ارگەنتينا الدىرمادى

العاشقى بولىپ دميتري پوپكو (338 اتر) مەن فرانسيسكو چەرۋندولو (22 اتر) كورتقا شىقتى. بۇل تەننيسشىلەردىڭ دەڭگەي ايىرماشىلىعى جەر مەن كوكتەي. اتر رەيتينگىندە 22-ورىنعا تۇراقتاعان ارگەنتينانىڭ وكىلى بىلتىر رولان گارروستىڭ ءتورتىنشى كەزەڭىنە دەيىن جەتىپ, بوستاد پەن يستبورندەگى تۋرنير­لەردە توپ جاردى. پوپكو ۇزدىكتەر تىزى­مىندە 338-ورىندا تۇر. سول سەبەپتى دە جەرگىلىكتى سپورتشىعا جەرلەسىمىزدى جەڭۋ ايتارلىقتاي قيىندىق تۋعىزعان جوق. ەسەپ – 7:5, 6:2.

كوپ كەشىكپەي تيموفەي سكاتوۆ پەن توماس مارتين ەتچەۆەرري شەبەرلىك بايقاستى. بۇل كەزدەسۋدىڭ ءفاۆوريتى كورت قوجايىنى ەدى. ول بىلتىر رولان گارروستىڭ شيرەك فينالىنا شىعىپ, بيىل اۋستراليانىڭ اشىق بىرىنشىلىگىنىڭ ءۇشىنشى اينالىمىندا ءسۇرىندى. دەسەك تە اتر رەيتينگىندە 278-ساتىعا جايعاسقان وتانداسىمىز الەمنىڭ 28-راكەتكاسىنان 6:4, 7:5 ەسەبىمەن ايلاسىن اسىردى.

كەلەسى كۇنگى جارىس باعدارلاماسى جۇپتىق باسەكەلەردەن باستالدى. وكى­نىشكە قاراي, الەكساندر نەدوۆەسوۆ پەن دميتري پوپكو ماكسيمو گونسالەس پەن اندرەس مولتەنيدەن 7:6, 4:6, 0:6 ەسەبىمەن ۇتىلدى. ودان كەيىن تيموفەي سكاتوۆ پەن فرانسيسكو چەرۋندولونىڭ تارتىسىن تاماشالادىق. ءبىرىنشى سەتتە ارگەنتينالىق تەننيسشى 4:1 ەسەبىمەن العا شىققاندا ءۇمىتىمىز ۇزىلگەندەي بولدى. وسى جولى جەڭىلسەك, بۇل جارىس ءبىز ءۇشىن مەرزىمىنەن بۇرىن اياقتالاتىن ەدى. بىراق تيموفەيدىڭ جۇيكەسى تەمىر ەكەن. ول ويىندى تاي-برەيككە دەيىن جەتكىزىپ, جەڭىستى قارسىلاسىنىڭ ۋىسىنان ج ۇلىپ الدى. ەكىنشى سەتتە دە وتانداسىمىز شابىسىنان جاڭىلعان جوق. ەسەپ – 7:6, 6:4.

تارازى باسى تەڭسەلىپ تۇرعاندا دميتري پوپكو مەن الەمنىڭ 26-راكەتكاسى سەباستيان باەس كورتقا شىقتى. العاشقى ەكى سەت تەڭ اياقتالدى – 6:4, 3:6. شە­شۋشى تۇستا ەكەۋى دە بارىن سالدى. كەز­دەسۋ تاي-برەيككە دەيىن ۇلاسىپ, بۇل جولى باەۆتىڭ باعى جاندى – 7:6. ءسويتىپ, بەس باسەكەنىڭ قورىتىندىسى بويىنشا قازاقستان قۇراماسى ارگەنتينا تەننيسشىلەرىنەن 2:3 ەسەبىمەن ۇتىلدى. ەندى جەرلەستەرىمىز قىركۇيەك ايىندا پلەي-وفف تۋرنيرىندە باق سىنايدى. جەڭىسكە جەتكەن جاعدايدا ولار دەۆيس كۋبوگىنىڭ ىرىكتەۋ سايىستارىنا قايتا قاتىسادى. ال وتاندىق تەننيس­شىلەرىمىزدىڭ پلەي-وففتا كىممەن كەزدە­سەتىنى ءسال كەيىنىرەك بەلگىلى بولادى.