ءىىم-دە ورتالىق اپپارات قىزمەتتەرى مەن اۋماقتىق دەپارتامەنتتەردىڭ, قالالىق باسقارمالار مەن اۋداندىق پوليتسيا بولىمدەرىنىڭ باستىقتارىمەن, ۇلتتىق ۇلاننىڭ وڭىرلىك قولباسشىلىقتارى باسشىلارىنىڭ قاتىسۋىمەن وتىرىس ءوتتى, دەپ حابارلايدى Egemen.kz Polisia.kz سايتىنا سىلتەمە جاساپ.
ىشكى ىستەر ءمينيسترى ەرجان سادەنوۆ قىزمەتكەرلەرگە مەملەكەت باسشىسى قاسىم-جومارت توقاەۆتىڭ ۆەدومستۆو القاسىندا ىشكى ىستەر ورگاندارىنىڭ الدىنا قويعان نەگىزگى مىندەتتەرىن جەتكىزدى. ءمينيستردىڭ ورىنباسارلارى وتكەن جىلعى جۇمىستى قورىتىندىلاپ, وزدەرى جەتەكشىلىك ەتەتىن باعىتتار بويىنشا 2024 جىلعا ارنالعان جوسپارلارىمەن ءبولىستى. وتىرىس بارىسىندا مينيستر قىلمىستىڭ جەكەلەگەن تۇرلەرىنىڭ ءوسۋى بايقالاتىن جانە ولاردى اشۋ دەڭگەيى تومەندەگەن وڭىرلىك پوليتسيا دەپارتامەنتتەرىنىڭ جۇمىسىن سىنعا الدى. ارىپتەستەرىنە الداعى اتتەستاتسيا تۋرالى ەسكەرتىپ, بيىل مينيسترلىك كادر ساپاسىن ارتتىرۋعا دەن قوياتىنىن ايتتى.
ء«بىزدىڭ نەگىزگى مىندەتىمىز – قوعامدىق ءتارتىپتى قامتاماسىز ەتۋ. زاڭ جانە ءتارتىپ, قۇقىق بۇزۋشىلىقتارعا مۇلدەم توزبەۋشىلىك, جازانىڭ بۇلتارتپاستىعى ءبىرىنشى ورىندا تۇرۋى كەرەك. سوندىقتان ناريادتاردىڭ جۇيەلى جۇمىسىن ۇيىمداستىرىپ, كوشەلەر مەن اۋلالاردى بارىنشا قامتۋدى, مەكتەپتەر مەن جوعارى وقۋ ورىندارىندا پروفيلاكتيكالىق جۇمىستى كۇشەيتۋدى تاپسىرامىن», دەپ اتاپ ءوتتى مينيستر.
سونداي-اق, ول اۋماقتىق پوليتسيا دەپارتامەنتتەرىنىڭ باستىقتارىنا ازاماتتاردى جەكە قابىلداپ وتىرۋدى, ولاردىڭ كونستيتۋتسيالىق قۇقىقتارى مەن تەرگەۋ مەرزىمدەرىنىڭ ساقتالۋىن قامتاماسىز ەتۋدى, كوشى-قون سالاسىنا پاترۋلدىك, ۋچاسكەلىك ينسپەكتورلار مەن جەدەل قىزمەتكەرلەردى جۇمىلدىرۋدى تاپسىردى.
«جيىندا ءىىو قىزمەتتەرى مەن بولىنىستەرىنە تاعايىندالعان جاڭا باسشىلار تانىستىرىلدى. قر پرەزيدەنتى اكىمشىلىگىنىڭ كەلىسىمى بويىنشا ىشكى ىستەر ءمينيسترىنىڭ بۇيرىعىمەن قىزمەتتى كۇشەيتۋ ءۇشىن كريمينالدىق پوليتسيا دەپارتامەنتىنىڭ باستىعى لاۋازىمىنا پوليتسيا پولكوۆنيگى قانات نۇرماعامبەتوۆ تاعايىندالدى. بۇعان دەيىن ول مينيسترلىكتىڭ ۇيىمداسقان قىلمىسقا قارسى كۇرەس دەپارتامەنتىنىڭ باستىعى بولعان», دەلىنگەن حابارلامادا.
قاجك توراعاسى لاۋازىمىنا ادىلەت پولكوۆنيگى تەڭىزجان جانىبەكوۆ تاعايىندالدى. ول بۇرىن شىمكەنت قالاسى مەن تۇركىستان وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ باستىعى قىزمەتىن اتقارعان. بۇرىن ءىىم ەسىرتكى قىلمىسىنا قارسى ءىس-قيمىل دەپارتامەنتى باستىعىنىڭ ورىنباسارى بولعان پوليتسيا پولكوۆنيگى سارقىتباي قۇسايىنوۆ جەتىسۋ وبلىسى پد باستىعى لاۋازىمىنا تاعايىندالدى.