بۇگىن پرەزيدەنت قاسىم-جومارت توقاەۆتىڭ توراعالىعىمەن ءوتىپ جاتقان ۇكىمەتتىڭ كەڭەيتىلگەن وتىرىسىندا مەملەكەتتىك ساتىپ الۋ, مەملەكەت پەن جەكەمەنشىك سەرىكتەستىك, قۇرىلىس سالاسىنا دا اۋقىمدى رەفورما جۇرگىزۋ قاجەتتىگى ايتىلدى, دەپ جازادى Egemen.kz اقوردا ءباسپاسوز قىزمەتىنە سىلتەمە جاساپ.
پرەزيدەنت ءوز سوزىندە مەملەكەتتىك ساتىپ الۋ, مەملەكەت پەن جەكەمەنشىك سەرىكتەستىگى, قۇرىلىس سالاسىن رەتتەۋ جۇيەسىن رەفورما جۇرگىزۋ ۋاقىت كۇتتىرمەيتىن شارۋا ەكەنىن اتاپ ءوتتى.
«بۇل جۇمىس ينۆەستيتسيا تارتۋ جانە بيۋدجەت قاراجاتىن ءتيىمدى پايدالانۋ ىسىندەگى رەفورمالارمەن بارىنشا ۇيلەسىپ, ونى تولىقتىرا تۇسۋگە ءتيىس.
قازىر ماجىلىستە مەملەكەتتىك ساتىپ الۋ تۋرالى زاڭ جوباسى قارالىپ جاتىر. بۇل قۇجاتتى پىسىقتاپ, جەتىلدىرۋ قاجەت. پارلامەنت دەپۋتاتتارىنان وسىعان ەرەكشە ءمان بەرۋدى سۇرايمىن. ەڭ الدىمەن, اۋديتورلاردىڭ قىزمەتىن رەتتەۋ كەرەك.
وسى ورايدا اركىمنىڭ زاڭ نورمالارىن ءوز قالاۋىنا قاراي يكەمدەپ, تۇسىندىرۋىنە جول بەرۋگە بولمايدى. بۇل – تاۋار, جۇمىس جانە قىزمەت ۇسىنۋشىلارعا قويىلاتىن تالاپتارعا دا قاتىستى ماسەلە. ولاردىڭ بەلگىلەنگەن مەرزىمدى بۇزعانى جانە جۇمىستى ساپاسىز ورىنداعانى ءۇشىن جاۋاپكەرشىلىگىن كۇشەيتۋ قاجەت. مۇنىڭ, اسىرەسە, قۇرىلىس سالاسى ءۇشىن ماڭىزى زور.
مەملەكەتتىك ساتىپ الۋ تۋرالى جاڭا زاڭ ەرس شارتتارىن قولدانا وتىرىپ, ينفراقۇرىلىم جوبالارىن تولىق جۇزەگە اسىرۋعا مۇمكىندىك بەرۋگە ءتيىس. بۇل رەتتە ەرس شارتتارىن جاساۋعا دايىندىق شارالارىنىڭ مەرزىمى قىسقا بولۋعا ءتيىس. سوندا اكىمدىكتەر باسىمدىق بەرىلگەن ءارى شۇعىل جۇزەگە اسىرىلۋعا ءتيىس جوبالاردى تەزدەتەدى», دەدى ق.توقاەۆ.
مەملەكەت پەن جەكەمەنشىكتىڭ سەرىكتەستىگىن دامىتۋ ءۇشىن ءبىراز شارۋا اتقارىلعانىن ايتقان پرەزيدەنت ناتيجەسى ءالى دە ماردىمسىز ەكەنىنە قىنجىلدى.
«قازىر مۇنداي جوبالار نەگىزىنەن الەۋمەتتىك سالاعا ەنگىزىلىپ جاتىر. بۇل سالادان كوپ تابىس تۇسپەيتىنى بەلگىلى. اشىعىن ايتقاندا, ءبىز نىسانداردىڭ قۇرىلىسىنا ءبولىپ تولەۋ ارقىلى قارجى قۇيىپ وتىرمىز. مەملەكەت ءۇشىن مۇنداي ءتاسىل, ارينە, ءتيىمسىز», دەدى پرەزيدەنت.
ايتا كەتسەك, وسى سالاداعى نورمالار مەن راسىمدەر جەكە بيزنەسكە سالماق سالادى نە بولماسا ينۆەستورعا وتە ءتيىمدى بولعانىمەن, مەملەكەتكە پايدا اكەلمەيدى. بۇل ماسەلەنى نازارعا العان قاسىم-جومارت توقاەۆ تەڭگەرىمدى, ياعني بالانستى ساقتاۋ كەرەك ەكەنىن, مەملەكەت پەن ينۆەستوردىڭ مۇددەسى بىردەي ەسكەرىلۋى قاجەت ەكەنىن ءتۇسىندىردى.
«بىزدە مەملەكەت پەن جەكەمەنشىك سەرىكتەستىگى جەكە جوبالاردى بيۋدجەتتەن استىرتىن قارجىلاندىراتىن تاسىلگە اينالىپ كەتتى. مەملەكەت پەن جەكەمەنشىك سەرىكتەستىگى جۇيەسىن قايتا قۇرۋعا قاتىستى جۇمىس باياۋ ءجۇرىپ جاتىر. ازىرگە ناقتى ناتيجە جوق. ۇكىمەت وسى ماسەلەنى رەتكە كەلتىرۋ قاجەت», دەگەن پرەزيدەنت ويدان جاڭالىق ويلاپ تابۋدىڭ قاجەتى جوق ەكەنىن قاتاڭ ەسكەرتتى.
مەملەكەت باسشىسى بۇل شارۋانى دا سوزبالاڭعا سالماي تەز ارادا شەشىپ, الەمنىڭ وزىق تاجىريبەسىن قولدانىپ, ءتيىمدى تاسىلدەردى ۇسىنا الاتىن حالىقارالىق ۇيىمداردى تارتۋدى جۇكتەدى.