سەنات بيۋروسىنىڭ وتىرىسى ءوتىپ, دەپۋتاتتار 8 اقپانداعى كۇن ءتارتىبىن بەكىتتى, دەپ جازادى Egemen.kz جوعارعى پالاتانىڭ ءباسپاسوز قىزمەتىنە سىلتەمە جاساپ.
پالاتا وتىرىسىندا سەناتورلار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا ەلەكتروندىق نىساندا قىزمەتتەر كورسەتۋ كەزىندە جاناما سالىقتار الۋ ءتارتىبىن ايقىنداۋ بولىگىندە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قارايدى.
زاڭ سالىق ەسەبىنە وڭايلاتىلعان جولمەن قويۋدىڭ جانە ەلەكتروندىق قىزمەتتەرگە قوسىلعان قۇن سالىعىن تولەۋدىڭ ۇلتتىق تەتىگىن ەنگىزۋدى كوزدەيدى. سونداي-اق اتالعان قۇجات ەۋرازيالىق ەكونوميكالىق وداق ىشىندە دە, ققس تولەۋدىڭ اشىق جانە ناقتى تەتىگى بار ءۇشىنشى ەلدەرمەن دە سالىق سالۋدىڭ تەڭ جاعدايلارىن قالىپتاستىرۋعا ىقپال ەتۋگە ءتيىس.
سونىمەن قاتار «قازاقستان رەسپۋبليكاسىنىڭ ۇكىمەتى مەن ەستونيا رەسپۋبليكاسىنىڭ ۇكىمەتى اراسىنداعى ادامداردىڭ رەادميسسياسى تۋرالى كەلىسىمدى راتيفيكاتسيالاۋ تۋرالى» زاڭ دا سەنات وتىرىسىنىڭ كۇن تارتىبىنە شىعارىلدى.
زاڭ نورمالارى زاڭسىز كوشى-قونعا قارسى ءىس-قيمىل سالاسىندا قازاقستان مەن ەستونيانىڭ قۇزىرەتتى ورگاندارى اراسىندا ءتيىمدى ىنتىماقتاستىقتىڭ قۇقىقتىق نەگىزىن قالىپتاستىرۋعا, تاراپتار بولىپ سانالاتىن مەملەكەتتەردىڭ اۋماعىندا كەلۋ, بولۋ, تۇرۋ شارتتارىن ورىندامايتىن نەمەسە ورىنداۋدى توقتاتقان ادامداردى سايكەستەندىرۋدىڭ جانە قايتارۋدى ۇيىمداستىرۋدىڭ وڭتايلى راسىمدەرىن بەلگىلەۋگە, سونداي-اق, وسىنداي ادامداردىڭ ءترانزيتىن جەڭىلدەتۋگە ارنالعان.
ودان بولەك, بيۋرو وتىرىسىندا ماجىلىستەن كەلىپ تۇسكەن زاڭدار سەناتتىڭ تۇراقتى كوميتەتتەرىنە ءبولىنىپ بەرىلدى.