اۋىل مەن قالا اراسىنداعى دامىل تاپپايتىن قارىم-قاتىناستا قارا جولدىڭ ماڭىزى زور. الايدا تىرشىلىكتىڭ كۇرەتامىرىنا اينالعان جول ساپاسى ءالى كۇنگە كوڭىل كونشىتپەيدى. ايتا-ايتا جاۋىر بولعان اسپانتاۋ اياسىنداعى رايىمبەك, كەگەن اۋداندارىنا اپاراتىن اسفالتتىڭ «جىرى» بۇكىل ەلگە ءمالىم.
مەملەكەت باسشىسى ۇكىمەتتىڭ كەڭەيتىلگەن وتىرىسىندا اۆتوجول ماسەلەسىنە ايرىقشا كوڭىل ءبولدى. «جالپى, جول ماسەلەسىنە كەلگەندە ءبىر عانا ماقسات بولۋعا ءتيىس. رەسپۋبليكالىق نەمەسە ايماقتىق جول بولسىن, ەلىمىزدەگى جولدىڭ بارلىعى ساپالى بولۋى كەرەك. ازىرگە جاعداي ءماز ەمەس», دەپ باعا بەردى قاسىم-جومارت توقاەۆ.
جاعدايى ءماز ەمەس جولدىڭ ءبىرى – جوعارىداعى شەكارالى ايماققا جەتكىزەتىن «الماتى-كەگەن-ءتۇپ» باعىتىنداعى رەسپۋبليكالىق ماڭىزعا يە ويدىم-ويدىم جولدان جولاۋشى جۇيكەسى تۇگىلى, توڭقاڭداعان كولىكتىڭ دە تەمىرى توزىپ بولدى. تەمىردىڭ توزعانى بىلاي تۇرسىن, ساپاسىز جول تالايدىڭ تاعدىرىن تاس-تالقان ەتىپ, ءدام-تۇزىن تاۋىستى. تاۋلى ءوڭىر تۇرعىندارىنىڭ جانايقايىنا حالىق قالاۋلىلارى دا قاراپ قالماي, وزىندىك ءۇن قوسىپ كەلەدى.
ءماجىلىس دەپۋتاتى جاناربەك ءاشىمجان كولىك ءمينيسترى مەن سىبايلاس جەمقورلىققا قارسى ءىس-قيمىل اگەنتتىك باسشىسىنا جولداعان دەپۋتاتتىق ساۋالىندا ساپاسى سىن كوتەرمەيتىن جولدىڭ بۇگىنگى احۋالىن اتاپ ايتتى. «بۇعان دەيىن دە مەملەكەت باسشىسى قازاقستانداعى جولداردى «قۇراق كورپەگە» تەڭەگەن ەدى. ءالى كۇنگە دەيىن جول سالاسىندا سالعىرتتىقتار از ەمەس. «جول ازابىن جۇرگەن بىلەدى», وسى ورايدا سول ازاپتى كۇندەردى باستان كەشىپ جاتقان الماتى وبلىسى كەگەن, نارىنقول, ۇيعىر اۋداندارىنداعى ەلدىڭ جانايقايىن جەتكىزگىم كەلەدى. بۇرىن دا ايتقانمىن, تاعى دا ايتۋعا تۋرا كەلىپ تۇر. ويتكەنى ناتيجە جوق», دەگەن ماجىلىسمەن ساپاسىز جول سالىپ, ميللياردتاردى جەلگە ۇشىرعان «قازاۆتوجول» ۇلتتىق كومپانياسىن سىنعا الدى.
جولاۋشىلار ءتوزىمىن تاۋىسىپ, سىزداۋىقتاي سولقىلداتىپ تۇرعان جول ماسەلەسىنە مەملەكەت باسشىسىنىڭ باسا نازار اۋدارۋى, دەپۋتاتتاردىڭ قوزعاۋ سالۋى جىلدار بويى جانعا باتقان ماسەلەلەردىڭ ءتۇيىنىن تارقاتۋعا, وڭىرىمىزدەگى جول جاعدايىنىڭ جاقسارۋىنا ىقپالى تيەر دەگەن ۇمىتتەمىز.
سابىر دوسىمبەكوۆ,
كەگەن اۋداندىق ارداگەرلەر
كەڭەسىنىڭ توراعاسى
الماتى وبلىسى