تاريحتا تۇڭعىش رەت قازاقستان كومپوزيتورىنىڭ وپەراسى ۇلىبريتانيانىڭ ءتورت قالاسىندا ورىندالادى. 2024 جىلدىڭ 17 اقپانىندا گلازگو سوبورىندا «بولاشاق» باعدارلاماسىنىڭ دوكتورانتى, كومپوزيتور-پيانيست راحات-بي ابدىساگيننىڭ «بريۋس» وپەراسىنىڭ الەمدىك پرەمەراسى وتەدى, دەپ جازادى Egemen.kz «حالىقارالىق باعدارلامالار ورتالىعىنا» سىلتەمە جاساپ.
وپەرا شوتلانديا كورولى روبەرت I بريۋس تۋرالى باياندايدى. وپەرا وتكەن مەن بولاشاق اراسىنداعى مۋزىكالىق كوپىرگە اينالادى جانە شوتلانديالىق ۇلى مونارحتاردىڭ ءبىرى, تاۋەلسىزدىك ءۇشىن كۇرەسكەر تۇلعاسىن اشادى.
ليبرەتتو دجون باربۋردىڭ 1375 جىلى جازىلعان ورتاعاسىرلىق «بريۋس» پوەماسىنا نەگىزدەلگەن جانە راحات ءبيدىڭ شوتلانديا كورولدىك كونسەرۆاتورياسى مەن سەنت-ەندريۋس ۋنيۆەرسيتەتىندەگى دوكتورلىق زەرتتەۋلەرىنىڭ نەگىزگى بولىگىن قۇرايدى.
شىعارما سوبورلىق وپەرا, سوبوردىڭ اكۋستيكالىق زالىندا ورىنداۋعا ارنالعان جاڭا جانرعا جاتادى. كومپوزيتور راحات-ءبيدىڭ ايتۋىنشا, وپەرا بوستاندىق پەن ىزگىلىك, كىسىلىك پەن كۇش, كۇرەس پەن تاباندىلىق, ءبىر ادامنىڭ تۇتاس ءبىر حالىقتىڭ ءومىرىن تۇبەگەيلى وزگەرتە الاتىندىعى تۋرالى سىر شەرتەدى.
پرەمەرا روبەرت ءبريۋستىڭ تۋعانىنا 750 جىل تولۋىنا ورايلاستىرىلعان جانە ۇلىبريتانيانىڭ ءتورت كورنەكتى سوبورىندا وتەدى: 17 اقپاندا گلازگو سوبورىندا, 21 اقپان كۇنى ەدينبۋرگتەگى سەنت-دايلس سوبورىندا, 24 اقپاندا اۋليە سالۆاتور كاپەللاسىندا, اۋليە ەندريۋس ۋنيۆەرسيتەتىندە, 3 ناۋرىزدا دانفەرملاين ابباتتىعىندا. بۇل جەر روبەرت ءبريۋستىڭ جەرلەنگەن ورنى.
قويىلىمدا شوتلانديا كورولدىك كونسەرۆاتورياسىنىڭ وپەرا انشىلەرى مەن ديريجەرلەر ونەر كورسەتەدى. اكتەرلەر قۇرامىندا روبەرت ءبريۋستى وينايتىن اكتەر (تەنور), وقىرمان, انشىلەر ءانسامبلى جانە ورگان بار. ورگان پارتياسىن راحات-بي ابدىساعيننىڭ ءوزى سومدايدى.
اريستوكراتيالىق بريۋس اۋلەتى وپەرانى ۇيىمداستىرۋعا جان-جاقتى قولداۋ كورسەتەدى. وپەرانىڭ العى ءسوزىن بريۋس كلانىنىڭ 37-ءشى باسشىسى ەلگين گرافى مەن كينكاردين ەندريۋ بريۋس جازعان. بريۋس كلان سونىمەن قاتار ترۋپپانىڭ ارتىستەرىنە تاريحي ءداۋىردى جاڭعىرتۋ ءۇشىن كوستيۋمدەر بەرۋگە كومەكتەستى.
راحات-بي ابدىساعين 1999 جىلى تۋعان. كومپوزيتور جانە پيانيست, ونەرتانۋ ماگيسترى, «دارىن» مەملەكەتتىك سىيلىعىنىڭ لاۋرەاتى. 2022 جىلى «بولاشاق» ستيپەندياسىمەن شوتلانديا كورولدىك كونسەرۆاتورياسىنا مۋزىكا ماماندىعى بويىنشا دوكتورلىق زەرتتەۋگە باردى. 10 جاسىنان مۋزىكا جازدى, 13 جاسىندا قۇرمانعازى اتىنداعى قۇك ستۋدەنتى, 17 جاسىندا قازۇوۋ-ءدىڭ ماگيسترانتى بولدى, پ.ي.چايكوۆسكي اتىنداعى ماسكەۋ مەملەكەتتىك كونسەرۆاتورياسىندا تاجىريبەدەن ءوتتى, 18 كانديداتتىق ديسسەرتاتسيا قورعادى. 20 جاسىندا ول يتاليانىڭ ەڭ بەدەلدى ءۇش ۋنيۆەرسيتەتىندە اسپيرانتۋرانى اياقتادى. شىعارمالارى باح, گايدن, موتسارتتان باستاپ قازىرگى زامانعى كلاسسيكاعا دەيىن الەمدىك كلاسسيكانىڭ جاۋھارلارى جيناقتالعان وڭتۇستىك يللينويس ۋنيۆەرسيتەتىنىڭ «ديسكوگرافيا» فورتەپيانو مەن وركەسترگە ارنالعان بۇكىلالەمدىك ورىندالاتىن شىعارمالار قورىنىڭ جيناعىنا ەنگەن جالعىز وتاندىق كومپوزيتور.
150-دەن استام مۋزىكالىق شىعارمالاردىڭ, عىلىمي ماقالالار مەن كىتاپتاردىڭ اۆتورى. ول ءۇش وپەرا جازدى: «كۇن نۇرلى جول», «بەيتانىس» جانە «بريۋس». راحات-ءبيدىڭ اندەرى ەۋروپانىڭ, ازيانىڭ جانە امەريكانىڭ ايگىلى كونتسەرتتىك زالدارىندا شىرقالىپ ءجۇر.