سەنات دەپۋتاتى بيبىگۇل جەكسەنباي Facebook-تەگى پاراقشاسىندا ۇكىمەت الدىندا تۇرعان ماقساتتار ءتۋرالى وز ويىن ورتاعا سالدى, دەپ حابارلايدى Egemen.kz.
«مەملەكەت باسشىسىنىڭ جارلىعىمەن ولجاس اباي ۇلى بەكتەنوۆ قازاقستان رەسپۋبليكاسىنىڭ پرەمەر-ءمينيسترى قىزمەتىنە تاعايىندالدى. ولجاس بەكتەنوۆ – مەملەكەت ساياساتىن جۇزەگە اسىرۋدا تاجىريبەلى مەملەكەتتىك قىزمەتشى. ولجاس اباي ۇلى زاڭ سالاسىندا دا, سىبايلاس جەمقورلىققا قارسى ءىس-قيمىل جۇمىسىندا دا ناتيجەلى قىزمەت ەتتى. ونىڭ ءبىلىمى مول, ۇيىمداستىرۋ قابىلەتى جوعارى, سالماقتى, ادال, ەڭبەكقور ازامات. سوندىقتان دا جاڭا قىزمەتى مەن مىندەتىن قالتقىسىز ورىندايدى دەگەن سەنىم جوعارى.
مەملەكەت باسشىسى قاسىم-جومارت كەمەل ۇلى ۇكىمەتتەن الداعى ۋاقىتتا باتىل شەشىمدەر مەن ەلدىڭ دامۋى ءۇشىن تىڭ سەرپىن كەرەكتىگىن قاداپ ايتتى.
ەل پرەزيدەنتىنىڭ باستامالارى حالىق كۇتكەندەي ۋاقتىلى جۇزەگە اسۋى - ۇكىمەت پەن جەرگىلىكتى بيلىككە تىكەلەي بايلانىستى ەكەنى راس. وتىرىك سانداردى ويناتىپ, قۇرعاق ۇادەلەر ءۇيىپ-توگىپ ءجۇرۋدىڭ ۋاقىتى ءوتتى. ءار كۇن, ءار اي ساناۋلى. سايلاۋشىلارمەن كەزدەسۋلەردە بىزدەن سۇرايتىن دا ناقتى ناتيجە. ءبىزدىڭ ۇكىمەتكە دەپۋتاتتىق ساۋال جولداپ, ماسەلەلەردى كوتەرۋدىڭ دە ءتۇپ نەگىزى سول. بيۋدجەتتىڭ ءار تيىنى ۇنەمدى پايدالانىلۋى مەن جەمقورلىققا جول بەرىلمەۋى قاتال دا, قاتاڭ باقىلاۋ مەن شيراق قيمىلدى قاجەت ەتەدى. كاسىبي, ىسكەرلىگى مەن ەڭبەك ونىمدىلىگى اسا جوعارى, باستىسى باعدارلاما, جوسپار ءۇشىن ەمەس, حالىق ءۇشىن ناقتى قيمىل جاسايتىن ۇكىمەتكە ەل ءزارۋ.
وسىناۋ جاۋاپتى كەزەڭدە قازاقستان ۇكىمەتىن باسقارۋ 26-شى پرەمەر-مينيستر رەتىندە قىرىقتىڭ قىرقاسىنان اسقان گەنەرال-لەيتەنانت ولجاس بەكتەنوۆكە بۇيىردى. قازاقتا «قىرىقتا قامال الار» دەپ ەڭ جاۋاپتى جۇمىسقا وسى جاستا باعىتتاۋ ەجەلدەن بار. ولجاس اباي ۇلى ورتالىق جانە وبلىستىق بيلىك ورگاندارىندا دا تاجىريبە جيناپ ۇلگەردى. ءار سالاداعى قىزمەتى بارىسىندا مەملەكەت باسشىسىنا ادال, قاتال دا ءپرينتسيپشىل باسشى ەكەنىن كورسەتتى .
سىبايلاس جەمقورلىقپەن كۇرەسۋ, زاڭسىز الىنعان اكتيۆتەردى قايتارۋ, پرەزيدەنت تاپسىرمالارىنىڭ ورىندالۋىن قاداعالاۋ بويىنشا جاقسى ناتيجەلەر بايقاتتى.
پرەزيدەنت اكىمشىلىگىنىڭ باسشىسى لاۋازىمىندا دا باسقارۋ جۇيەسى جۇمىسىن وڭتايلاندىرىپ, ونى ناقتى ناتيجەلەرگە باعىتتاي الاتىن كۇشتى جانە شەشۋشى ۇيىمداستىرۋشىلىعىمەن كوپشىلىك كوزىنە ءتۇستى. جاڭا ۇكىمەت باسشىسى دەپۋتاتتار الدىندا سويلەگەن سوزىندە بىرنەشە ماسەلەردى قوزعاۋى نازار اۋدارتادى:
بىزگە جاڭا ەكونوميكالىق سەرپىن كەرەك, شىن مانىندە جەدەل ءارى شەشۋشى شارالار قابىلداۋ كەرەك;
ونەركاسىپكە, مۇنايعا جانە باسقا دا ماڭىزدى سالالارعا باسا نازار اۋدارىلادى;
ءبىز وتاندىق ءوندىرىستى ىنتالاندىرۋ شارالارىن قابىلدايمىز. قازاقستاندا وندىرىلەتىن ءونىم ۇلەسىن ۇلعايتىپ, وفتەيك كەلىسىمشارتتار جۇيەسىن تولىقتاي ىسكە قوسۋ قاجەت;
ءبىزدىڭ باستى مىندەتىمىز – وتاندىق بيزنەستى قولداۋ;
اۋىل شارۋاشىلىعىنىڭ الەۋەتىن ءتيىمدى پايدالانۋ ماڭىزدى;
ءبىز جاساندى ينتەللەكت پەن جاڭا تەحنولوگيالاردى پايدالانۋ مۇمكىندىكتەرىن كەڭەيتۋدى جوسپارلاپ وتىرمىز;
زاڭ ۇستەمدىگىن قامتاماسىز ەتۋ شارالارى جانە حالىقتى تولعاندىراتىن باسقا دا ماسەلەلەر ۇكىمەتتىڭ ۇنەمى نازارىندا بولادى.
جاڭا پرەمەر-ءمينيستردىڭ «كۇشتى پرەزيدەنت, ىقپالدى پارلامەنت, ەسەپ بەرەتىن ۇكىمەت» قاعيداتىن باسشىلىققا الاتىن بولادى دەگەن ۇمىتتەمىز.
وسى ورايدا, ءبىز پارلامەنتاريلەر دە مەملەكەت باسشىسىنىڭ تاپسىرمالارىن ورىنداۋدا, الدىمىزدا تۇرعان جۇكتى ۇكىمەتپەن جۇمىلا كوتەرىپ, ءبىر ماقسات, ءبىر مۇددەگە جۇمىس ىستەۋگە دايىنبىز», دەلىنگەن جازبادا.