ۇكىمەتتىڭ كەڭەيتىلگەن وتىرىسىندا قاسىم-جومارت توقاەۆ سالىق جۇيەسىن تولىق تسيفرلاندىرۋ قاجەت ەكەنىن ايتتى. پرەزيدەنتتىڭ پايىمىنشا, بۇل سالا تسيفرلىق تاسىلدەردى, اسىرەسە جاساندى ينتەللەكتىنى قولدانۋ جاعىنان ەڭ الدىڭعى شەپتە بولۋعا ءتيىس. بۇل تۋرالى اقوردانىڭ ءباسپاسوز قىزمەتى جازدى, دەپ حابارلايدى Egemen.kz.
قاسىم-جومارت كەمەل ۇلىنىڭ ايتۋىنشا, مەملەكەتتىك كىرىستەر كوميتەتىندە 2000-2014 جىلدارى ىسكە قوسىلعان 14 اقپاراتتىق جۇيە بار. ولاردىڭ كوبى كەڭىنەن قولدانىلمايدى. 2021 جىلى بۇل جۇيەلەردىڭ ءبارى حالىقارالىق قارجى ۇيىمدارىنىڭ قولداۋىمەن 12 جىل بويى جاسالعان جاڭا جۇيەلەرمەن الماستىرىلۋى كەرەك ەدى. بىراق قاراجات يگەرىلگەنىنە قاراماستان, ەش ناتيجە جوق.
«ۆەدومستۆونىڭ بارلىق اقپاراتتىق جۇيەسىنە تاۋەلسىز Iت-اۋديت جۇرگىزۋدى تاپسىرامىن. جاڭا سالىق كودەكسىن ازىرلەۋمەن قاتار مەملەكەتتىك كىرىستەر كوميتەتىنىڭ جاڭا اقپاراتتىق ارحيتەكتۋراسىن قالىپتاستىرۋ قاجەت», دەدى پرەزيدەنت.
سونداي-اق مەملەكەت باسشىسى سالىق جانە بيۋدجەت سالاسىنا تۇبەگەيلى رەفورما قاجەت ەكەنىن ايتتى.
«جالپى, سالىق جانە بيۋدجەت سالاسىنا تۇبەگەيلى رەفورما قاجەت. سونىڭ ارقاسىندا مەملەكەت پەن بيزنەستىڭ اراسىندا جاڭا قوعامدىق شارت جاسالماق. وسىلايشا, ۇلتتىق تابىستى ءادىل ءبولۋدىڭ پاراساتتى جولى قالىپتاسادى. بۇل – ۇكىمەتتىڭ الدىندا تۇرعان نەگىزگى باسىمدىق», دەدى قاسىم-جومارت توقاەۆ.