«قىزىڭدى بوتەن ۇيگە قوندىرما»

كامەلەتكە تولماعانداردىڭ ءتارتىبى مەن تاربيەسىنە قاتىستى وبلىستىق پوليتسيا دەپارتامەنتى تەرگەۋ باسقارماسىنىڭ اسا ماڭىزدى ىستەر جونىندەگى اعا تەر­گەۋ­شىسى, پوليتسيا­ پود­پول­كوۆ­نيگى ۆەنەرا ابدۋللينانىڭ دا ايتارى كوپ.

«اقتوبە وبلىسىندا 2022 جىلى ايەلدەر مەن بالالارعا قارسى جىنىستىق قولسۇعۋشىلىق بويىنشا 41 قىلمىس, 2023 جىلى 33 قىلمىس تىركەلگەن. بىلتىرعى تىركەلگەن 33 قىلمىستىڭ 18-ءى كامەلەتكە تولماعانداردى جىنىستىق قاتىناسقا ماجبۇرلەۋ بويىنشا قوزعالدى. بىلتىر پوليتسيا دەپارتامەنتىنىڭ وندىرى­سىن­دە جاتقان وسى سيپاتتاعى 107 قىلمىستىق ءىستىڭ 20-سى سوتقا جولدانىپ, 72-ءسى قىلمىس قۇرامىنىڭ بولماۋىنا بايلانىستى توقتاتىلدى. وسى قاڭتاردا تاعى 15 قىلمىستىق ءىس وندىرىسكە ەندى», دەيدى ول.

كامەلەتكە تولماعان ءجاسوس­پى­رىم­دى كۇدىكتىنىڭ جىنىس­تىق قاتىناسقا ماج­بۇر­لەۋى دالەل­دەن­سە, ول بەس جىلدان سەگىز جىلعا دەيىن باس بوستاندىعىنان ايىرىلادى. الايدا ادام تاعدىرى ويىنشىق ەمەس. بۇل جەردە كۇدىكتى مەن جابىرلەنۋشىنىڭ اراسىنداعى بارلىق ارەكەت بۇگە-شىگەسىنە دەيىن قاراستىرىلىپ, انتروپولوگيالىق-مەديتسينالىق ساراپتاما تاعايىندالادى. «بىزگە تۇسكەن بارلىق قىلمىستى زەردەلەۋ بارىسىندا جابىرلەنۋشى مەن كۇدىكتىنىڭ كوبىنەسە الەۋمەتتىك جەلىدە تانىساتىنى انىقتالادى. نازار اۋدارارلىق جايت, مۇنداي كەزدە 16 جاستاعى قىزدار وزدەرىن 18-20 جاستامىز دەپ تانىستىرادى. قىل­مىستىق ىستەردەگى جابىرلەنۋشىلەر نەگى­زىنەن كوللەدجدەردىڭ تومەنگى كۋرسىن­دا وقيتىن قىزدار, اراسىندا اۋىل مەكتەپتەرىنىڭ وقۋ­شىلارى دا ۇشىراسىپ جاتادى. قالا مەكتەپتەرىنەن جۇكتىلىك دەرەگىمەن وقي­عالار تىركەلگەن جوق. كوبىنە ەرتە جاس­تاعى جۇكتىلىك مەكتەپتەر مەن كوللەدج وقۋ­شى­لارىن مەديتسينالىق تەكسەرىستەن وتكىزۋ كەزىندە انىقتالدى. بىزگە ارىز تۇسكەن بويى ءىستى باقىلاۋعا الىپ, تەرگەۋ جۇمىستارىن باستايمىز», دەيدى ۆەنەرا سەرىكبايقىزى.

كامەلەت جاسىنا جەتپەگەن قىزىنىڭ جۇكتى بولىپ قالعانىن بىلگەن بويى اتا-انا پوليتسياعا ارىزدانادى. وسى ساناتتاعى قىلمىستاردى زەردەلەۋ بارىسىندا انىقتالعانى, جىنىستىق زورلىق-زومبىلىققا كوبىنە تولىق ەمەس نەمەسە تۇرمىسى تومەن وتباسىلاردىڭ كامەلەتكە تولماعان قىزدارى كوبىرەك ۇشىراپ جاتادى. بۇل جەردە اتا-انانىڭ جەتكىنشەكتەر تاربيەسىنە جەتكىلىكتى ءمان بەرمەيتىنىن ەرەكشە اتاپ وتكەن ءجون. قىزدارى «قۇر­بىم­نىڭ ۇيىندە بولامىن» دەگەن سىلتاۋ­مەن ءجيى ۇيىنە قونبايدى, ءتۇن ورتاسىنا دەيىن كوشەدە جۇرەدى. قىلمىستىق ىستەردەگى جىنىستىق زورلىقتىڭ ورتاق بەينەسى قانداي؟ ول ورتا جاستاعى, تۇراقتى جۇمىسى جوق, كەزدەيسوق تابىستارمەن كۇنەلتەتىن ەر ادام, ءبىلىمى ورتا. تەرگەۋ باسقارماسىندا تۋعان ناعاشىسىنان جۇكتى بولىپ قالعان قىزعا قاتىستى قىلمىستىق ءىس تەرگەلىپ جاتىر. باسىندا قىزدىڭ دوستاسىپ جۇرگەن جىگىتىنەن كۇدىكتەنگەن. الايدا مەديتسينالىق ساراپتاما قورىتىندىسى قىزدىڭ تۋعان ناعاشى اعاسىنان جۇكتى بولعانىن كورسەتتى. حالقىمىز « ۇلىڭدى بوتەن­ ۇيدەن تويدىرما, قىزىڭ­دى بوتەن ۇيگە قوندىرما» دەپ تەككە ايتپاعان.

ۇيىندەگى ۇلكەندەردەن تىيىم كور­مەيتىن جەتكىنشەككە تۇنگى كوشەدە جاۋ كوپ. ءجاسوس­پىرىم قىز, نە ۇل نەگە ۇيدە وتىرعىسى كەل­مەيدى؟ وعان نەگە تۋعان اتا-اناسى ەمەس, كوشەدەگى كۇماندى ادامدار جاقىن؟ ويت­كەنى ۇيدە بالاعا قولداۋ جوق, ونىمەن اشىق سويلەسپەيدى, جاقىندارىنىڭ ۇرىس-كەرىسى, ماسكۇنەم اكە بالانى ۇيدەن بەز­دى­رەدى. اكە-شەشە بالانى كوزدەن تاسا جىبەر­مەي, شىن جاناشىرلىق تانىتىپ, ۇنەمى قول­داۋ كورسەتىپ وتىرسا, كوشەدەن قىزىق ىزدە­مەيدى.

ۆەنەرا ابدۋللينانىڭ ايتۋىنشا, كەيىنگى ۋاقىتتا كامەلەتكە تولما­عان­دارعا قارسى جىنىستىق سيپاتتاعى قىل­مىس­تار­دىڭ ور­شۋى­نە وڭاشا كينو­تەاتر­لار­دىڭ كوبەيۋى دە سەبەپ بولىپ وتىر. «پان­دە­ميا­دان كەيىن قالادا كەز كەلگەن جەردە ەكى ادامدىق كينوتەاترلار اشۋ سانگە اينالدى. ەكى ادام وڭاشا بولمەدە بىرنەشە ساعات كينو كورەدى. بۇل جەردە ىشىمدىككە دە, تاماق­قا دا تاپسىرىس بەرۋگە بولادى. ءجاس­وسپى­رىم قىزدار تۇندە وسىنداي جەرلەر­گە كوپ بارادى. قىلمىستىق ىستەردە جابىر­لەنۋ­شى مەن كۇدىكتىنىڭ الەۋمەتتىك جەلى­لەر­دە­ تا­نىسىپ, وسىنداي كۇدىكتى ورىنداردا ۋاقىت وتكىزەتىنى انىقتالعان», دەيدى اعا تەر­گەۋشى.

ءجاسوسپىرىم تاربيەسىندە باستى جاۋاپ­كەر­شىلىك اتا-اناسىندا بولماسا ءبارى بەكەر. كامەلەتكە تولماعاندارعا قارسى جاسا­­لاتىن قىلمىس سانىن ازايتۋ ءۇشىن اكە-شەشەنىڭ جاۋاپكەرشىلىگىن كۇشەيتۋ ءوز الدىنا, ودان باسقا شاعىن جانە ورتا كاسىپ­­كەر­لىككە موراتوري جاريالانعان كەزدە قاپتاپ كەتكەن ينتيمدىك قىزمەت كور­سەتۋگە باعىتتالعان ورىنداردى قاتاڭ تەكسەرۋ كەرەك.

اقتوبە وبلىسى