قورعانىس ءمينيسترى, گەنەرال-پولكوۆنيك رۋسلان جاقسىلىقوۆ وڭىرلەردەگى اسكەري ينفراقۇرىلىم نىساندارىن جانە الداعى وقۋ-جاتتىعۋلارعا دايىندىق بارىسىن تەكسەردى.
قوناەۆ گارنيزونىنىڭ «جاعالاۋ» پوليگونىندا قورعانىس ءمينيسترى دەسانتتىق-شابۋىلداۋ اسكەرلەرى قولباسشىسىنىڭ بايانداماسىن تىڭدادى. گەنەرال-مايور الماز جۇماكەەۆ ۇقشۇ-نىڭ «مىزعىماس باۋىرلاستىق – 2024» ۇجىمدىق بىتىمگەرلىك كۇشتەرىمەن وتەتىن وقۋ-جاتتىعۋعا دايىندىق بارىسى تۋرالى باياندادى. ارميا اۆياتسياسىنىڭ تىكۇشاعىمەن «شوشقالى» پوليگونىن اينالىپ ۇشىپ ءوتتى.
مينيستر 65229 اسكەري بولىمىنە بارىپ, اسكەري نىسانداردى ارالاپ, اۋە شابۋىلىنا قارسى قورعانىس اسكەرلەرىنىڭ اۆياتسيالىق تەحنيكاسى مەن قارۋ-جاراعىن قولدانۋ شارتتارىمەن تانىستى.
قارۋلى كۇشتەرى مەملەكەتتىك اسكەري-تاريحي مۋزەيىنىڭ فيليالىندا قورعانىس ءمينيسترى نىساننىڭ اۋماعىن ۇلعايتۋ جانە ەكسپوزيتسيالىق زالداردى جاڭارتۋ ماقساتىندا جۇرگىزىلىپ جاتقان جوندەۋ جانە قالپىنا كەلتىرۋ جۇمىستارىنىڭ بارىسىن تەكسەردى. مۋزەي باستىعى الۋا بايقاداموۆامەن كەزدەسۋدە گەنەرال-پولكوۆنيك رۋسلان جاقسىلىقوۆ جۇمىستاردى ساپالى جانە ۋاقتىلى ورىنداۋ قاجەتتىگىنە نازار اۋداردى.
ساپار اياسىندا سالا باسشىسى قورعانىس مينيسترلىگىنىڭ بىتىمگەرلىك وپەراتسيالار ورتالىعىنا دا ات باسىپ بۇرىپ, ينفراقۇرىلىمدىق نىسانداردى ارالاپ, ۇلتتىق كونتينگەنتتى بۇۇ-نىڭ گولان جوتالارىنداعى بىتىمگەرلىك ميسسياسىنا جىبەرۋگە قاتىستى بىرقاتار نۇسقاۋ بەردى.
الماتى قالاسىنداعى ورتالىق اسكەري ەمحاناعا بارعان كەزدە قورعانىس ۆەدومستۆوسىنىڭ باسشىسى مەكەمەنىڭ ەمدەۋ-دياگنوستيكالىق جابدىقتارمەن, ءتيىستى قۇرالدارمەن جانە دارىلىك زاتتارمەن قامتاماسىز ەتىلۋ بارىسىمەن تانىستى. مينيستر بەكىتىلگەن كونتينگەنتكە ساپالى امبۋلاتورلىق-ەمحانالىق جانە كونسۋلتاتسيالىق-دياگنوستيكالىق كومەك كورسەتۋ قاجەتتىگىن اتاپ ءوتتى.
قورعانىس ءمينيسترى, گەنەرال-پولكوۆنيك رۋسلان جاقسىلىقوۆ شىمكەنت قالاسىنا بارعان ساپارىندا اۆياتسيا بازاسىندا «وڭتۇستىك» وڭىرلىك قولباسشىلىعى اسكەرلەرىنىڭ قولباسشىسى, گەنەرال-مايور قۋانىشبەك ۇشتاەۆتىڭ قۇرامالار مەن اسكەري بولىمدەردىڭ جاۋىنگەرلىك جانە جۇمىلدىرۋ دايىندىعى تۋرالى بايانداماسىن تىڭدادى.
سونىمەن بىرگە شىمكەنت قالاسىنىڭ اكىمى عابيت سىزدىقبەكوۆپەن كەزدەسىپ, اسكەري ينفراقۇرىلىم نىساندارىن سالۋ, ولاردى جوندەۋ جانە پايدالانۋ سالاسىنداعى ىنتىماقتاستىق ماسەلەلەرىن تالقىلادى.
شىمكەنت گارنيزونىنىڭ 36814 اسكەري بولىمىندە گەنەرال-پولكوۆنيك رۋسلان جاقسىلىقوۆ كومانديردىڭ بولىمشەلەردىڭ ماقساتتارى, جاۋىنگەرلىك مۇمكىندىكتەرى مەن جاساقتالۋى تۋرالى بايانداماسىن تىڭدادى. قورعانىس ءمينيسترى جاۋىنگەرلىك دايارلىقتىڭ ساپاسىن ارتتىرۋعا, ءبولىمنىڭ قارۋ-جاراقپەن جانە اسكەري تەحنيكامەن جاراقتاندىرىلۋىنا باسا نازار اۋداردى. بۇنىڭ ءبارى اسكەري قىزمەتشىلەردىڭ مورالدىق-جاۋىنگەرلىك رۋحىنا بايلانىستى ەكەنىن اتاپ ءوتتى.
بۇعان قوسا قورعانىس سالاسىنىڭ باسشىسى اسكەري بولىمدەردە اسكەريلەرگە جاسالعان تۇرعىن ءۇي-تۇرمىستىق جاعدايمەن تانىسىپ, كازارمالاردى, اسحانالاردى جانە الەۋمەتتىك-مادەني نىسانداردى ارالادى.
شىمكەنت قالاسىنداعى اۋە قورعانىسى كۇشتەرىنىڭ اۆيابازاسىندا رۋسلان جاقسىلىقوۆ ۇشۋ ەكيپاجىنا پيلوتاج جانە اۆياتسيالىق زاقىمداۋ قۇرالدارىن قولدانۋ مىندەتتەرىن پىسىقتاۋعا مۇمكىندىك بەرەتىن ءبولىمنىڭ ينفراقۇرىلىمىن, اۆياكومپانيالاردى قارادى.
جۇمىس ساپارىنىڭ سوڭىندا قورعانىس ءمينيسترى جاۋىنگەرلىك دايارلىقتىڭ ساپاسىن ارتتىرۋ, اسكەرلەردىڭ جاۋىنگەرلىك ازىرلىگى جانە اسكەري ينفراقۇرىلىم وبەكتىلەرىن جايلاستىرۋ جونىندە بىرقاتار تاپسىرما بەردى.