«مايقايىڭالتىن» اق اۋماعىنداعى وپىرىلعان جەردىڭ تۇبىندە گاباريتتى ەمەس تاس تولىعىمەن بولشەكتەلگەن. ونىڭ ۇزىندىعى 8 مەتردى, ەنى 7 مەتردى, قالىڭدىعى شامامەن 2 مەتردى قۇراعان, دەپ حابارلايدى Egemen.kz.
تجم-ءنىڭ ءباسپاسوز قىزمەتى ءمالىم ەتكەندەي, توپىراقتىڭ تۇراقسىزدىعىنا, ىقتيمال بوس ورىندارعا جانە توپىراق پەن تاۋ جىنىستارىنىڭ ۇنەمى سىرعۋىنا بايلانىستى وپىرىلعان جەردىڭ تۇبىندەگى جۇمىستارعا كوپ تەحنيكالار مەن مامانداردى تارتۋ مۇمكىن ەمەس. وپىرىلۋ ورنىنداعى جۇمىستار – قۇتقارۋشىلاردىڭ ومىرىنە زور قاۋىپ توندىرە وتىرىپ جالعاسىپ جاتىر.
سول سەبەپتى ءبىر نەمەسە ەكى شاعىن ەكسكاۆاتور جانە تەحنيكانىڭ باعىتىن ۇيلەستىرۋ ءۇشىن بىرنەشە مامان تۇبىنە تۇسەدى, قالعاندارى جيەگىنەن قىزمەتكەرلەردى ساقتاندىرۋ كابەلدەرى جاردەمىمەن شىعارىپ الۋ ءۇشىن شەتىنەن ساقتاندىرادى.
ىزدەستىرۋ-قۇتقارۋ جۇمىستارىنا بارلىعى 138 ادام, 40 تەحنيكا, 3 كينولوگيالىق ەسەپتوپ, 2 درون جۇمىلدىرىلىپ وتىر.