شىمكەنت قالاسىندا 35 جاسقا دەيىنگى جۇمىس ىستەيتىن 888 جاس باسپانالى بولدى. قازىرگى ۋاقىتتا ازاماتتارمەن ارەندالىق جالداۋ شارتىن جاساسىپ, قونىستاندىرۋ جۇمىستارى باستالعان. اتالعان پاتەرلەر تۇران شاعىن اۋدانىندا ورنالاسقان, دەپ حابارلايدى Egemen.kz قالا اكىمىنىڭ ءباسپاسوز قىزمەتىنە سىلتەمە جاساپ.
«كونكۋرستان وتكەن ازاماتتارعا ارەندالىق جالداۋ شارتى بويىنشا 1414-تەن حابارلاما جولدانىپ جاتىر. جولدانعان كەلىسىمشارتقا ەلەكتروندى قول قويۋ ارقىلى پاتەر كىلتىنە قول جەتكىزە الادى», دەلىنگەن حابارلامادا. ەسكە سالايىق, شىمكەنت قالاسى بويىنشا 2023 جىلدىڭ 8-10 قاراشا ارالىعىندا 35 جاسقا دەيىنگى جۇمىس ىستەيتىن جاستارعا ارنالعان «جاستار» باعدارلاماسى بويىنشا ءوتىنىم قابىلدانعان. ناتيجەسىندە, اتالعان باعدارلامانىڭ تالاپ شارتتارىنا سايكەس كەلگەن 888 ازاماتتىڭ ءوتىنىمى ماقۇلدانعان. «جاستار» باعدارلاماسى بويىنشا تۇرعىن ۇيلەر ساتىپ الۋ قۇقىعىنسىز 3 جىل مەرزىمگە جالعا بەرىلەدى.