرىلەدى. سوت وتىرىسىنىڭ ماتەريالدارى شەشىم قابىلداۋ ءۇشىن سوتقا جىبەرىلەدى», دەلىنگەن اقپاراتتا.