تاياۋدا ازەربايجان دەلەگاتسياسىنىڭ جۇمىس ساپارى شەڭبەرىندە ىنتىماقتاستىق ماسەلەلەرى بويىنشا وتىرىس بولدى. ازەربايجاننىڭ تسيفرلىق دامۋ جانە كولىك مينيسترلىگى مەن قازاقستاننىڭ كولىك مينيسترلىگى اراسىنداعى تەڭىز كەمەلەرى ەكيپاجى مۇشەلەرىنىڭ كاسىبي ديپلومدارىن ءوزارا تانۋ, رۇقساتتار كۆوتاسىن ء(ۇشىنشى ەلدەر ءۇشىن رۇقسات) ۇلعايتۋ, قۇرىق پورتىندا تەڭىز ءتۇبىن تەرەڭدەتۋ جۇمىستارىن جۇرگىزۋ قاجەتتىلىگى, سونداي-اق تيەۋدى جۇزەگە اسىراتىن لوكوموتيۆتەر سانىن كوبەيتۋ تۋرالى كەلىسىم جوباسىنا قاتىستى ماسەلەلەر تالقىلاندى.
تاراپتار 2022-2027 جىلدارعا ارنالعان قازاقستان, ازەربايجان جانە تۇركيا اۋماقتارى بويىنشا «تار» ورىنداردى سينحروندى جويۋ جانە ورتا ءدالىزدى دامىتۋ بويىنشا قول قويىلعان جول كارتاسىن جۇزەگە اسىرۋ شەڭبەرىندە اتقارىلاتىن جۇمىستاردى تاعى ءبىر رەت پىسىقتادى.
«2023 جىلى اقتاۋ جانە قۇرىق تەڭىز پورتتارى ارقىلى اۋىستىرىپ تيەۋ كولەمى 65%-عا ارتىپ, 2,76 ملن توننا جۇكتى قۇرادى. «تار» ورىنداردى سينحروندى جويۋ جانە ترانسكاسپي حالىقارالىق كولىك مارشرۋتىن دامىتۋ بويىنشا جول كارتاسىن ىسكە اسىرۋ شەڭبەرىندە ءدالىزدىڭ قۋاتىن كەڭەيتۋ اياسىندا ەكى تاراپ تا بەلسەندى جۇمىس جۇرگىزىپ جاتىر. جول كارتاسىن وزەكتەندىرۋ بويىنشا ۋاعدالاستىققا قول جەتكىزىلدى», دەدى تەمىرجول جانە سۋ كولىگى كوميتەتى توراعاسىنىڭ ورىنباسارى قاسىم تىلەپوۆ.