قازىر جارتى الەمدى جالعاستىرىپ جاتقان «باتىس ەۋروپا – باتىس قىتاي» كۇرە جولىنىڭ جوباسى وسىدان 14 جىل بۇرىن باستالىپ ەدى. سول تۇستا وبلىستىق جولاۋشىلار كولىگى جانە اۆتوموبيل جولدارى باسقارماسىنىڭ باسشىسى رەتىندە ءبىراز جاۋاپكەرشىلىك تە ارقالادىق. مۇنداعى ايتايىن دەگەنىم, ءبىزدىڭ جەرگىلىكتى جول سالاتىن كومپانيالاردىڭ تاجىريبەسى سول كەزدىڭ وزىندە بىزگە باس مەردىگەر بولىپ كەلگەن شەتەلدىك جولشىلاردان مىسقالداي دا كەم ەمەس بولاتىن.
ۇكىمەتتىڭ كەڭەيتىلگەن وتىرىسىندا پرەزيدەنتتىڭ اۆتوجول سالاسىنا, ونداعى جەرگىلىكتى ماماندارعا مۇمكىندىك بەرۋ تۋرالى تاپسىرماسى مەنى ايرىقشا قۋانتتى.
شىنىمەن دە قازىر بۇل سالادا ءوز ماماندارىمىزدىڭ تاجىريبەسى تولىسىپ, تەحنيكاسى تولىقتى. «باتىس ەۋروپا – باتىس قىتاي» جولىن سالۋ بارىسىندا جوبانى ۇتىپ العان يتاليا, تۇركيا كومپانيالارى جەرگىلىكتى سەرىكتەستىكتەردى قوسالقى مەردىگەر رەتىندە جالداپ, بار جۇمىستى سولار اتقاردى. ودان كەيىن دە جول سالاسىنا قاتىستى جەرگىلىكتى جوبالاردا «ۋاد», «دورستروي», «قىران» كومپانيالارى تالاي كۇردەلى جۇمىستاردى جۇزەگە اسىرىپ ءجۇر. قازىر قىزىلوردا وبلىسىنداعى جول ساپاسى كوپ وڭىرمەن سالىستىرعاندا كوش ىلگەرى تۇرعانى وسىنداي جەرگىلىكتى كومپانيالاردىڭ ارقاسى دەر ەدىك.
بيىل «باتىس ەۋروپا – باتىس قىتاي» حالىقارالىق ءدالىزىنىڭ «قىزىلوردا – اقتوبە» ارالىعىن كەڭەيتۋ جۇمىستارى باستالادى. بۇل رەتتە دە ءوز ماماندارىمىزعا سەنىم بىلدىرگەنىمىز ءجون بولار ەدى.
پرەزيدەنت جول قۇرىلىسىنا قاجەتتى تەحنيكانى ەلىمىزدە شىعارۋ جولدارىن دامىتىپ, ءوزىمىزدىڭ دايىن ءونىمدى پايدالانۋ كەرەكتىگىن باسا ايتتى. بۇل دا وتە وزەكتى ماسەلە. وسى كۇنى سالىنىپ جاتقان «قىزىلوردا – جەزقازعان» كۇرە جولىنا قاجەتتى ماتەريالداردىڭ باسىم بولىگى ءوزىمىزدىڭ وڭىردەن تابىلىپ وتىر. پرەزيدەنت ەلدەگى بارلىق جولدىڭ ساپالى بولۋى كەرەكتىگىن باسا ايتتى. بۇل – سالاعا ۇلكەن جاۋاپكەرشىلىك جۇكتەيدى.
ومىربەك شامەنوۆ,
قىزىلوردا وبلىستىق جول سالاسى قاۋىمداستىعىنىڭ پرەزيدەنتى