قازاقستانداعى ساقتاندىرۋ سالاسى تەحنولوگيالىق وزگەرىستەرگە بەيىمدەلىپ جاتىر. قارجى نارىعىن رەتتەۋ جانە دامىتۋ اگەنتتىگىنىڭ مالىمەتى بويىنشا, سوڭعى 5 جىلدا سالالىق بەلسەندىلىك 2,5 ەسە ءوستى. 2023 جىلدىڭ ەكىنشى جارتىسىندا ساقتاندىرۋ نارىعىنىڭ كولەمى 2,4 ترلن تەڭگەنى قۇرادى. قازىر ەل كولەمىندە ساقتاندىرۋ سىياقىلارىنىڭ كولەمى 2,5 ەسەدەن ارتىپ, 577,8 ترلن تەڭگەگە جەتسە, ساقتاندىرۋ شارتتارىنىڭ كولەمى ەكى ەسە ءوسىپ, 9,3 ملن-عا ۇلعايدى. ونىڭ 86 پايىزى جەكە تۇلعالارمەن جاسالعان. سوڭعى 5 جىلدا ساقتاندىرۋ تولەمدەرىنىڭ كولەمى 2,5 ەسە ءوسىپ, شامامەن 141 ملرد تەڭگە بولدى.
ساقتاندىرۋ نارىعى ءوسىمىنىڭ نەگىزگى فاكتورى جەڭىلدەتىلگەن اۆتونەسيە جانە يپوتەكالىق نەسيەلەندىرۋدىڭ مەملەكەتتىك باعدارلامالارىن جۇزەگە اسىرۋ ەكەنى بەلگىلى. سونىمەن قاتار سالانى تسيفرلاندىرۋ ءۇردىسى دە جاناما تۇردە دامۋعا اسەر ەتتى. قازىر ساقتاندىرۋ نارىعىندا تسيفرلاندىرۋدى دامىتۋدىڭ 3 باعىتى بار: Insurtech, Regtech جانە Suptech. ەگەر RegTech جانە SupTech قاداعالاۋ مەن رەتتەۋدى تسيفرلاندىرۋعا قاتىستى بولسا جانە ونى نەگىزىنەن ساقتاندىرۋ ۇيىمدارى سەزىنسە, وندا Insurtech تۇتىنۋشى مەن ساقتاندىرۋشى اراسىنداعى تىكەلەي قارىم-قاتىناستى تسيفرلاندىرۋعا باعىتتالعان.
ساقتاندىرۋ نارىعىندا 25 كومپانيا بار. ولاردىڭ 90 پايىزىنا ۇيدەن شىقپاي-اق ونلاين ساقتاندىرۋ پوليستەرىن ۇسىنۋعا مۇمكىندىك بەرىلگەن. اۆتوكولىكتى ساقتاندىرۋ, پاتەردى ساقتاندىرۋ, ءومىردى ساقتاندىرۋ, ساياحاتتى ساقتاندىرۋ نەمەسە مەديتسينالىق ساقتاندىرۋ بولسىن, كەز كەلگەن ءپوليستى ونلاين تىركەۋ قازىر بىرنەشە مينۋتتى الادى. ال قاشىقتان تولەگەننەن كەيىن ساتىپ الۋشىنىڭ ەلەكتروندىق پوشتاسىنا قۇجات جىبەرىلەدى.
بيىلعى 1 قاڭتاردان باستاپ جۇمىس ىستەي باستاعان تسيفرلىق يننوۆاتسيالاردىڭ ءبىرى جازاتايىم وقيعادان كەيىن ساقتاندىرۋ تولەمىن جىلدام الۋ قۇرالى – ەۋروحاتتاما بولدى. ونىڭ كومەگىمەن جول-كولىك وقيعاسىنا قاتىسۋشىلار ەندى پوليتسيا شاقىرماي-اق, سونداي-اق سوت ورگاندارىنىڭ قاتىسۋىنسىز جازاتايىم وقيعانى رەتتەي الادى. ەۋروپالىق حاتتامانى مىنا جاعدايلاردا قولدانۋعا مۇمكىندىك بار:
جكو قاتىسۋشىلارى جارامدى ساقتاندىرۋ ءپوليسى بار 2 جۇرگىزۋشى بولسا; جازاتايىم وقيعادان كەلتىرىلگەن زالال مولشەرى 100 اەك-تەن اسپاسا (369 200 تەڭگە); جازاتايىم وقيعاعا قاتىسۋشىلار كىمنىڭ كىنالى, كىمنىڭ جابىرلەنۋشى ەكەنىن ءوز بەتىنشە انىقتاپ, كەلىسسە; جازاتايىم وقيعا ءۇشىنشى تۇلعالاردىڭ دەنساۋلىعىنا نەمەسە مۇلكىنە زيان كەلتىرمەسە.قازاقستانداعى بارلىق جول-كولىك وقيعاسىنىڭ 40 پايىزعا جۋىعىندا كەلتىرىلگەن زالال مولشەرى 100 اەك-تەن (369 200 تەڭگە) اسپايدى, سوندىقتان بۇل مەحانيزم كوپتەگەن كولىك يەسىنە جەڭىل جازاتايىم وقيعالاردى تىركەۋدى جەڭىلدەتەدى. جاڭا قىزمەتتىڭ تاعى ءبىر ارتىقشىلىعى – كولىك كەپتەلىسىن ازايتۋ. ەندى پوليتسيا قىزمەتكەرلەرىن كۇتۋدىڭ قاجەتى جوق. ماسەلەنىڭ ءبارىن ءوزىڭىز شەشە الاسىز.
سونداي-اق ساقتاندىرۋ كومپانياسى جول-كولىك وقيعاسىنىڭ ءاربىر قاتىسۋشىسىنا (جىل سايىن 200 مىڭنان استام جۇرگىزۋشى جول-كولىك وقيعاسىنا ۇشىرايدى) ساقتاندىرۋ وتەماقىسىن قاعازباستىلىققا ۇرىنباي جانە جىلدام الۋ مۇمكىندىگىن بەرۋدى كوزدەيدى. بۇل ساقتاندىرۋ تولەمدەرىن رەتتەۋ ۇدەرىستەرىن تسيفرلاندىرۋ ارقىلى عانا مۇمكىن بولدى. بيىل ساقتاندىرۋ كومپانيالارى سالانى تسيفرلاندىرۋدى جالعاستىرۋدى جوسپارلاپ وتىر. مىسالى, Freedom Insurance ەرىكتى اۆتوكولىكتى ساقتاندىرۋدى تسيفرلاندىرۋ بويىنشا جۇمىستى جالعاستىرا بەرەدى. تسيفرلاندىرۋ جانە جاساندى ينتەللەكتىنى پايدالانۋ Freedom Finance-كە وتكەن جىلى ساتۋ كولەمىن ەكى ەسە ارتتىرۋعا مۇمكىندىك بەردى. 2023 جىلى كومپانيا اكتيۆتەرىن 100 ملرد تەڭگەگە دەيىن ۇلعايتتى (2022 جىلدىڭ سوڭىندا – 33,65 ملرد تەڭگە). جىل ىشىندە مەنشىكتى كاپيتال 5,27 ميللياردتان 20 ميللياردقا دەيىن ءوستى. كومپانيانىڭ ساتىلىمى ءبىر جىلدا ەكى ەسە كوبەيدى: 2023 جىلدىڭ 11 ايىنىڭ قورىتىندىسى بويىنشا ولار 21,5 ميلليارد تەڭگەنى قۇرادى.
ازامات كەرىمباەۆ,
ساراپشى