كاسىپكەرلەردى قولداۋعا ارنالعان «بيزنەستىڭ جول كارتاسى» جانە «قاراپايىم زاتتاردىڭ ەكونوميكاسى» مەملەكەتتىك باعدارلامالارى بىرىكتىرىلەدى. بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى الىبەك قۋانتىروۆ ايتتى, دەپ حابارلايدى Egemen.kz.
«مەملەكەت باسشىسىنىڭ حالىققا جولداۋىن ورىنداۋ ماقساتىندا مينيسترلىك «بيزنەستىڭ جول كارتاسى» جانە «قاراپايىم زاتتاردىڭ ەكونوميكاسى» باعدارلامالارىن بىرىزدەندىرۋدى كوزدەيتىن مەملەكەتتىك قولداۋ شارالارىن كورسەتۋ باعدارلاماسىن ازىرلەدى. باسەكەگە قابىلەتتى, يمپورتتى الماستىراتىن جانە ەكسپورتقا باعىتتالعان وندىرىستەردى دامىتۋعا جانە جاڭا جۇمىس ورىندارىن اشۋعا باستى نازار اۋدارىلادى», دەدى الىبەك قۋانتىروۆ.
مينيستر باعدارلامانىڭ «شاعىن كاسىپكەرلىك», «شاعىن جانە ورتا كاسىپكەرلىك», «وڭدەۋ ونەركاسىبىندەگى جانە قىزمەت كورسەتۋ سالاسىنداعى شاعىن, ورتا جانە ءىرى كاسىپكەرلىك», «مونو جانە شاعىن قالالارداعى, اۋىلدىق ەلدى مەكەندەردەگى كاسىپكەرلىك», «الەۋمەتتىك كاسىپكەرلىك», «قور بيرجاسى» اتتى 6 باعىتتان تۇراتىنىن ءتۇسىندىردى.
«باعىتتار اياسىندا جاڭا جوبالاردى سۋبسيديالاۋعا بيۋدجەت قاراجاتىن ءبولۋ نەگىزىنەن وڭدەۋشى ونەركاسىپ كاسىپورىندارى ءۇشىن جۇزەگە اسىرىلادى. باعدارلاما سۋبسيديالاۋدان كەپىلدىك قۇرالدارىنا جانە باسقا دا قارجىلىق ەمەس قولداۋ شارالارىنا كەزەڭ-كەزەڭىمەن كوشۋدى قاراستىرادى», دەپ قوستى مينيستر.