پرەمەر-ءمينيستردىڭ ورىنباسارى سەرىك جۇمانعارين سالالىق مينيسترلىكتەر, قتج وكىلدەرى جانە قازاقستان پارلامەنتى ءماجىلىسىنىڭ دەپۋتاتى بولاتبەك ناجمەتدين ۇلىنىڭ قاتىسۋىمەن اۆتوموبيل ارقىلى جۇك تاسىمالداۋ ماسەلەلەرى جونىندە كەڭەس وتكىزدى.
كولىك مينيسترلىگىنىڭ دەرەكتەرىنە ساي 2023 جىلى ەكسپورتتىق-يمپورتتىق جۇك تاسىمالداۋ كولەمى 7,6 ملن توننانى (2,8 ملن توننا – ەكسپورت/4,8 ملن توننا – يمپورت) قۇرادى. بۇل رەتتە وتاندىق تاسىمالداۋشىلاردىڭ ۇلەسى – 50,2%-دى, وزبەكستاندىق تاسىمالداۋشىلاردىڭ ۇلەسى – 10,6%-دى, تۇركيالىق تاسىمالداۋشىلاردىڭ ۇلەسى – 5,5%-دى, رەسەيلىك تاسىمالداۋشىلاردىڭ ۇلەسى – 3%-دى, تاجىكستاندىق تاسىمالداۋشىلاردىڭ ۇلەسى 2,5%-دى قۇرادى.
تاسىمالداناتىن جۇكتەردىڭ 1,6 ملن تونناسى ەۋروپا ەلدەرىنە تيەسىلى. سونداي-اق ولاردىڭ جارتىسىن ءبىزدىڭ ەلدىڭ تاسىمالداۋشىلارى جەتكىزەدى (50%). پولشاداعى بارلىق حالىقارالىق تاسىمالداۋ بەكەتتەرىنىڭ جابىلۋى جانە رەسەي مەن بەلارۋس شەكاراسىندا ءبىر عانا وتكىزۋ بەكەتىنىڭ بولۋى مەملەكەتارالىق ساۋدا-ساتتىق باعىتتارىنا كەرى اسەرىن تيگىزەدى.
قولدانىستاعى حالىقارالىق باعىتتارعا بالاما رەتىندە دەپۋتات ب.ناجمەتدين ۇلى تۇرىكمەنستان ارقىلى ءوتىپ, تۇركيا مەن پارسى شىعاناعى ەلدەرىنە اپاراتىن باعىتتى قاراستىرۋدى ۇسىندى. ول ءۇشىن تۇركىمەنستانمەن اراداعى ۆيزالىق راسىمدەردى جەڭىلدەتۋدە مەملەكەتتىڭ كومەگى قاجەت. سونداي-اق ەو ەلدەرىنە تاۋارلاردى جەتكىزۋدىڭ بالاماسى رەتىندە لاتۆيا ارقىلى وتەتىن باعىتتى پىسىقتاۋ ۇسىنىلدى.
كەڭەس قورىتىندىسى بويىنشا سەرىك جۇمانعارين قاتىسۋشىلارعا بالامالى حالىقارالىق اۆتوكولىك باعىتتارىنىڭ بارلىق نۇسقاسىن پىسىقتاۋدى جانە بيزنەستىڭ ۇسىنىستارىن ەسكەرە وتىرىپ, ولاردى دامىتۋ بويىنشا جول كارتاسىن ازىرلەۋدى تاپسىردى.