كەشە تۇركىستان قالاسىنداعى جالدامالى پاتەرلەردىڭ بىرىنەن 2 بالانىڭ ءمايىتى تابىلىپ, قابىلدانعان شارالار ناتيجەسىندە شىمكەنت قالاسىنداعى قوناقۇيدەن سول بالالاردىڭ اناسى كۇدىكتى رەتىندە قاماۋعا الىنعان ەدى. ول قىزىلوردا وبلىسىنىڭ تۇرعىنى بولىپ شىقتى, دەپ جازادى Egemen.kz.
وسىعان بايلانىستى قىزىلوردا وبلىستىق ءبىلىم باسقارماسىنىڭ باسشىسى اسقاربەك ەسجانوۆ كۇدىكتىنىڭ 2014 جىلدان باستاپ شيەلى اۋدانىنداعى ءبىلىم بەرۋ ۇيىمدارىنىڭ بىرىندە مۇعالىم بولىپ قىزمەت اتقارعانىن راستادى. وقيعا بولعان كۇنى, 7 اقپاندا مەكتەپ اكىمشىلىگىن ەسكەرتۋسىز جۇمىسقا بارماي قالىپتى. ارىپتەستەرىنىڭ ايتۋىنشا ول ۇجىممەن, اتا-انا, وقۋشىلارمەن ءتىل تابىسا الاتىن مۇعالىم بولىپتى. بالالاردى وقىتۋ مەن تاربيەلەۋدە بىرقاتار جەتىستىككە دە جەتكەن ەكەن.
«جۇبايى, بالالارى, اتا-ەنەسى بار كادىمگى تولىق وتباسى. ونى بۇل جاعدايعا نە يتەرمەلەگەنى تۇسىنىكسىز. بۇگىن قايعى تارتىپ وتىرعان وتباسىنا بارىپ, كوڭىل ايتىپ قايتتىم», دەيدى باسقارما باسشىسى.