استانادا ۇلتتىق قۇرىلتاي جۇمىس سەكتسيالارىنىڭ وتىرىستارى ءوتتى. ءىس-شارا بارىسىندا ۇلتتىق قۇرىلتاي توراعاسىنىڭ ورىنباسارى – مەملەكەتتىك كەڭەسشى ەرلان قارين قۇرىلتاي جۇمىسىنىڭ نەگىزگى باعىتتارى جونىندە پرەزيدەنتتىڭ 3 قاڭتاردا «Egemen Qazaqstan» گازەتىندەگى سۇحباتىندا ايتىلعانىن اتاپ ءوتتى. سونداي-اق وسى كونسۋلتاتيۆتىك-كەڭەسشى ورگاننىڭ قىزمەتى اياسىندا مەملەكەت باسشىسى كوتەرگەن باستامالاردىڭ جۇزەگە اسىرىلۋ بارىسىنا قىسقاشا توقتالدى.
اتاپ ايتقاندا, مەملەكەتتىك كەڭەسشى پرەزيدەنتتىڭ شىعىس قازاقستان وبلىسى مەن اباي وبلىسىندا جاڭا اۋدانداردى قالپىنا كەلتىرۋگە جانە قۇرۋعا, وڭىرلىك رامىزدەردى رەتتەۋگە, سونداي-اق «ازىرەت سۇلتان» تاريحي-مادەني قورىق-مۋزەيىنە «ۇلتتىق» مارتەبە بەرۋگە, «بالالار كىتاپحاناسى» جوباسىنا قاتىستى باستامالارى جۇزەگە اسىرىلعانىن ەرەكشە اتاپ ءوتتى.
ەرلان قارين زاڭ مەن ءتارتىپ قاعيداتتارىن بەكىتۋ جانە ىلگەرىلەتۋ جۇمىستارىنىڭ قوعامدىق ماڭىزى زور ەكەنىنە نازار اۋداردى. اتاپ ايتقاندا, تۇرمىستىق زورلىق-زومبىلىققا قارسى كۇرەس, بالالار مەن ايەلدەردىڭ قۇقىقتارىن قورعاۋ, ناشاقورلىققا جانە ەسىرتكى بيزنەسىنە قارسى كۇرەستىڭ 2023-2025 جىلدارعا ارنالعان كەشەندى جوسپارىن بەكىتۋ تۋرالى زاڭ جوباسىن ازىرلەۋ, پارلامەنت ءماجىلىسىنىڭ ۆەيپتەردى ەلىمىزگە اكەلۋگە, وندىرۋگە, ساتۋعا جانە تاراتۋعا تىيىم سالۋ تۋرالى زاڭ جوباسىن قابىلداۋى وسى باعىتتاعى اۋقىمدى جۇمىستاردىڭ اياسىنا كىرەدى.
ءىس-شارا اياسىندا ءبىر مەزگىلدە «ازاماتتىق قوعام», «مادەنيەت. ونەر. رۋحانيات», ء«بىلىم جانە عىلىم», سونداي-اق «الەۋمەتتىك-ەكونوميكالىق دامۋ» سەكتسيالارىنىڭ جۇمىس وتىرىستارى ءوتتى.
سەكتسيالاردىڭ جۇمىسى بارىسىندا مەملەكەتتىك ورگاندار ۇلتتىق قۇرىلتاي مۇشەلەرىنىڭ بۇعان دەيىن ايتقان ۇسىنىستارىنا وراي پىكىر ءبىلدىردى. سونداي-اق قوعامنىڭ بىرلىگىن نىعايتۋعا, قوعامدىق ءتارتىپ پەن زاڭدىلىقتىڭ ساقتالۋىنا, ۇلتتىق قۇندىلىقتاردى ناسيحاتتاۋعا باعىتتالعان جاڭا ۇسىنىستار تالقىلاندى.
ۇلتتىق قۇرىلتاي حاتشىلىعى جيىن بارىسىندا كوتەرىلگەن باستامالاردى جيناقتاپ, مۇقيات زەردەلەيدى.
قازىر كوكتەمدە اتىراۋدا وتەتىن ۇلتتىق قۇرىلتايدىڭ ءۇشىنشى وتىرىسىنا دايىندىق جۇمىستارى جۇرگىزىلىپ جاتىر.