وقيعا 15 اقپان كۇنى ساعات 11:00 شاماسىندا بولدى. ۇلتتىق ۇلاننىڭ 6697 اسكەري ءبولىمىنىڭ 1 اتقىشتار روتاسى باقىلاۋشىلارىنىڭ 2 ۆزۆودىنىڭ مامانى باقىلاۋشى سەرجانت بولات ىسقاقوۆ قوستاناي قالاسىنىڭ قايىربەكوۆ كوشەسى, 385 مەكەنجايى بويىنشا ورنالاسقان بەس قاباتتى تۇرعىن ءۇيدىڭ ءبىرىنشى قاباتىنداعى پاتەردىڭ بىرىنەن شىققان ءتۇتىندى بايقاعان.
دەرەۋ ءورت سوندىرۋشىلەرگە حابار بەرگەن ۇلتتىق ۇلان اسكەري قىزمەتكەرى وتقا ورانعان پاتەردە قارت ايەلدىڭ بارىن انىقتاپ, كومەككە ۇمتىلعان.
ء«تۇتىندى كورگەننەن كەيىن كىرەبەرىسكە اسىقتىم. جول بويىندا ءورت ءسوندىرۋ بريگاداسىن شاقىرعان ەدىم. كىرەبەرىستىڭ ەسىگى جابىق بولعاندىقتان, بارلىق پاتەر نومىرلەرىنە قوڭىراۋ شالۋعا تۋرا كەلدى. تۇرعىنداردىڭ ءبىرى ەسىكتى تەز اشا قويدى. ىشكە باس سۇققان ساتتە قارت تۇرعىن پانالاعان پاتەردى قويۋ ءتۇتىن تۇمشالاعانىن بايقادىم. پاتەرىنە ەنگەن سوڭ قاريانى قولىما الىپ, اشىق تەرەزە ارقىلى سىرتتا جينالىپ قالعان ادامدارعا بەردىم. سول ارالىقتا ءوزىم دە كومىرقىشقىل گازىنا تۇنشىعا باستادىم, ءتىپتى ەسىمنەن تانىپ قالۋىم دا مۇمكىن ەدى. ابىروي بولعاندا, ءورت سوندىرۋشىلەر سىرتقا امان شىعۋىما كومەكتەستى. بۇل ءۇشىن مەن ولارعا ريزامىن», دەيدى سەرجانت بولات ىسقاقوۆ.
كەيىن ءورت شىققان جەرگە قوستاناي وبلىسىنىڭ توتەنشە جاعدايلار دەپارتامەنتىنىڭ قىزمەتكەرلەرى كەلىپ, جەدەل شارالار قابىلدادى. تۇرعىندار عيماراتتان ەۆاكۋاتسيالاندى. بارلىعى 15 ادام قۇتقارىلدى, ولاردىڭ اراسىندا 8 بالا بار. 23 ادام ەۆاكۋاتسيالاندى. قۇرباندار مەن زارداپ شەككەندەر جوق.
ءورتتىڭ سەبەپتەرى انىقتالىپ جاتىر. الدىن-الا بولجام بويىنشا, ءورت جىلىتقىشتىڭ جيھازعا جاقىن ورنالاسۋىنان تۇتانعان.