قازاقستاننىڭ جوعارى وقۋ ورىندارىنان تۇلەپ ۇشقان جاس ماماندار جۇمىس ىزدەۋگە ورتا ەسەپپەن 79 كۇن جۇمسايدى. بۇل تۋرالى قر عىلىم جانە جوعارى ءبىلىم مينيسترلىگىنە قاراستى عىلىم جانە جوعارى ءبىلىم سالاسىنداعى ساپانى قامتاماسىز ەتۋ كوميتەتىنىڭ توراعاسى ادىلەت تويباەۆ ايتتى, دەپ حابارلايدى Egemen.kz.
مينيسترلىكتىڭ مالىمەتىنشە, 2023 جىلى جوو تۇلەكتەرىنىڭ 77 پايىزى جۇمىسقا ورنالاسقان.
«جۇمىسپەن قامتۋدىڭ ورتاشا دەڭگەيى 2023 جىلى 3,3%-عا ءوسىپ, 82,8%-دى قۇراسا, 2021 جىلى بۇل كورسەتكىش 78,4%-دى, 2022 جىلى – 79,5%-دى قۇرادى. ال جۇمىس ىزدەۋدىڭ ورتاشا ۇزاقتىعى - 79 كۇن, ياعني 2,64 اي», دەدى ادىلەت تويباەۆ ورتالىق كوممۋنيكاتسيالار قىزمەتىندە وتكەن بريفينگتە.
ول بۇگىنگى تاڭدا جۇمىس بەرۋشىلەردىڭ جوعارى وقۋ ورىندارىنىڭ ءبىلىم بەرۋ باعدارلامالارىنىڭ ساپاسى مەن وزەكتىلىگىنە قاناعاتتانۋى ارتقانىن اتاپ ءوتتى.
«جۇمىس بەرۋشىنىڭ قاناعاتتانۋى 67,5 پايىزدى قۇرايدى. بەس جىلداعى ديناميكا 35%-دى قۇرادى, ويتكەنى 2019 جىلى وزەكتىلىك 33%-دى قۇرادى. بۇل جاقسى ناتيجە», دەدى ول.
ۆەدومستۆونىڭ حابارلاۋىنشا, ءبىلىم بەرۋ باعدارلامالارىنىڭ 91 پايىزى جۇمىس بەرۋشىلەرمەن كەلىسىلگەن, وقۋ پروتسەسىنە پراكتيك ماماندار تارتىلعان.
سونىمەن قاتارت ءبىلىم بەرۋ باعدارلامالارىنىڭ 94%-ى تانىلعان اككرەديتتەۋ اگەنتتىكتەرىمەن اككرەديتتەلگەن, بۇل دا ساپانىڭ ارتقانىن راستايدى.