وسىدان 10 جىل بۇرىن جوعارعى سوت رەسمي سايتىندا ونلاين سەرۆيستەرگە جانە سوت ورگاندارىنىڭ قىزمەت كورسەتۋلەرىنە قولجەتىمدىلىكتىڭ جالعىز تەرەزەسى – «سوت كابينەتى» ەلەكتروندىق جوباسىن ىسكە قوستى. ارنايى سىلتەمە ارقىلى وتسەڭىز, سوت كابينەتىمەن جۇمىس جونىندەگى انىقتامادا وسى ەلەكتروندى سەرۆيستى قالاي پايدالانۋعا بولاتىنى رەتىمەن كورسەتىلگەن.
«سوت كابينەتى» – سوت ورگاندارىنا ارىز, ءوتىنىش, شاعىم مەن ءوتىنىش حاتتاردى, سونداي-اق حاتتاردى جىبەرۋگە ارنالعان سەرۆيس. ول ءۇشىن سوتقا جۇگىنۋشى الدىمەن حقو-دان ەلەكتروندىق تسيفرلىق قولتاڭبا الۋى قاجەت. پورتالعا وتكەننەن كەيىن ارىز بەرۋشى ەلەكتروندىق قىزمەت كورسەتۋدىڭ ىشىنەن وزىنە كەرەك بولىگىن وڭاي تاڭداي الادى. قاعازسىز ەلەكتروندىق قۇجات اينالىمى ارقىلى سوت قۇجاتتارىن جانە ىستەردى ىزدەۋگە, مەملەكەتتىك باجدى ونلاين تۇردە تولەۋگە, ءىستى قاراۋ بارىسىن قاداعالاۋعا بولادى.
«سوت كابينەتى» سەرۆيسىنىڭ قاعاز تۇرىنەن ەرەكشەلىگى تالاپ قويۋ ءۇشىن ارىز بەرۋشى پورتالعا ءتيىستى دەرەكتەردى قامتيتىن ەلەكتروندىق تالاپ نىسانىن تولتىرا الادى. ەلەكتروندىق قۇجات نىسانىندا تالاپ جانە قۇجاتتاردىڭ باسقا دا كوشىرمەلەرى قوسا تىركەلەدى. ارىزدىڭ اتريبۋتتارىن ەنگىزگەننەن كەيىن, قاجەت بولعان جاعدايدا تالاپ بەرۋشى مەملەكەتتىك باج سالىعىن تولەي الادى. وسىدان كەيىن ەلەكتروندىق تالاپ قويۋعا ارىز بەرۋشىنىڭ ەلەكتروندىق ساندىق قولتاڭباسىمەن قول قويىلىپ, بىرىڭعاي اۆتوماتتاندىرىلعان اقپاراتتىق-تالداۋ جۇيەسى ورتالىعىنا جىبەرىلەدى.
«سوت كابينەتى» ەلەكتروندىق جۇيەسى ارقىلى جولدانعان تالاپ قويۋلار بويىنشا ىستە تاراپتار سوتقا كەلمەي-اق, وسى جۇيەگە كىرۋ ارقىلى ءىس قۇجاتتارى, ماتەريالدار, سوت شىعارعان قۇجاتتار, سوت حاتتاماسىن بەرۋ تۋرالى ارىز, حاتتاماعا ەسكەرتۋ-ارىزدى بەرۋگە جانە سوت اكتىلەرىمەن تانىسىپ, كوشىرمەلەرىن الۋ قۇقىعىنا يە بولادى.
ەلەكتروندىق تسيفرلىق قولتاڭبانى قولدانا وتىرىپ, ەلەكتروندىق قاداعالاۋ ءىس جۇرگىزۋىنە قولجەتىمدىلىكتى قامتاماسىز ەتەتىن «سوت كابينەتى» – قاعاز قۇجات اينالىمىنان بىرتىندەپ باس تارتىپ, سوتتاردا ەلەكتروندىق سوت ءىسىن جۇرگىزۋدىڭ جاڭا ساتىسىنا كوشۋ دەگەندى اڭعارتادى.
ايان التىنباەۆ,
جالاعاش اۋداندىق سوتىنىڭ اكىمشى باسشىسى
قىزىلوردا وبلىسى