الماتىدا ءوتىپ جاتقان Digital Almaty 2024 فورۋمىنا قاتىسقان تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات مۋسين قازاقستان ازاماتتارىنىڭ GPT چات فورماتىنداعى بايلانىس ارقىلى مەملەكەتتىك قىزمەتتەردى الا الۋعا مۇمكىندىك تۋاتىنىن ايتتى, دەپ حابارلايدى Egemen.kz.
ءمينيستردىڭ ايتۋىنشا, بۇۇ رەيتينگى بويىنشا ءبىزدىڭ ەل ونلاين قىزمەتتەردى كورسەتۋ بويىنشا الەمدە 8-ءشى ورىندا تۇرسا, جالپى ەلەكتروندى ۇكىمەتتى دامىتۋ بويىنشا 28-ورىندى مىسە تۇتتى. كولىكتەردى ۇيدە وتىرىپ-اق 5 مينۋتتان از ۋاقىت ىشىندە تىركەۋدەن قولما-قول اقشاسىز تولەمدەردى ەنگىزۋگە دەيىن تسيفرلىق ينفراقۇرىلىمدى دامىتۋ شەڭبەرىندە تابىسقا قول جەتكىزىلدى.
«مەملەكەتتىك قىزمەتتەردىڭ 93 پايىزعا جۋىعى ەلەكتروندى تۇردە كورسەتىلەدى, 50 ميلليون انىقتاما تولىعىمەن الىنىپ تاستالدى, ويتكەنى بىزدە ينتەگراتسيالانعان اقپاراتتىق جۇيەلەر بار جانە مەملەكەتتىك ورگاندار مەن ۇيىمداردان انىقتاما تالاپ ەتۋگە تىيىم سالىنعان», دەپ اتاپ ءوتتى باعدات مۋسين.
مينيستر 2024 جىلدان باستاپ e-Gov باعدارلامالارىنا جاساندى ينتەللەكت ەنگىزۋگە دايىندىق باستالعانىن, جاقىن ارادا GPT چات فورماتىنداعى بايلانىس ارقىلى مەملەكەتتىك قىزمەتتەرگە دە قول جەتكىزۋگە بولاتىنىن ايتتى.
ء«بىز قازاق تىلىندە LLM قۇرۋ بويىنشا جۇمىس ىستەپ جاتىرمىز», دەدى ول.
ايتا كەتەيىك, الماتىدا Digital Almaty 2024 تسيفرلىق فورۋمى ءوتىپ جاتىر. فورۋمدا 200-دەن استام سپيكەر ءسوز سويلەپ, ەكونوميكا مەن يننوۆاتسيانىڭ ناقتى سەكتورىندا جاڭا تەحنولوگيالاردى قولدانۋداعى ءساتتى ىستەرمەن بولىسەدى. ءۇش كۇنگە سوزىلاتىن تسيفرلىق ءىس-شاراعا 30 مىڭنان استام ادام قاتىسادى.