بيىل قىستا ەلىكتەر پاۆلودار قالاسىن ءجيى جاعالاپ ءجۇر. وزەن ماڭايىنداعى جايىلمالاردى مەكەندەيتىن جانۋارلار كەيبىر ساتتە قالا كوشەلەرىن كەزىپ, ازىق ىزدەيتىنگە ۇقسايدى.
ەرتىس وزەنىنىڭ جايىلماسىندا بۇگىندە شامامەن 1 360 ەلىك بار دەپ ەسەپتەلەدى. مەملەكەتتىك تابيعي قاۋمالدا اڭشىلىق جاساۋعا تىيىم سالىنعان. ورماندى جەرلەردىڭ كوبىندە قار سونشالىقتى قالىڭ ەمەس. ەلىكتەردىڭ تەبىندەپ جايىلۋىنا مۇمكىندىك مول. دەيتۇرعانمەن تۇرعىندار جانۋارلاردىڭ شاھاردى ءجيى ۇيىرسەكتەي باستاعانىن تۇسىنە الماي دال.
ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ باسشىسى رۋسلان تولەپباەۆتىڭ سوزىنشە, «ەرتىس جاعالاۋى» تابيعي قاۋمالى 2017 جىلدان باستاپ مەملەكەتتىك مارتەبەگە يە بولعالى بۇل جەرلەردە جابايى جانۋارلاردىڭ سانى ەسەلەپ ءوسىپ كەلەدى. اڭشىلىققا تىيىم سالىنعانى سەبەپتى ەلىكتەر, وزگە دە ءتۇز تاعىلارى ەركىنسىپ, قالاعا ءجيى كەلگىشتەيدى.
– ەلىكتەر كوبىنە وزەن بويىنداعى توعايلار اراسىن مەكەندەيدى. اشىق الاڭقايلاردا, ويپاڭ جەرلەردە قار قالىڭ ءتۇسىپ, تەبىندەۋىنە كەدەرگى كەلتىرىپ جاتۋى عاجاپ ەمەس. قالاعا ازىق ىزدەپ كەلىپ جۇرگەن بولۋى كەرەك. جالپى, بۇل جاعداي بىلتىردان بەرى بايقالىپ وتىر. بۇعان قوسا جايىلماداعى قاۋمالعا ەرەكشە مارتەبە بەرىلىپ, اڭشىلىقتىڭ كەز كەلگەن تۇرىنە تىيىم سالىنعالى جانۋارلار ادامدار تۇراتىن ەلدى مەكەندەرگە قاراي جاقىنداي باستاعانى بايقالادى. قازىرگى كۇنى جايىلما ماڭايىندا 1 360 ەلىك بار دەپ ەسەپتەلەدى. ال وبلىس بويىنشا بىلتىر كۇزدە ءبىزدىڭ ورمانشىلار 4 225 ەلىكتى سانادى, – دەيدى ينسپەكتسيا باسشىسى.
جەرگىلىكتى ورمانشىلار ەلىكتەر كوپ جۇرەتىن الاڭقايلاردا 78 وتتىق جاساپ, ءار ون كۇن سايىن ول جەرلەرگە جانۋارلار جەيتىن ازىق اپارىپ سالادى. وتتىقتار كوبىنە جانۋارلاردىڭ ىزدەرىنە قاراي قۇرىلادى. ورمانشىلار بيىل جايىلماداعى سۇتقورەكتىلەر ءۇشىن 3 توننا ءشوپ, 500 بۇتاقتى بۋما جانە 14 كگ تۇز دايىنداعان. قورىقشىلار بۇعان قوسا مىڭداعان شارشى مەتر جەردىڭ قارىن ارشىپ, ەلىكتەردىڭ وتتىقتارعا كەدەرگىسىز جەتۋىنە مۇمكىندىك تە جاساپ قويىپتى.
جايىلمانى ەلىكتەن وزگە اقبوكەن, جابايى شوشقا, ورمان سۋسارى, جانات ءتارىزدى يت جانە بۇلان مەكەندەيدى.
پاۆلودار وبلىسى