سەناتتىڭ حالىقارالىق قاتىناستار, قورعانىس جانە قاۋىپسىزدىك كوميتەتىنىڭ دەپۋتاتتارى ەلىمىزدىڭ ۇلتتىق قورعانىس ۋنيۆەرسيتەتىندە بولىپ, جاستارعا اسكەري-پاتريوتتىق تاربيە بەرۋ ماسەلەلەرىن تالقىلادى.
كوميتەت توراعاسى اندرەي لۋكين مەملەكەت باسشىسى قاسىم-جومارت توقاەۆ اسكەري ءبىلىم بەرۋدى جەتىلدىرۋ جانە اسكەري قىزمەتشىلەردىڭ قازاقستاندىق ءپاتريوتيزمىن قالىپتاستىرۋ ماسەلەسىنە ەرەكشە نازار اۋدارىپ وتىراتىنىن اتاپ ءوتتى.
«پاتريوتتىق تاربيە ماسەلەسى بارلىق مەملەكەتتىك ورگانداردا وسى سالا بويىنشا كەشەندى شارالاردى جۇزەگە اسىرۋدى كوزدەيدى. الايدا مەكەمەارالىق ءوزارا ءىس-قيمىل مەن جۇيەلى ءتاسىلدىڭ بولماۋى, ءبىلىم بەرۋ ۇدەرىسىندە تاربيە جۇمىسى ماڭىزىنىڭ تومەندەۋى جانە وڭ ناتيجەنى كوتەرمەلەۋ مەن ەسەپكە الۋ تەتىگىنىڭ بولماۋعا ءتيىستى ناتيجە بەرمەيدى جانە اسكەري-پاتريوتتىق تاربيە جۇيەسىن ودان ءارى جەتىلدىرۋدى تالاپ ەتەدى», دەدى سەناتور ا.لۋكين.
ۋنيۆەرسيتەت باسشىسى, گەنەرال-مايور اسقار مۇستابەكوۆ ءوز كەزەگىندە پارلامەنتشىلەرگە جوعارى وقۋ ورنىنىڭ جۇمىسى مەن جاستارعا اسكەري-پاتريوتتىق تاربيە بەرۋ جونىندەگى 2025 جىلعا دەيىن ەسەپتەلگەن باعدارلامانى ىسكە اسىرۋ تۋرالى ايتىپ بەردى. وندا مەملەكەتتىك قۇرىلىمدار مەن ازاماتتىق قوعامنىڭ جاستاردىڭ اسكەري قىزمەتكە ىنتا-جىگەرىن قالىپتاستىرۋ مەن اسكەرگە شاقىرىلعانعا دەيىنگى دايىندىقتىڭ اۋقىمدى ماسەلەلەرىن شەشۋدەگى ءوزارا ءىس-قيمىلدىڭ نەگىزى قالانعان.
ۋنيۆەرسيتەت ۇجىمى كەزدەسۋ بارىسىندا وسى سالاداعى زاڭنامانى جەتىلدىرۋگە قاتىستى ماسەلەلەردى كوتەردى. سەناتورلار ءوز كەزەگىندە سوڭعى جىلدارى اسكەري قىزمەتشىلەردىڭ الەۋمەتتىك قورعالۋىن جاقسارتۋ جانە جاستاردىڭ اسكەري بورىشىن وتەۋگە ىنتا-ىقىلاسىن ارتتىرۋ جونىندە بىرقاتار زاڭنامالىق اكتى قابىلدانعانى تۋرالى ايتىپ بەردى. سونداي-اق بۇگىنگى تاڭدا پارلامەنتتە اسكەري-پاتريوتتىق تاربيە ماسەلەلەرى جونىندەگى زاڭ جوباسى بويىنشا بەلسەندى جۇمىس جۇرگىزىلىپ جاتقانىن حابارلادى.