بۇل ءانشى قىز ەلىمىزگە ەڭ العاش رەت ديماشتىڭ «ۇمىتىلماس كۇن» ءانىن قازاق جانە اعىلشىن تىلدەرىندە ورىنداپ تانىمال بولدى. پورتۋگاليالىق لارا الەيشو سول كەزدەن بەرى بىرنەشە قازاق انىنە كاۆەر جاساپ, ءتىپتى ەلىمىزدە وتكەن «Voice وf Nur-Sultan» جانە «Voice of Turan 2023» فەستيۆالدارىنا دا قاتىستى. بۇگىندە YouTube-تا ونىڭ ورىنداعان «دۋدار-اي», «تاپتىم-اۋ سەنى» اندەرى كوپ كورىلىم جينادى. ءبىز قازاق مۋزىكاسىنا اڭسارى اۋعان شەتەلدىك انشىگە حابارلاسىپ, سۇراعىمىزدى قويدىق.
– لارا, ەڭ الدىمەن مۋزىكا الەمىندەگى اياق الىسىڭ جايىندا ايتىپ بەرسەڭىز. قانشا جاستان ءان ايتا باستادىڭىز؟
– مەنىڭ جاسىم 23-تە. قازىرگى ۋاقىتتا جوعارى وقۋ ورنىندا مەنەدجمەنت فاكۋلتەتىندە ءبىلىم الىپ جاتىرمىن. سونىمەن بىرگە مۋزىكامەن, ياعني ءان ايتۋمەن دە اينالىسامىن. مەنىڭ انام – ءانشى. سول كىسىگە ەلىكتەپ, 3 جاسىمنان ءان ايتا باستادىم.
– ديماشقا دەيىن قازاقستان تۋرالى ەستىدىڭىز بە؟
– ءيا, ەستىدىم. سىزدەردىڭ ەلدەرىڭىز جايىندا كەي مالىمەتتى بىلگەنىممەن, مەن ونى كوز الدىما باسقاشا ەلەستەتەتىنمىن. كەيىن جاقىن تانىسا كەلە قازاقستاننىڭ قانداي ادەمى ءارى تاڭعاجايىپ ەل ەكەنىنە كوزىم جەتتى.
– قاتەلەسپەسەم, قازاق مۋزىكاسىنا دەگەن قىزىعۋشىلىعىڭىز ديماشتان باستالدى. ونىڭ اندەرىن العاش رەت قاشان تىڭداپ ەدىڭىز؟
– ءيا, راس ايتاسىز, ءبارى ديماشتان باستالدى. العاش رەت ونىڭ «I am singer» جوباسىندا «All by myself» ءانىن ورىنداعانىن ەستىدىم. YouTube ارناسىندا سول ءاندى تاماشالاعاندا قاتتى قايران قالدىم. «ادام بالاسىندا مۇنداي داۋىس بولۋى مۇمكىن بە؟» دەگەن وي كەلدى. شەكسىز تالانت. مەن ديماشتىڭ ۇنىنە ۇقسايتىن داۋىستى ەشۋاقىتتا كەزدەستىرگەن ەمەسپىن. ءتىپتى تەڭدەسسىز تۇڭعيىق دەسەم بولادى. كەيىن ونىڭ جەكە اندەرىن تىڭداي كەلە, قازاق تىلىنە عاشىق بولدىم.
– سول كەزدەن باستاپ بىرنەشە قازاق ءانىن ورىنداپ, ونەرسۇيەر تىڭدارمانىمىزدىڭ ىقىلاسىنا بولەندىڭ. ەكى رەت قازاقستانعا كەلىپ, ساحنادا ءان ايتتىڭىز. ەلىمىز, قازاق حالقى ۇنادى ما؟
– ءيا, مەن ەلدەرىڭىزدە ەكى رەت بولدىم. قازاق – ناعىز قوناقجاي حالىق. قازاقتار ەتى ءتىرى ءارى جۇرەگى كەڭ ادامدار ەكەنىن بايقادىم. قازاقستاننىڭ تاۋلارى دا, تابيعاتى دا عاجاپ. ءبىر بارعاننان كەيىن قايتا-قايتا بارعىڭ كەلەدى. ال قازاق اندەرى مەنىڭ جۇرەگىمدى جاۋلاپ الدى. ولاردىڭ وزىنە ءتان ەرەكشەلىگى بار.
– ماسەلەن, قانداي ەرەكشەلىك بايقادىڭىز؟ باسقا حالىقتاردىڭ اندەرىنە, سونىڭ ىشىندە پورتۋگال اندەرىنە ۇقسامايتىن تۇستارى بار ما؟
– قازاق اندەرىنىڭ قۇرىلىمى باسقا حالىقتاردان, مىسالى پورتۋگال اندەرىنەن قاتتى ەرەكشەلەنەدى. مۋزىكالىق اسپاپتاردىڭ قولدانىسىندا دا ايىرماشىلىقتار بار. كومپوزيتسياسى باسقاشا. قازاق اندەرىندە ەموتسيانىڭ كوپتىگى سونداي, ءتىپتى ونىڭ ءسوزىن تۇسىنبەسەڭ دە, ايتىلىپ جاتقان ويدى جان-دۇنيەڭمەن سەزىنەسىڭ. ءبىز, پورتۋگاليالىقتار دا, ەموتسيالىق اندەردى جاقسى كورەمىز. وسى جاعىنان ەكى حالىق ءبىر-بىرىنە ۇقساس دەپ ايتا الامىن.
– ال قازاقشا ءان ورىنداۋ, ونىڭ سوزدەرىن ايتۋ قيىن بولمادى ما؟
– شىن مانىندە وتە قيىن. ادامداردىڭ كومەگىمەن ونى دا ۇيرەنىپ جاتىرمىن, بىراق قيىنداۋ ەكەنى راس. ويتكەنى قازاق ءتىلىنىڭ دىبىستارى ءبىزدىڭ تىلىمىزدەن قاتتى ەرەكشەلەنەدى. دەگەنمەن ۋاقىت وتە كەلە وعان دا جاتتىعامىن دەپ ۇمىتتەنەمىن.
– قازاقستاندا بولىپ, قازاقتارمەن جاقىن تانىستىڭىز. مادەنيەتىمىزدە, دىلىمىزدە, داستۇرىمىزدە سىزدەرمەن ۇقساستىقتارىمىز بار ما؟
– ەكى حالىققا دا ورتاق قۇندىلىقتار بار. مىسالى, ادامدارعا كومەكتەسۋ جانە ءىلتيپاتتى قارىم-قاتىناس جاساۋ جاعىنان ۇقساسپىز. ءبىز دە سىزدەر سەكىلدى باسقا ەلدەن كەلگەن قوناقتارعا جىلى قاباق تانىتىپ قابىلداۋدى, ولارعا بار جىلى-جۇمساعىمىزدى ۇسىنعاندى جاقسى كورەمىز. بىراق مەنتاليتەتىمىز ءارتۇرلى. ءداستۇرىمىز دە وزگەشە.
– الداعى ۋاقىتتا تاعى قانداي قازاقشا انگە كاۆەر جاساۋ ويىڭىزدا بار؟ ءاندى تاڭدادىڭىز با؟
– مەن كەلەشەكتە دە كوپ قازاقشا ءان ورىنداعىم كەلەدى. ازىرگە كەزەكتى ءاندى تاڭداۋ ۇستىندەمىن. جاقىن كۇندەرى ونى دا الەۋمەتتىك جەلىدە بولىسەمىن.
– جۋىردا ينستاگرامدا قازاق تىلىندە جاڭا ءان جازعىڭ كەلەتىنىن ايتتىڭىز. بۇل باعىتتا قانداي جاڭالىقتارىڭىز بار؟
– ءيا, مەن قازاقشا جانە پورتۋگالشا ءان جازسام دەپ ءجۇرمىن. ول ءۇشىن قازاقستاننان ءانشى شاقىرىپ, دۋەت بولىپ ايتۋ ويىمدا بار.
– العا قويعان جوسپارلارىڭىزبەن بولىسە وتىرساڭىز. اسىرەسە قازاقستانمەن بايلانىستى قانداي جوبالارىڭىز بار؟
– قازىر ءبىر عانا ماقساتىم – مۋزىكامەن شۇعىلدانۋ, ءان ايتۋ. تاعى دا قازاقستانعا بارىپ ءان ايتسام دەيمىن.
– اڭگىمەڭىزگە راحمەت!
اڭگىمەلەسكەن –
ەسكەندىر زۇلقارناي,
«Egemen Qazaqstan»